Campagne Spécial pou Distribué Nouveau Brochure
1 Beaucoup dimoune zordi bouleversé kan zot trouve bann conditions ki éna dans le monde. Mais bien tigit dimoune koné kifer le monde dans sa situation-la, ki l’avenir réservé, ek ki nous bizin faire pou survive kan bientôt Bondié pou faire so jugement. (Ézék. 9:4) Pou aide zot prend conscience signification bann événements ki pé arrivé zordi, pou éna enn campagne spéciale pou distribué nouveau brochure Contigne Veillé! Sa campagne-la pou commencé à partir Lundi 18 Octobre ziska Dimanche 14 Novembre.
2 Nous kapav offer sa brochure-la de maison en maison, dans bann nouvelle visites, kan nous pé donne témoignage informel, ou-soit kan nous pé prêche dans enn lieu public. Mais fodé pa nous laisse sa brochure-la avec n’importe ki dimoune ki nous joinde. Nous pou laisse sa brochure-la zis avec bann dimoune ki vrai-même montré enn l’intérêt sincère pou séki la Bible dire concernant bann événements ki pé arrivé dans sa lé-monde-la. Nous kapav laisse enn tract avec bann dimoune ki montré zis enn ti l’intérêt.
3 Pou capté l’intérêt bann dimoune, ou kapav dire:
◼ “Beaucoup dimoune tracassé à cause bann problèmes grave ek bann l’événements choquant ki pé arrivé zordi. [Cite enn l’exemple ki’nn arrivé dans l’endroit.] Eski ou koné ki la Bible ti dire ki sa bann kitsoz-la pou arrivé? [Laisse dimoune-la réponn. Après sa lire enn texte approprié ki éna enn rapport avec l’exemple ki ou’nn cité; couma par exemple Matthieu 24:3, 7, 8; Luc 21:7, 10, 11; ou-soit 2 Timothée 3:1-5.] La Bible explique nous signification bann l’événements ki pé arrivé zordi ek ki pé atann l’humanité. Eski ou ti pou content konn plus? [Laisse dimoune-la réponn. Si li manifesté enn l’intérêt sincère, offer brochure-la.] Sa brochure-la li disponible gratuitement. Mais si ou envie faire enn ti contribution pou l’activité ki nous faire dans le monde entier, nous pou bien content pou accepté li.”
4 Ou kapav aussi essaye sa présentation efficace-la:
◼ “Beaucoup dimoune bouleversé par bann l’événements choquant ki éna dans sa lé-monde-la, ou-soit kan zot-même personellement zot inn vive bann situations tragique. Certain dimoune demandé kifer Bondié pa faire nanyin pou empêche sa bann kitsoz-la. La Bible assure nous ki bientôt Bondié pou faire kitsoz pou soulage souffrance bann dimoune. Guetté ki bann bienfaits Bondié pou amené pou l’humanité. [Lire Psaume 37:10, 11.] Eski ou ti pou content konn plus?” Termine ou conversation pareil couma là-haut.
5 Essaye gagne nom ek l’adresse chaque dimoune ki accepté enn brochure, ek faire l’arrangement pou retourné ek développe so l’intérêt. Nous pou gagne bann suggestions couma pou faire sa dans Ministère du Royaume Novembre 2004. Si dimoune-la montré enn l’intérêt sincère kan ou’nn prêche avec li, kitfois ou kapav commence enn étude Biblique tout-de-suite. Ou kapav servi brochure Contigne Veillé! ou-soit enn l’autre publication, couma par exemple brochure Ki Bondye Pe Demann Nu?
6 Après ki’nn examine sa l’article-la dans réunion Service, bann proclamateurs pou kapav gagne sa nouveau brochure-la. Nous encourage bann proclamateurs ek bann pionniers prend zis séki zot pou bizin pou bann premier jours sa campagne-la. Nous souhaité ki Jéhovah béni sa campagne spécial-la, afin ki so nom glorifié ek pou ki tou bann dimoune sincère gagne bann bienfaits.—Ps. 90:17.