Predikasyon Rwayom Ed Nu pu Sap Bann Lavi!
1 Sa mem travay pli inportan ki pe fer dan lemond asterla. Bondye Zeova, Zezi Kris, ek bann milyar anz, finn fixe zot latansyon lor la. Ki ete sa travay la, ek kifer eski li inportan? Sa travay la se predikasyon Rwayom, ek li ed nu pu sap lavi bann dimunn!—Rom. 1:16; 10:13, 14.
2 Ena dimunn panse ki nu ti pu kapav ed lezot dan enn meyer fason si nu ti sey amelyor lemond ki otur nu. Buku dimunn zot okipe avek bann zefor pu gayn lape, pu geri bann maladi uswa pu amelyor lekonomi. Me ki pu ed dimunn plis?
3 Enn Travay Extraordiner: Zis mesaz Rwayom ki explike pu ki rezon nu pe viv, kifer dimunn pe sufer ek ki sel lespwar ena pu lavenir. Labonn nuvel permet dimunn vinn bann kamarad Zeova ek kumsa gayn “lape Bondye ki depas tu bann panse.” (Fil. 4:7) Zis mesaz Rwayom ki donn direksyon pratik pu ed lezot pu fer fas ar bann problem lavi asterla ek explike kuma pu sape kan sa move lemond la pu detrir byinto. (1 Zan 2:17) Eski sa pa vo tu bann zefor ki nu kapav fer dan predikasyon Rwayom?
4 Par egzanp: Ki ti pu meyer fason pu ed bann abitan enn vilaz ki pe dormi alor ki zot menase par enn baraz delo ki pre pu defonse? Ki pu fer? Devid delo seo par seo deryer sa baraz delo ki pa pu tini lontan la? Aranz sa vilaz kondane la ek fer li vinn pli zoli? Non! Bizin lev bann abitan la, donn zot warning ki enn katastrof pe menas zot, ek ed zot pu sove! Bann ki pe dormi lor plan spirityel zordi, zot dan enn grav danze. (Lik 21:34-36) Parski sa sistem la pe al detrir, anu fer zefor pu prese avek maximem dimunn ki nu kapav ek tuzur rapel ki letan byin prese!—2 Tim. 4:2; 2 Pyer 3:11, 12.
5 Persiste dan Sa Travay La: Anu rod bann fason ki kapav permet nu zwenn plis dimunn ki sinser ar labonn nuvel—kot zot, dan lari, par telefonn ek dan bann lezot plas. Travay ki Zeova finn donn nu li travay pli inportan ki nu kapav fer. Si nu fer li avek zel, nu ‘pu sap numem ek bann ki ekut nu.’—1 Tim. 4:16.