Pou offert enn nouveau brochure!
1. Ki nou pou offert pendant mois novembre, ek ki l’objectif sa publication-la?
1 Dan nou l’assemblée district en 2009 ki ti ena theme “Contigne veillé!,” nou ti gagne sa nouveau brochure-la: La Bible—Ki message ena ladan? Pendant mois novembre bann congregation dan le monde entier pou offert sa brochure-la pou premier fois. Couma bann dimoune dan nou territoire pou tire profit ar sa publication-la? La plupart dimoune, surtout si zot pa dan enn religion chretien, zot konn bien tigit kitsoz lor la Bible. A cause sa, couma nou trouvé dan page 3 sa brochure-la, so l’objectif c’est donne “enn connaissance de base lor la Bible.”
2. Couma nou kapav offert sa brochure-la?
2 Couma pou offert sa: Par exemple, nou kapav dire: “Nou ti pou content konn ou l’opinion lor seki finn dire ici. [Lire 2 Timothée 3:16.] Beaucoup dimoune avek ki nou’nn kozé, d’accord avek sa bann parole-la; lezot pensé ki la Bible li zis enn bon livre. Mais ou, couma ou considere la Bible? [Laisse dimoune-la reponn.] N’importe ki croyance nou ena, nou ena bann bon raison pou examine la Bible par nou-mem. [Lire paragraphe introduction ki trouve la-haut dan page 3.] A mesure ki ou lire sa ti resumé ki sa brochure-la faire lor message ki ena dan la Bible, ou pou remark enn kitsoz interessant: la Bible en entier ena enn sel theme ek enn sel message.”
3. Ki lot presentation nou kapav servi, surtout si nou pé preche dan enn territoire kot beaucoup dimoune pa dan enn religion chretien?
3 Anou guette enn lot suggestion, surtout kan nou pé preche ar bann dimoune ki pa dan enn religion chretien. Nou kapav dire: “Nou ti pou content konn ou l’opinion lor seki sa livre sacré-la dire ici. [Lire Psaume 37:11.] Couma ou pensé la terre pou été kan sa promesse-la pou realisé? [Laisse dimoune-la reponn.] Sa, c’est enn l’exemple lor l’espoir ek reconfort ki la Bible donne bann dimoune dan tou culture ek tou religion.” Lire paragraphe ki trouve la-haut dan page 3, ek apré offert sa brochure-la.
4. Couma nou kapav servi sa brochure-la pou commence enn l’etude la Bible?
4 Commence enn l’etude la Bible: Kan nou retourne visite sa dimoune ki nou ti joinde-la, nou kapav rappel li nou dernier conversation. Ek apré nou servi bann question ki trouve a la fin section ki pé traite sa sujet-la pou examine enn ou-soit deux paragraphe avek li. Si nou envie commence directement dan livre Ki la Bible enseigné?, nou kapav lire seki ena lor dernier page sa brochure-la avek li, ek apré nou donne li livre Ki la Bible enseigné? Nou kapav demann li ki chapitre ki interesse li, ek apré nou examine enn ou-soit deux paragraphe dan sa chapitre-la ensam. Anou faire tou seki nou kapav pou offert sa brochure-la pendant mois novembre!