Parent, donne ou famille seki li bizin
“Si enn kikenn pa donne so famille seki li bizin, . . . li’nn renié la foi.”—1 Timothée 5:8.
1, 2. (a) Kifer li encourageant pou trouve bann famille assisté reunion ensam? (b) Ki difficulté bann famille parfois gagné pou zot kapav rente reunion a l’heure?
SUREMENT kan ou guette autour ou dan la salle avant ki reunion commencé, ou trouve bann zenfant bien habillé ek prop ki pé assize kot zot parent. Eski sa pa faire ou plaisir kan ou trouve l’amour ki ena dan sa bann famille-la—l’amour pou Jéhovah, ek l’amour ki ena entre zot? Mais li bien facile pou blié ki quantité zeffort sa bann famille-la inn bizin faire pou rente a l’heure reunion.
2 La plupart du temps, bann parent bien occupé tout la journée, ek dan bann jour kot ena reunion, la famille encore plus occupé. Bizin prepare mangé, ena l’ouvrage pou faire, ek ena bann devoir pou terminé. Bann parent bizin occupe pli beaucoup kitsoz; zot bizin veillé ki tou dimoune prop, ki zot inn mangé ek ki zot inn paré a l’heure. Bien-sur, avek bann zenfant, kapav arrive toujours bann mauvais surprise dan dernier l’heure. Pli grand-la dechire so caleson kan li pé joué. Pli tipti, fann so mangé enba. Bann zenfant commence laguerre. (Proverbes 22:15) Resultat? Mem si bann parent finn bien organise zot, sa pa passe toujours couma zot oulé. Pourtant, la plupart du temps, la famille reussi rente la Salle du Royaume avant reunion commencé. Li encourageant pou trouve zot là, semaine apré semaine, l’année apré l’année, a mesure ki bann zenfant pé grandi pou servi Jéhovah!
3. Couma nou koné ki bann famille ena enn grand valeur pou Jéhovah?
3 Mem si parfois li pa facile, li kapav mem bien fatigant pou rempli ou responsabilité en tant ki parent, mais ou kapav sur ki Jéhovah apprecié beaucoup ou zeffort. Jéhovah, Li-mem ki’nn crée la famille. So Parole dire ki chaque famille “doit so nom,” setadir so l’existence, a Jéhovah. (Éphésiens 3:14, 15) Alors, si ou, parent, ou faire zeffort pou bien rempli bann responsabilité ki ou ena dan ou famille, ou pé donne l’honneur Grand Createur l’univers. (1 Corinthiens 10:31) Eski c’est pa enn grand privilege sa? Li bon alors ki nou examine responsabilité ki Jéhovah finn donne bann parent. Dan sa lartik-la, nou pou guette responsabilité ki bann parent ena pou donne zot famille seki li bizin. Anou examine trois fason couma Bondié attann ki bann parent faire sa.
Lor plan materiel
4. Dan la famille, ki bann disposition Jéhovah inn prend pou ki bann zenfant gagne seki zot bizin?
4 L’apotre Paul ti ecrire: “Vrai-mem si kikenn pa donne so famille seki li bizin, ek surtout bann membre so famille ki dan so lakaz, li’nn renié la foi ek li pire ki enn dimoune ki pena la foi.” (1 Timothée 5:8) Kan Paul ti dire “enn kikenn,” kisannla li ti pé pensé? Li ti pé koz lor chef la famille, en general enn papa. Bondié donne enn femme aussi enn role important pou aide so mari. (Genèse 2:18) Dan lepok biblik, souvent bann femme ti aide zot mari pou donne la famille seki li ti bizin. (Proverbes 31:13, 14, 16) Zordi, li pé vinn bien commun ki enn parent elevé so zenfant li tousel. Beaucoup parent chrétien ki dan sa situation-la pé faire enn bon travail pou donne zot famille seki bizin. Bien-sur, si possible, li bon ki dan enn famille ena toulé-deux parent, avek enn papa ki prend la-tête.
5, 6. (a) Ki certain difficulté bann ki pé rod donne zot famille seki li bizin lor plan materiel, gagné? (b) Ki l’attitude envers travail, pou aide enn chrétien contigne rempli so responsabilité?
