Program familial—Predication en famille
1 Jéhovah content kan Li trouve bann jeune pé glorifié so nom. (Ps. 148:12, 13) Kan Jésus ti lor la terre, mem bann “ti-zenfant ek bann ti-baba,” ti glorifié Bondié. (Mat. 21:15, 16) Zordi aussi li pareil. Parent, couma ou kapav aide ou zenfant pou glorifié Jéhovah avek zèle dan zot ministere? Pareil couma nou’nn trouvé dan lartik lor bann reunion, enn kitsoz ki bien-bien important c’est l’exemple ki ou donné. Enn papa ti dire seki beaucoup parent ressenti: “Bann zenfant pa faire seki ou dire; zot faire seki ou faire!”
2 Enn soeur ki finn elevé par bann parent ki ena la crainte pou Bondié, rappel: “Pa ti ena okenn samedi gramatin kot nou ti demandé: eski nou pou al preché zordi? Nou ti koné nou pé al preché.” Ou’si pareil, ou kapav montré ou zenfant l’importance predication, kan ou sorti en predication chaque semaine en famille. Sa pa pou zis permette ou zenfant guetté couma ou faire, mais aussi sa pou permette ou observe zot l’attitude ek zot maniere, ek guetté si zot pé faire progré.
3 Forme ou zenfant tigit-par-tigit: Pou ki bann zenfant content predication, ou bizin forme zot pou ki zot participé couma bizin. Sa soeur ki’nn mentionné la-haut-la ti dire: “Nou pa ti zis suive nou parent dan zot predication. Nou ti koné ki nou ena nou part pou faire, mem si nou ti zis pese sonnette ou-soit laisse enn feuille l’invitation. Nou ti bien prepare-nou a l’avance, ek coumsa nou ti koné ki nou pou dire.” Ou kapav forme ou zenfant pou predication, si ou prend dé-trois minute chaque semaine. Kifer ou pa faire li pendant l’etude familial?
4 Kan ou preché en famille, sa pou donne ou plus l’occasion pou faire la verité rente dan leker ou zenfant. Enn papa ti amenn so tifi avek li kan li ti al distribué bann tract dan enn lot village. Zot ti faire 20 kilometre allé-retour. Sa soeur-la rappel avek beaucoup plaisir: “C’est pendant sa bann la-marche-la, ki mo papa ti faire la verité rente dan mo leker.” (Deut. 6:7) Ou aussi, ou kapav gagne bann benediction coumsa, si chaque semaine, ou faire predication vinn enn partie dan ou program familial.