“Servi Zeova dan Lazwa”
1. Ki kitsoz ki donn bann serviter Zeova buku lazwa?
1 Lapot Pol ti ekrir: “Rezwir zot tuzur dan le Senyer. Ankor enn fwa mo pu dir, Rezwir zot!” (Fil. 4:4) Nu ena privilez pu partaz la bonn nuvel ek pu ed bann dimunn ki sinser pu ador Zeova. Sa privilez-la donn nu buku lazwa. (Lik 10:17; Akt 15:3; 1 Tes. 2:19) Me, si nu truve ki parfwa nu perdi enn tipe lazwa dan nu minister, ki nu kapav fer?
2. Si tuletan nu rapel kisannla ki finn konfye nu travay predikasyon, kuma sa kapav fer nu gard nu lazwa?
2 Se Bondye Ki’nn Konfye Nu Sa Travay-La: Pa bliye ki se Zeova ki’nn donn nu sa misyon pu prese-la. Wi, li enn gran privilez pu travay kuma “bann konpaynon travay Bondye” kan nu proklam mesaz Rwayom ek nu fer bann disip! (1 Kor. 3:9) Zezi Kris avek nu dan sa travay ki zame pa pu refer ankor. (Mat. 28:18-20) Bann anz usi pe partisip dan enn fason aktif dan sa rekolt spirityel nu lepok-la. (Akt 8:26; Rev. 14:6) Labib, ek bann lexperyans ki lepep Bondye pe viv, montre san okenn dut, ki Zeova pe sutenir sa travay-la. Alor, kan nu al prese, nu “kuma [bann dimunn] ki Bondye inn anvoye, [ek ki] anba regar Bondye, ansam avek Kris.” (2 Kor. 2:17) Sa, li enn pli gran rezon ankor pu nu rezwir, pa vre?
3. Kuma lapriyer kapav ed nu gard lazwa dan nu servis?
3 Lapriyer byin inportan pu ed nu gard nu lazwa dan servis Bondye. (Gal. 5:22) San lafors Bondye, nu pa pu kapav fer so travay. Donk, nu bizin sipliye Li pu demann Li so lespri. Ek Li pu donn nu sa avek bonker. (Lik 11:13; 2 Kor. 4:1, 7; Efe. 6:18-20) Kan nu priye konsernan nu minister, sa pu ed nu gard enn bon latitid kan nu zwenn bann dimunn ki pa ekut nu. Lapriyer pu permet nu kontiyn prese avek kuraz ek lazwa.—Akt 4:29-31; 5:40-42; 13:50-52.
4. Kuma enn bon preparasyon ed nu pu ogmant nu lazwa dan predikasyon? Sit detrwa fason kuma nu kapav prepar nu.
4 Enn Bon Preparasyon: Prepar nu byin, se enn fason pratik pu ogmant nu lazwa kan nu partisip dan la predikasyon. (1 Pyer 3:15) Sa kalite preparasyon-la pa neseserman pran enn ta letan. Li pran nu zis detrwa minit pu reget bann prezantasyon peryodik ki ena dan Nu Minister DiRwayom, uswa pu prepar enn prezantasyon apropriye pu piblikasyon ki nu pu ofer. Pu truv enn introdiksyon apropriye, u kapav get liv Comment raisonner, uswa bann ansyin nimero Nu Minister DiRwayom. Sertin proklamater truv sa byin itil pu ekrir enn ti prezantasyon lor enn ti but papye prop. Detanzantan, zot zet enn ti kudey lor papye-la pu zot rafresi zot memwar. Sa ed zot pu sirmont zot trak ek donn zot lasirans ki zot bizin pu pres avek kuraz.
5. Kuma eski lazwa profitab pu nu ek pu lezot?
5 Lazwa fer nu konn enn kantite lezot byinfe. Kan nu zwaye, sa atir lezot ver nu mesaz. Lazwa donn nu lafors pu andire. (Nee. 8:10; Ebre 12:2) Pli inportan, kan nu servi Zeova dan lazwa, sa glorifye Li. Alor, anu “servi Zeova dan lazwa.”—Psom 100:2.