Paran—Form U Zanfan Depi Ki Zot Ankor Byin Tipti
1 “Elve enn garson dapre semin ki bon pu li; mem kan li vinn vye, li pa pu turn ledo ar semin la.” (Pro. 22:6) Paran, si u pa anvi ki u zanfan “turn ledo ar” semin laverite, kan eski sa kalite formasyon la bizin kumanse? Depi li ankor byin tipti!
2 Letan Pol ti dir ki Timote ti gayn ledikasyon spirityel “depi ki li [ti] ankor byin tipti,” li ti pe rod dir kan li ti ankor tibaba. (2 Tim. 3:14, 15) Ala kuma Timote ti vinn enn zom byin spirityel. (Fil. 2:19-22) Paran, u’si u bizin kumans form u bann zanfan ‘depi ki zot ankor byin tipti’ pu ki zot ‘grandi devan lizye Zeova.’—1 Sam. 2:21.
3 Donn Zot Delo Ki Zot Bizin pu Grandi: Parey kuma bann tipti plant bizin gayn delo regilyerman pu zot grandi, bann zanfan usi, ninport ki laz zot ete, zot bizin gayn buku delo laverite ki ena dan Labib pu zot grandi pu vinn bann serviter Bondye ki ena matirite. Letid Labib regilye an fami li enn premye fason pu anseyn bann zanfan laverite ek pu ed zot devlop enn relasyon intim avek Zeova. Me paran, pran kont kapasite konsantrasyon sak zanfan. Pu bann ti zanfan, li preferab fer bann ti sesyon letid regilyerman, olye ki fer detrwa long-long sesyon.—Det. 11:18, 19.
4 Fode zame u suzestim kapasite u zanfan pu aprann. Rakont zot bann zistwar lor bann personaz Labib. Les zot desinn bann senn uswa zwe detrwa zistwar Labib dan form bann dram. Servi byin nu bann kaset video ek kaset odyo, ek pa bliye bann kaset dram biblik. Adapte letid familyal avek laz ek kapasite aprann u zanfan. Kumans par enn formasyon sinp, par ti doz; me amezir zanfan la grandi, ogmant so formasyon ek donn li enn formasyon pli puse. Donn li enn linstriksyon biblik ki vivan ek ki varye. U anvi u zanfan “devlop enn dezir” pu Laparol, alor rann letid la atiran otan ki u kapav.—1 Pyer. 2:2.
5 Fer Zot Partisipe dan Kongregasyon: Tigit par tigit, fixe bann lobzektif pu u bann zanfan pu ki zot partisip byin dan kongregasyon. Ki premye lobzektif zot kapav fixe? Bann paran ki ti ena de ti zanfan ti dir: “Tulede finn kumans aprann asiz trankil dan Lasal DiRwayom.” Plitar, ed bann zanfan la pu fer komanter dan zot prop mo dan bann reynion ek fer zot fixe lobzektif pu partisip dan Lekol Minister Teokratik. Dan predikasyon, zot kapav prezant trak devan laport, lir enn pasaz Labib, fer enn prezantasyon peryodik, ek gayn bann bon konversasyon avek bann dimunn. Tusala zot bann bon lobzektif.
6 Donn enn Bon Legzanp: Eski u zanfan tann u koz lor Zeova ek priye Li tulezur? Eski zot truv u etidye so Parol, asiste bann reynion, partisip dan predikasyon ek pran plezir pu fer volonte Bondye? (Psom 40:8) Li inportan ki zot remark sa bann kitsoz la ek ki zot fer sa ansam avek u. Enn tifi, ki finn vinn adilt asterla, ti dir konsernan so mama ki ti elve sis zanfan ek finn fer zot vinn bann Temwin fidel: “Legzanp Mama, sa mem ki ti plis inflyans nu—so legzanp fidel ti ena plis pwa ki bann parol.” Enn paran kat zanfan finn dir: “‘Zeova pas avan tu dan nu lavi’, sa li pa ti zis enn sinp fraz me kumsa mem ki nu ti viv nu lavi.”
7 Paran, kumans form u zanfan depi boner, anseyn zot laverite dan Parol Bondye, fixe bann lobzektif tigit par tigit, ek donn zot pli bon legzanp ki ena. U pu ere si u fer sa bann kitsoz la!