5 Dan 1 Timothée 5:8, kan Paul ti dire ki enn kikenn bizin donne so famille seki li bizin, ki li ti oulé dire par la? Dapré contexte, li ti pé koz surtout lor seki enn famille bizin lor plan materiel. Dan le monde zordi, enn chef famille bizin faire face ar beaucoup difficulté pou li kapav donne so famille bann kitsoz materiel. Partout dan le monde, ena dimoune ki perdi travail, ena bann difficulté economik, chomage, ek coût la vie finn augmenté. Couma eski enn parent kapav contigne faire face ar sa qualité problem-la?
6 Enn parent bizin rappel ki li pé rempli enn responsabilité ki Jéhovah finn donne li. Dapré Paul, enn dimoune ki kapav obeir sa commandement-la, mais ki refuse pou faire sa, li pareil couma enn dimoune ki finn “renié la foi.” Enn chrétien pou faire tou seki li kapav pou pena sa reputation-la devant Bondié. Malheureusement, beaucoup dimoune dan le monde zordi, zot ‘pena l’affection naturel.’ (2 Timothée 3:1, 3) Oui, ena beaucoup papa ki sauve zot responsabilité, ek laisse zot famille dan enn situation difficile. Bann mari chrétien pena sa l’attitude insensible ek negligent-la envers zot responsabilité. Zot pa couma beaucoup parmi zot bann collegue travail, parski zot considere mem bann travail ki bien ordinaire, couma enn kitsoz ki important, couma enn kitsoz ki faire Jéhovah plaisir, parski sa permette zot pou donne zot famille seki li bizin.
7. Kifer li bon ki bann parent reflechi lor l’exemple Jésus?
7 Si bann chef famille reflechi lor l’exemple parfait Jésus, sa aussi kapav aide zot. Rappel ki, dan enn fason prophetik, la Bible koz lor Jésus couma nou “Papa eternel.” (Isaïe 9:6, 7) Jésus, en tant ki “dernier Adam,” remplace “premier zom Adam” couma papa bann dimoune ki ena la foi. (1 Corinthiens 15:45) Jésus, li enn papa ideal, li pa couma Adam, ki ti egoïste ek ki ti guette zis so prop l’interet. Guette ki la Bible dire lor li: “Par la, nou finn aprann pou konn l’amour, parski li finn livré so nâme pou nou.” (1 Jean 3:16) Oui, sans hesité Jésus finn donne so prop la-vie pou lezot dimoune. Mais toulé-jour aussi, mem dan bann domaine moins important, li ti disposé pou faire l’interet lezot passe avant so prop l’interet. Parent, si ou imite sa l’esprit sacrifice-la, ou ek ou famille pou tire bann grand profit.
8, 9. (a) Ki bann parent kapav aprann par la fason ki bann zoiseau nourri zot ti zoiseau? (b) Couma eski beaucoup parent chrétien pé manifesté enn l’esprit sacrifice?
8 Bann parent kapav aprann beaucoup lor vrai l’amour par seki Jésus ti dire peuple Bondié, ki ti enn peuple difficile. Li ti dire zot: “Comié fois mo ti envie rassemblé to bann zenfant, pareil couma enn mama poule rassemblé so bann ti poule, enba so lezel!” (Matthieu 23:37) Ici, Jésus ti prend l’exemple enn mama poule ki protege so bann ti poule enba so lezel. Bann parent kapav aprann beaucoup ar enn zoiseau ki, par instinct, mette so la-vie en danger pou protege so bann ti zoiseau. Li extraordinaire aussi pou guette seki bann zoiseau faire toulé-jour. Zot pa arrete envolé pou al rod mangé, ek zot allé-vini kot zot nique pou nourri zot bann ti zoiseau. Mem si zot bien fatigué, zot vinn mette mangé dan la bec grand ouvert zot bann ti zoiseau, ki souvent pé rod toujours encore mangé. Par fason ki zot prend soin zot bann tipti, beaucoup creature Jéhovah, montré ki zot “sage par instinct.”—Proverbes 30:24.
