Eski U Pe Servi Brosir Ki Bondye Pe Demann Nu? pu Kumans Bann Letid?
1 Eski u ti kone ki kan u gayn bann diskisyon organize regilyerman lor Labib, mem si pu zis enn ti letan, avek enn kikenn ki interese ek u diskit enn size ki dan enn bann piblikasyon ki rekomande, u pe diriz enn letid Labib? Wi, li konsidere kuma enn letid Labib mem si letid la pe fer devan laport uswa par telefonn. Kifer eski u pa fer enn zefor spesyal ek servi brosir Ki Bondye Pe Demann Nu? pandan mwa Me ek Zin pu kumans enn letid kumsa.
2 Prepare pu Gayn Bann Bon Rezilta: Kan u pe ofer brosir Ki Bondye Pe Demann Nu?, gard klerman dan u lespri seki u anvi diskite. Gard tultan avek u bann brosir an Franse ek an Kreol pu ki u kapav adapte ar preferans dimunn la. Si u pe fer enn vizit, reflesi lor konversasyon ki u ti gayne dernye fwa. Demann umem: ‘Lor ki bann paragraf dan brosir la mo kapav atir latansyon pu devlop plis sa diskisyon la ek pu kumans enn letid Labib?’ Si u pe al lakaz-lakaz, reflesi ki bann size pu interes enn adolesan, enn dimunn aze, enn misye uswa enn madam. Reget bann size prinsipal dan brosir la ek swazir enn size ki pu interes dimunn la. Apre ki u’nn deside ki prezantasyon u pu servi, pratik li plizir fwa. Sa li enn parmi bann kitsoz ki fer gayn bann bon rezilta.
3 Sipleman Nu Minister DiRwayom Zanvye 2002 donn wit “Sigzesyon pu Prezant Brosir Ki Bondye Pe Demann Nu?” Lankadre “Enn Lapros Direk” montre kuma servi sa brosir la pu kumans bann letid. U kapav adapte premye sigzesyon la kumsa:
◼ “Eski u ti kone ki zis dan detrwa minit, u kapav truv repons enn kestyon inportan dan Labib? Par egzanp, kifer eski ena sa kantite relizyon la? Eski u’nn deza reflesi lor la?” Apre ki dimunn la fini reponn, uver leson 13 ek diskit de premye paragraf. Si letan permet, lir ek diskit enn uswa 2 verse. Lerla dir: “Leres leson la atir latansyon lor sink pwin ki permet idantifye vre relizyon. Mo ti pu kontan returne ek egzaminn sa bann pwin la avek u.”
4 Persevere: Sezi tu lokazyon pu montre ki manyer enn letid Labib dan brosir Ki Bondye Pe Demann Nu? derule. Demann benediksyon Zeova. (Mat. 21:22) Si u persevere dan u bann zefor, u kapav gut lazwa ki gayne kan ed enn kikenn pu aksepte labonn nuvel!