Bann Lazwa Ki Gayne dan Servis Aplintan
1 Antan ki zenn, sirman u finn pans inpe u lavenir. Proverb 21:5 dir nu ki “bann plan sa kikenn ki aplik li byin la donn enn lavantaz.” Li pu dan u lavantaz pu pans serye-serye u bann lobzektif dan lavi. Letan u fer u bann plan pu lavenir, pran an konsiderasyon servis aplintan. Kifer?
2 Demann detrwa adilt ki’nn fer pyonye kan zot ti zenn ki zot linpresyon ek sirman zot tu pu dir mem zafer: “Sa lepok la ti bann meyer lane mo lavi!” Enn frer ki ti’nn gut bann lazwa servis aplintan depi so zenes finn dir plitar: “Kan mo vire pu get mo lepok zenes, mo resanti enn gran satisfaksyon ek mo kapav dir ki mo’nn ekut sa konsey saz la: ‘Rapel to Gran Kreater, asterla, dan bann zur to adolesans.’” (Ekl. 12:1) Pu u konn sa satisfaksyon la, u ek u bann paran bizin pran bann dispozisyon asterla mem pu fer enn fason ki u kapav konn sa kalite lazwa la dan u zenes.
3 Paran, Ankuraz Zot pu Fer Servis Aplintan: Zeova, ki kuma enn Papa ki ranpli ar lafeksyon, montre u egzakteman ki semin bizin pran. (Izai 30:21) Par sa direksyon ranpli ar lamur ki Li’nn donn nu la, Li les enn bon legzanp pu u, paran Kretyin. Olye ki u les u bann zanfan swazire ki semin pli bon pu zot, avek sazes form zot dan semin kot zot bizin ale pu ki zot gayn benediksyon Zeova. Lerla, kan zot vinn pli gran, u formasyon pu ed zot pu “fer diferans ant seki bon ek seki move.” (Ebre 5:14) Bann adilt kone par lexperyans ki zot pa kapav fer konfyans zot prop zizman; zot bizin kont lor Zeova pu fer zot semin vinn drwat. (Pro. 3:5, 6) Alor, bann zenn zot, zot bizin plis kont lor Zeova parski zot ena mwins lexperyans dan lavi.
4 Paran, amezir ki u zanfan pe apros adolesans, uswa mem pli boner, koz avek zot lor zot karyer dan enn fason realis. Bann konseye dan lekol, bann profeser ek bann kamarad lekol pu sey inflyans zot pu swazir enn karyer materyalis dan sa lemond la. Ed u bann zanfan pu swazir bann size dan lekol ki donn enn formasyon pratik, ki pu kalifye zot pu gayn zot lavi san ki zot sakrifye bann lintere Rwayom. (1 Tim. 6:6-11) Dan buku ka, ledikasyon segonder avek enn formasyon profesyonel kapav ase pu enn kikenn gayn bann kitsoz neseser pu lavi kan li kumans fer pyonye permanan.
5 Ankuraz bann zenn pu servi sa kado ki apel lavi selibater la. Si plitar zot desid pu marye, zot pu pli pare pu asim bann pli gran responsabilite dan maryaz. (Get lartik “Zenn, Prepar Zot pu Servis Betel” ki dan sipleman Nu Minister DiRwayom Zin 2001, paragraf 15) Si dan enn fason pozitif nu koz lor servis pyonye, servi kot ena gran bezwin, servi dan Betel ek kuma misyoner, depi byin boner nu pu met dan leker bann zenn enn dezir pu amenn enn lavi ki fer Zeova plezir, ki profitab pu lezot ek ki donn zot lazwa.
6 Zenn, Donn Priorite Servis Aplintan: Zenn, u pena pu kas latet pu u kone ki ete servis pyonye. U kapav sey fer li part-time kan u fer pyonye oxilyer ninport kan li posib pandan lane ek kan u an vakans. Lerla u pu kone ki kantite satisfaksyon ena dan servis pyonye! Eski u kapav fer plan depi asterla mem pu fer pyonye oxilyer pandan mwa Ut?
7 Si u enn zenn frer dan lorganizasyon Bondye, u bizin pans usi serye-serye pu sey kalifye u kuma enn serviter ministeryel. (1 Tim. 3:8-10, 12) Pa fini, deside si u anvi demann pu servi dan Betel uswa pu asiste Lekol Formasyon Ministeryel, enn fwa ki u’nn ariv laz ki bizin. U lexperyans dan servis pyonye pu anseyn u bann leson ki ena gran valer: u pu aprann viv dapre enn program, organiz u pli byin, viv byin avek lezot ek pran bann responsabilite pli byin. Tusala pu prepar u pu gayn bann pli gran privilez servis plitar.
8 Enn fakter inportan pu nu reysi dan servis aplintan se res aktif dan tu nu bann aktivite teokratik. Lapot Pol ti ankuraz pu ena sa mem kalite latitid la ek li ti atir latansyon lor bann benediksyon ki pu gayne: “Ninport ki zot fer, fer li avek tu zot nam kumadir pu Zeova, . . . parski zot kone ki se ar Zeova ki zot pu gayn rekonpans ki bizin.” (Kol. 3:23, 24) Nu swete ki Zeova beni u ek donn u buku lazwa dan servis aplintan!