9 Li pareil aussi pou bann parent chrétien. Partout dan le monde, zot pé manifesté enn grand l’esprit sacrifice. Ou pou prefere souffert ou, plutot ki ou laisse ou bann zenfant souffert. En plus, ou disposé pou faire sacrifice toulé-jour pou donne ou famille seki li bizin. Beaucoup parmi zot bizin leve bonne-heure gramatin pou al faire enn travail ki fatigant ou ki pa interessant. Ou travail dur pou mette mangé lor la table. Ou faire tou pou ki ou zenfant gagne linge prop, enn place convenable pou vive, ek enn bon l’education. Ek ou contigne faire zeffort jour apré jour, l’année apré l’année. Ou kapav sur ki ou bann sacrifice ek ou l’endurance, faire Jéhovah plaisir! (Hébreux 13:16) Mais en mem temps, ou pa blié ki ena bann kitsoz pli important encore ki ou bizin faire pou donne ou famille seki li bizin.
Lor plan spirituel
10, 11. Ki kitsoz pli important bann dimoune bizin, ek ki bann parent bizin faire premierement pou ki zot kapav donne sa zot zenfant?
10 Li bien ki ou donne ou famille seki li bizin lor plan materiel, mais li pli important encore ki ou donne li seki li bizin lor plan spirituel. Jésus ti dire: “Enn kikenn bizin vive, pa zis avek di-pain, mais avek tou parole ki sorti dan la bouche Jéhovah.” (Matthieu 4:4; 5:3) Parent, ki ou kapav faire pou donne ou famille seki li bizin lor plan spirituel?
11 Kan koz lor sa sujet-la, enn passage la Bible ki souvent cité, c’est Deutéronome 6:5-7. S’il vous plait, ouvert ou la-Bible ek lire sa bann verset-la. Ou pou remarké ki premierement, bann parent encouragé pou ena zot-mem enn bon spiritualité, pou developpe l’amour pou Jéhovah ek pou mette en pratik seki Li dire. Oui, ou bizin serieux dan ou l’etude la Bible, ou bizin lire li regulierement ek medite lor la. Lerla ou pou vrai-mem comprend ek content fason ki Jéhovah agir, so bann principe ek so bann la-loi. Coumsa, ou leker pou rempli ar bann kitsoz interessant ki sorti dan la Bible, ek sa pou faire ou ressenti la joie, ek ena respé ek l’amour pou Jéhovah. Ou pou ena enn quantité bon kitsoz pou partage avek ou bann zenfant.—Luc 6:45.
12. Couma bann parent kapav imite l’exemple Jésus pou faire l’enseignement la Bible rente dan la tête zot bann zenfant?
12 Bann parent ki fort lor plan spirituel, zot bien preparé pou applik conseil ki trouve dan Deutéronome 6:7, setadir pou faire ‘rente bann parole Jéhovah dan la tête’ zot zenfant. Zot bizin rod tou l’occasion pou faire sa. Sa l’expression ‘faire rente dan la tête-la’ vedir enseigné ek gravé par repetition. Jéhovah konn bien ki nou tou—surtout bann zenfant—fodé repete nou enn kitsoz souvent, pou ki nou kapav rappel li. C’est pou sa ki Jésus ti servi repetition dan so ministere. Par exemple, kan li ti enseigne so bann disciple l’importance pou ena l’humilité au lieu zot arrogant ek faire competition, li ti trouve plusieurs fason pou repete mem principe: li ti raisonne avek zot, li ti donne zot bann l’exemple, ek li ti mem faire enn demonstration lor la. (Matthieu 18:1-4; 20:25-27; Jean 13:12-15) Mais, jamais Jésus pa ti mank patience. Bann parent aussi bizin trouve different fason pou enseigne zot zenfant bann principe de base ki ena dan la Bible. Zot bizin ena patience pou repete bann principe Jéhovah ziska ki bann zenfant comprend bien ek applik sa dan zot la-vie.
13, 14. Cite certain l’occasion kot bann parent kapav koz ar zot zenfant lor bann l’enseignement ki ena dan la Bible, ek ki livre zot kapav servi?
13 L’etude en famille donne bann bon l’occasion pou enseigne sa bann principe-la. Oui, enn l’etude la Bible en famille ki faire regulierement, ki encourageant, kot ena enn bon l’ambiance, sa-mem la clé pou ena enn bon spiritualité dan la famille. Partout dan le monde, bann famille chrétien ena la joie pou faire bann l’etude coumsa. Zot servi bann livre ki l’organisation Jéhovah donne zot ek zot adapté l’etude dapré besoin zot bann zenfant. Deux joli cadeau ki zot inn gagné pou aide zot, c’est livre Écoute le grand Enseignant ek livre Les jeunes s’interrogent—Réponses pratiques.a Seulement, c’est pa zis dan l’etude en famille ki kapav enseigne bann zenfant.
