Forme ou bann zenfant pou vinn bann ministre la bonne nouvelle
1. Ki Psaume 148:12, 13 encourage bann parent chretien pou faire?
1 Jéhovah invite bann jeune pou loué Li. (Ps. 148:12, 13) Alors, bann parent chretien faire plus ki enseigne zot zenfant la verité lor la Bible ek la loi moral ki Bondié inn etabli. Zot aussi forme zot zenfant pou vinn bann ministre la bonne nouvelle. Couma eski zot kapav faire sa tigit par tigit?
2. Ki l’effet bon l’exemple enn parent kapav ena lor so bann zenfant?
2 Ou bon l’exemple: Juge Guidéôn ti dire so 300 zom: “Guetté couma mo faire, ek apré faire pareil.” (Juges 7:17) Bann zenfant guetté couma zot parent faire ek apré imite zot. Enn papa travail a-soir, mais au lieu ki li al dormi kan li rente lakaz samedi gramatin, li al preché avek so bann zenfant, mem si li bien fatigué. Sans ki li dire zot kitsoz, li pé enseigne zot ki predication, li enn priorité. (Mat. 6:33) Eski ou bann zenfant trouve ou pé participe avek la joie dan bann different forme l’adoration, couma la priere, lire la Bible, donne bann commentaire ek preché? Bien sur, ou pa pou enn l’exemple parfait. Mais si ou bann zenfant trouvé ki ou pé servi Jéhovah avek zele, zot pou reagir plus bien ar ou bann zeffort ki ou pé faire pou enseigne zot pou adore Jéhovah.—Deut. 6:6, 7; Rom. 2:21, 22.
3. Tigit par tigit, ki bann l’objectif spirituel bann parent bizin aide zot bann zenfant pou fixé ek pou realisé?
3 Fixé bann l’objectif tigit par tigit: Bann parent pa arrete forme zot zenfant dan fason ki zot bizin marché, kozé, habillé ek dan lezot domaine encore. A mesure ki bann zenfant grandi, bann parent kapav mette bann nouveau l’objectif devant zot. Bann parent chretien pou aide zot zenfant pou fixé ek pou realise bann l’objectif spirituel dapré zot l’age ek zot capacité. (1 Cor. 9:26) Eski ou pé enseigne ou bann zenfant pou donne bann commentaire dan zot prop mot ek pou prepare zot devoir dan Lekol ministere theocratik? (Ps. 35:18) Eski ou pé forme zot pou participe dan different l’aspect nou ministere? Eski ou pé encourage zot pou ena l’objectif pou prend bapteme ek service a plein temps? Eski ou pé aide zot pou frequente bann proclamateur ki ena la joie ek ki ena l’enthousiasme, ki pou encourage zot?—Prov. 13:20.
4. Couma bann zenfant kapav tire profit kan zot bann parent commence forme zot dan predication depuis ki zot tipti?
4 Enn psalmiste ti dire: “Ah Bondié, to finn enseigne moi depuis ki mo jeune, ek ziska asterla mo pé annonce to bann travail extraordinaire.” (Ps. 71:17) Depuis ki zot tipti, commence forme ou bann zenfant pou vinn bann ministre la bonne nouvelle. Pena doute ki sa base spirituel ki ou pé aide zot pou developpé-la pou aide zot kan zot pou vinn bann adulte!—Prov. 22:6.