Enseigne ou zenfant pou loué Jéhovah
1. Eski bann zenfant kapav loué Jéhovah?
1 Psaume 148:12, 13 encourage bann zenfant pou “loué nom Jéhovah.” Ena beaucoup l’exemple dan la Bible ki montré couma bann zenfant ti faire sa. Par exemple, kan ‘Samuel ti pé servi devant Jéhovah, li ti enn ti garson.’ (1 Sam. 2:18) C’est “enn tipti tifi” ki ti dire femme Naamân ki prophete Jéhovah dan Israël ti kapav gueri la lepre so mari. (2 Rois 5:1-3) Kan Jésus ti rente dan temple ek ti faire bann kitsoz extraordinaire, c’est “bann garson” ki ti criyé: “Sauve nou, nou suppliye toi, Garson David!” (Mat. 21:15) Couma bann parent kapav enseigne zot zenfant pou loué Jéhovah?
2. Kifer li important ki bann parent donne enn bon l’exemple zot bann zenfant?
2 Ou l’exemple: Bann papa israélite ti gagne l’ordre pou content Jéhovah ek mette so bann commandement dan zot prop leker avant ki zot faire la verité rente dan leker zot bann zenfant. (Deut. 6:5-9) Si ou koz lor predication dan enn fason positif ek ou mette sa dan ou program chaque semaine, sa pou pousse ou bann zenfant pou considere predication couma enn kitsoz important ek ki faire zot gagne satisfaction.
3. Couma enn soeur finn profite l’exemple so bann parent?
3 Avek beaucoup l’emotion, enn soeur raconté: “Kan mo ti pé grandi, nou famille ti ena l’habitude pou sorti predication chaque week-end. Mo ti kapav trouvé couma mo parent ti vrai-mem content preché. Nou finn grandi avek l’idée ki predication li enn kitsoz ki vrai-mem faire plaisir.” Sa soeur-la finn vinn enn proclamatrice non-baptisé l’age sept an ek li dan service a plein temps depuis plus ki 32 an.
4. Ki sa vedir forme bann zenfant tigit-par-tigit?
4 Forme ou zenfant tigit-par- tigit: Faire ou zenfant participe ensam avek ou dan predication. Kitfois zot kapav pese sonnette, place enn tract, ou-soit lire enn passage la Bible. Sa pou faire zot content ek pou aide zot gagne confiance dan zot capacité pou partage message lor Royaume Bondié. A mesure zot grandi, zot participation dan predication pou augmenté. Alors, aide zot pou progressé ek pou pense lor bann l’objectif ki zot kapav fixé ki pou aide zot ameliore zot service.
5. Ki enn zenfant bizin pou li qualifié pou vinn enn proclamateur non-baptisé?
5 Koz avek bann ancien pli vite possible kan ou senti ki ou bann zenfant inn paré pou vinn bann proclamateur non-baptisé ek kan bann zenfant-la-mem envie vinn bann proclamateur. Vinn enn proclamateur pou faire zot comprend zot responsabilité pou loué Jéhovah. Pa blié ki enn zenfant pa bizin konn autant kitsoz ki enn adulte baptisé pou li qualifié pou vinn enn proclamateur. Eski ou zenfant comprend bann enseignement principal ki ena dan la Bible? Eski li respecté bann principe moral ki ena dan la Bible? Eski li envie preché ek li envie ki bann dimoune konn li couma enn Témoin de Jéhovah? Si oui, bann ancien pou guetté si li rempli bann condition pou vinn enn proclamateur non-baptisé.—Guette livre Organisés pour faire la volonté de Jéhovah, p. 79-82.
6. Kifer li vaut la peine ki bann parent forme zot zenfant?
6 Sa demann beaucoup zeffort pou enseigne bann zenfant pou loué Jéhovah ar zot leker. Selman, pena beaucoup kitsoz ki kapav donne bann parent autant la-joie ki kan zot trouve zot zenfant faire bann progré spirituel. Pli important encore, Jéhovah content kan bann zenfant koz lor bann kitsoz extraordinaire ki Li’nn faire.