14 Couma nou trouvé dan Deutéronome 6:7, ena beaucoup l’occasion kot ou kapav koz bann kitsoz spirituel avek ou bann zenfant. Kan zot pé voyagé ensam, kan zot pé faire l’ouvrage ensam, ou-soit dan zot moment detente, ou kapav rod bann moyen pou donne ou zenfant seki li bizin lor plan spirituel. Bien-sur, ou pa bizin a chaque fois faire enn “discours” avek ou zenfant lor l’enseignement la Bible. Mais, essaye ena bann conversation encourageant ek spirituel dan la famille. Par exemple, dan Réveillez-vous ! ena beaucoup lartik lor plusieurs sujet. Ou kapav servi sa bann lartik-la pou koz lor bann zanimo ki Jéhovah inn crée, lor bann joli l’endroit naturel ki ena dan le monde, ek lor different culture ek fason vive bann dimoune. Sa bann conversation-la kapav pousse bann jeune pou lire plus bann publication ki l’esclave fidel ek avisé donne nou.—Matthieu 24:45-47.
15. Couma bann parent kapav aide zot zenfant pou considere predication couma enn l’activité interessant, ki donne nou satisfaction?
15 Kan ou ena bann conversation encourageant avek ou bann zenfant, sa pou permette ou donne zot enn lot kitsoz lor plan spirituel. Bann zenfant chrétien bizin aprann pou partage zot la-foi avek lezot dimoune dan enn fason efficace. Kan ou koz lor bann lartik interessant ki ena dan La Tour de Garde ou-soit dan Réveillez-vous !, maziné couma ou kapav montré ou zenfant pou partage sa avek bann dimoune dan predication. Par exemple ou kapav demann zot: “Eski li pa ti pou bon si pli beaucoup dimoune ti konn sa lor Jéhovah? Couma zot pensé nou kapav faire enn kikenn interessé ar sa sujet-la?” Bann conversation coumsa kapav donne bann jeune plus envie pou partage avek lezot seki zot pé aprann. Lerla, kan zot accompagne ou dan predication, zot pou trouvé couma ou-mem ou mette en pratik seki ou dire, ek ou pou donne zot enn bon l’exemple. Zot kapav aprann aussi ki travail predication, li bien interessant ek ki nou gagne beaucoup la-joie ek enn grand satisfaction dan sa l’activité-la.—Actes 20:35.
16. Ki bann zenfant kapav aprann kan zot ecoute la-priere zot parent?
16 Bann parent aide aussi zot zenfant lor plan spirituel kan zot prié ensam avek zot. Jésus ti montré so bann disciple couma prié, ek li ti prié avek zot dan beaucoup l’occasion. (Luc 11:1-13) Maziné ki quantité kitsoz zot ti aprann kan zot ti prié ensam avek Garson Jéhovah! Li pareil aussi pou ou bann zenfant, zot kapav aprann beaucoup ar bann la-priere ki ou faire. Par exemple, zot kapav aprann ki Jéhovah envie ki nou franc ek sincere kan nou koz ar Li, ek kan nou confié Li n’importe ki problem nou ena. Oui, ou la-priere kapav aide ou zenfant pou aprann enn kitsoz spirituel important: zot kapav ena enn relation personnel avek zot Createur.—1 Pierre 5:7.
Lor plan affectif
17, 18. (a) Couma la Bible montré l’importance pou montré l’amour envers bann zenfant? (b) Couma bann papa bizin imite Jéhovah, ek exprime zot l’amour pou zot bann zenfant?
17 Bien-sur, bann zenfant ressenti aussi enn grand besoin lor plan affectif. Parole Bondié montré ki quantité li important ki bann parent donne zot zenfant seki zot bizin dan sa domaine-la. Par exemple, bann jeune femme encouragé “pou content zot zenfant.” Kan zot faire sa, bann jeune mama pou ‘revinn a la raison,’ ou bien pou ‘ena bon sens.’ (Tite 2:4, note) Oui, li bien important pou montré enn zenfant ki ou content li. Sa pou montré li pou content lezot li aussi, ek sa pou faire li gagne bann bienfait toute-long so la-vie. Parkont, enn dimoune ki pa montré so zenfant l’affection, c’est enn dimoune ki pena bon sens, parski sa faire zenfant-la bien souffert. En plus, sa montré ki li pa pé imite Jéhovah, ki finn ena enn grand l’amour pou nou, malgré nou l’imperfection.—Psaume 103:8-14.
