Ogmant U Lazwa dan Predikasyon
1 Eski u pe konn lazwa pu partaz labonn nuvel, dan u minister? Si nu pa fer atansyon, sa move lemond otur nu la kapav fer nu vinn timid pu prese, ek fer nu perdi nu lazwa. Travay dan teritwar kot dimunn pa pran kont nu mesaz, sa usi kapav bes nu moral. Ki bann kitsoz pratik nu kapav fer pu ogmant nu lazwa dan predikasyon?
2 Res Pozitif: Si nu ena enn latitid pozitif, sa pu ed nu. Enn fason pu fer sa, se kan nu medit lor nu gran privilez pu vinn “bann ki travay ansam avek Bondye.” (1 Kor. 3:9) Zezi usi avek nu pu fer sa travay la. (Mat. 28:20) Li sutenir nu avek enn larme anz. (Mat. 13:41, 49) Alor, nu kapav gayn lasirans ki Bondye pe diriz nu bann zefor. (Rev. 14:6, 7) Donk, mem ninport ki fason sertin dimunn reazir kan nu akonpli nu travay, dan lesyel ena enn gran lazwa!
3 Prepar Byin: Enn bon preparasyon usi fer nu gayn lazwa. Prepar nu pu minister pa demann enn gran travay. Li pran zis detrwa minit pu egzaminn enn pwin lor ki nu pu koze dan bann peryodik ki fek gayne uswa liv ki pe prezante sa mwa la. Swazir enn prezantasyon dan “Kuma Pu Prezant Bann Peryodik,” dan Nu Minister DiRwayom. Get sipleman “Bann Sigzesyon pu Predikasyon,” dan Nu Minister DiRwayom Zanvye 2002 uswa get liv Comment raisonner pu enn lintrodiksyon efikas. Si u pa kapav reponn enn obzeksyon ki bann dimunn suvan suleve, prepar enn repons ki pran an konsiderasyon zot remark ek atir zot latansyon lor enn size ki pu interes zot. Liv Comment raisonner li enn gran led pu fer sa. Si nu servi sa bann led la, nu pu gayn konfyans ki nu bizin pu prese avek lazwa.
4 Priye Sinserman: Lapriyer byin inportan pu konn enn lazwa dirab. Pwiski nu pe fer travay Zeova, nu bizin sipliy Li pu gayn so lespri, ek lazwa, li enn parmi so bann frwi. (Gal. 5:22) Zeova pu donn nu lafors pu kontiyn prese. (Fil. 4:13) Kan nu priye pu nu minister, sa kapav ed nu pu gard enn bon letadespri kan nu gayn bann move lexperyans. (Akt 13:52; 1 Pyer 4:13, 14) Si nu mank lasirans, lapriyer kapav ed nu pu kontiyne avek kuraz ek lazwa.—Akt 4:31.
5 Kre Bann Lokazyon: Byinsir, nu minister donn nu plis lazwa kan nu kapav truv bann dimunn ek donn zot temwaynaz. Si u sanz u program pu al lakaz-lakaz ek met li enn lot ler, kitfwa pli tar dan lapremidi, sa kapav donn bann bon rezilta. U zwenn bann dimunn sak fwa u marse lor lari, kan u al fer shopping, kan u pran bis uswa kan u mars-marse. Kifer eski u pa prepar enn ti prezantasyon pu kumans konversasyon ek fer premye pa pu apros bann ki paret amikal? Kitfwa u travay uswa u al lekol, kot tulezur u gayn bann konversasyon avek lezot. U kapav gayn lokazyon pu donn temwaynaz sinpleman kan u sulev enn size lor Labib ki pu interes bann dimunn. Nu pu gayn bann sigzesyon dan premye paz sipleman Nu Minister DiRwayom Zanvye 2002. Ninport lekel sa bann zefor la kapav fer buku pu ogmant kantite lazwa ki nu gayne dan predikasyon.
6 Pwiski lazwa ed nu pu andire, li vremem byin inportan pu nu gard li. Si nu fer sa, nu pu gayn enn gran rekonpans kan sa travay ki zame pu refer ankor la, pu termine. Sa lespwar la, dan limem li kapav ogmant nu lazwa dan predikasyon.—Mat. 25:21.