18 Jéhovah finn mem faire premier pas pou content so bann zenfant lor la terre. Dan 1 Jean 4:19, nou lire: “Li finn content nou en premier.” Surtout ou, papa, ou bizin imite l’exemple Jéhovah. C’est ou en premier ki bizin faire en sorte ki ena enn l’attachement basé lor l’amour entre ou ek ou bann zenfant. La Bible encourage bann papa pou pa agace zot zenfant pou “ki zot pa decouragé.” (Colossiens 3:21) Pena kitsoz ki kapav plus agace enn zenfant ki l’impression ki so parent pa content li, ou ki li pena valeur pou zot. Bann papa ki pa content montré zot sentiment bizin rappel l’exemple Jéhovah. Jéhovah ti mem koz depuis le ciel pou dire ki Li accepté ek ki Li content so Garson. (Matthieu 3:17; 17:5) Sa ti surement bien encourage Jésus! Li pareil aussi pou bann zenfant. Kan bann parent exprime zot l’amour avek sincerité, ek montré ki zot apprecié zot bann zenfant, sa donne sa bann zenfant-la, la force ek courage.
19. Kifer la discipline li important, ek ki l’equilibre bann parent chrétien faire zeffort pou trouvé?
19 Bien-sur, c’est pa zis par parole ki bann parent bizin exprime zot l’amour pou zot zenfant. Zot montré l’amour surtout par bann action. Bann parent montré zot l’amour kan zot donne zot zenfant seki zot bizin lor plan materiel ek spirituel, surtout kan zot montré ki c’est l’amour ki pousse zot pou faire sa. En plus, enn fason important pou montré zot l’amour, c’est kan zot discipline zot zenfant. La Bible dire ki “Jéhovah discipline bann ki Li content.” (Hébreux 12:6) Parkont, si bann parent pa discipline zot zenfant, c’est coumadir zot ena la haine pou sa bann zenfant-la! (Proverbes 13:24) Jéhovah garde toujours enn bon l’equilibre kan Li discipline dan “enn fason juste.” (Jérémie 46:28) Li pa toujours facile pou bann parent imparfait garde sa l’equilibre-la. Mais li vaut la peine ki ou faire zeffort pou trouve sa. Enn discipline ferme, ki ou donné avek amour, pou aide ou zenfant pou amenn enn la-vie heureux kan li vinn grand, enn la-vie ki pou donne li satisfaction. (Proverbes 22:6) C’est pa sa-mem ki chaque parent chrétien envie pou so zenfant?
20. Couma bann parent kapav donne zot zenfant possibilité pou “choisir la vie”?
20 Kan ou, parent, ou faire sa travail important ki Jéhovah finn donne ou-la, setadir pou donne ou bann zenfant seki zot bizin lor plan materiel, spirituel ek affectif, ou pou gagne enn grand recompense. Ou pé donne ou bann zenfant possibilité pou “choisir la vie,” ek apré pou “contigne vive.” (Deutéronome 30:19) Kan bann zenfant grandi ek decide pou servi Jéhovah ek pou reste lor chemin ki amenn vers la vie, sa faire zot parent bien content. (Psaume 127:3-5) Sa la-joie ki bann parent ena-la, pou reste pou touletan! Mais couma bann jeune kapav donne l’honneur Jéhovah depuis asterla-mem? Nou pou discute sa dan prochain lartik.
[Note]
a Publié par bann Témoins de Jéhovah.
Couma ou pou reponn?
Couma bann parent kapav donne zot zenfant seki zot bizin lor plan
• materiel?
• spirituel?
• affectif?
[Zimage, page 12]
Beaucoup zoiseau travail dur pou nourri zot bann ti zoiseau
[Zimage, page 14]
Bann parent bizin premierement ena zot-mem enn bon spiritualité
[Zimage, page 15]
Bann parent kapav trouve beaucoup l’occasion pou enseigne zot zenfant lor nou Createur
[Zimage, page 16]
Kan bann zenfant senti ki zot parent apprecié zot, sa donne zot la force ek courage