“To kapav vinn enn bon pionnier!”
1. Ki sentiment enn soeur ti ena en rapport avek so service pionnier?
1 “Jamais mo pa ti pou kapav trouve enn lot l’activité ki ti pou donne moi autant satisfaction ou-soit ki ti pou faire moi gagne bann bienfait lor plan spirituel coumsa.” C’est seki soeur Kathe B. Palm ti dire. Sa soeur-la ti passe plusieurs dizaine l’année pou faire pionnier ek ti rann temoignage partout dan Chili, en Amérique du sud. Enn kikenn ki’nn pense lor satisfaction ki bann serviteur a plein temps gagné, kitfois finn deja dire ou: “To kapav vinn enn bon pionnier!”
2. Expliké kifer nou gagne enn grand satisfaction kan nou faire bann activité spirituel.
2 Enn fason vive ki faire gagne satisfaction: Nou modele, Jésus, ti gagne enn vrai l’encouragement pou faire volonté so Papa. (Jean 4:34) Alors Jésus ti bien sincere kan li ti enseigne so bann disciple ki zot ti pou kapav gagne vrai satisfaction kan zot prend part dan bann l’activité ki lié avek l’adoration pou Jéhovah. Nou satisfait kan nou la vie rempli ar bann travail ki Jéhovah approuvé. En plus, a mesure ki nou donne plus le temps, la force ek nou bann di-bien materiel pou aide lezot, nou la joie augmenté.—Actes 20:31, 35.
3. Ki la joie nou kapav gagné kan nou passe pli beaucoup le temps dan ministere?
3 Plus nou passe le temps dan ministere, plus nou pou gagne l’occasion pou konn la joie pou commence ek conduire bann l’etude la Bible. Mem si beaucoup dimoune parette pa interessé, kitfois nou fason pensé concernant nou territoire kapav changé ek nou kapav trouve li pli productif ki seki nou ti pensé avant. Nou pou trouve sa kan nou gagne plus l’experience ek capacité dan nou ministere. Bann ki faire plus ki enn an dan service pionnier kapav assisté Lekol pionnier ek servi sa l’enseignement bien riche ki zot pou gagné-la. (2 Tim. 2:15) A mesure ki nou perseveré, kitfois nou pé plante bann la grain la verité ki pou produire bann fruit plitar.—Eccl. 11:6.
4. Lor ki possibilité bann jeune ki pré pou fini lekol bizin reflechi?
4 Bann jeune: Alors ki ou pré pou fini lekol, eski ou finn bien reflechi lor ou l’avenir? Ziska asterla, ou bann devoir lekol inn bien influence ou programme. Couma ou pou rempli le temps ki ou pou ena apré ki ou quitte lekol? Au lieu ki ou al travail a plein temps dan le monde, kifer ou pa reflechi dan la priere lor l’objectif pou faire pionnier permanent? Bann capacité ki ou pou kapav aprann—rann temoignage ar bann dimoune different culture, surmonte bann difficulté personnel, aprann pou discipline ou-mem, ek developpe bann capacité pou enseigné—pou faire ou gagne bann bienfait toute longue ou la vie.
5. Couma bann parent ek la congregation kapav encourage service pionnier?
5 Parent, eski ou pé aide ou zenfant pou choisir service a plein temps? Ou bann parole ek ou l’exemple positif kapav faire beaucoup pou aide zot mette bann interet Royaume Bondié en premier dan zot la vie. (Mat. 6:33) Ray ti commence faire pionnier apré ki li ti fini college. Li raconté: “Mo mama ti toujours pensé ki service pionnier faire gagne pli grand satisfaction dan la vie.” Tou dimoune dan congregation kapav encourage lezot pou faire service pionnier par zot bann parole ek zot soutien. José, ki reste en Espagne, dire: “Mo congregation considere service pionnier couma meilleur carriere ki bann jeune kapav suive. Zot commentaire ek zot l’appreciation pou service pionnier ensam avek l’aide pratik ki zot ti donné, ti faire sa pli facile pou moi pou commence faire pionnier.”
6. Ki ou kapav faire si ou pena desir pou faire pionnier?
6 Surmonte bann difficulté: Mais ki ou kapav faire si ou dire: ‘Mo pa senti sa desir pou faire pionnier-la’? Si c’est sa ki ou finn ressenti en premier, prié Jéhovah concernant seki ou ressenti ek dire Li: ‘Mo pa koné si service pionnier inn faire pou moi, mais mo envie faire toi plaisir.’ (Ps. 62:8; Prov. 23:26) Apré rod so direction dan so Parole ek avek so l’organisation. Beaucoup pionnier permanent finn d’abord ‘goute’ service pionnier auxiliaire, ek la joie ki zot finn gagné finn motive zot pou poursuive enn carriere dan service a plein temps.—Ps. 34:8.
7. Couma nou kapav surmonte bann doute ki nou kapav ena pou faire 70 heure toulé-mois?
7 Ki ou kapav faire si ou pa sur ki ou pou reussi faire 70 heure toulé-mois? Kitfois ou kapav demann bann pionnier ki dan mem situation ki ou. (Prov. 15:22) Apré faire different programme ki li possible pou ou appliké. Kitfois ou pou trouvé ki kan ou réacheté le temps ki ou passé pou faire bann kitsoz moins important, ek consacré sa dan ministere, sa pa aussi difficile ki ou ti croire.—Éph. 5:15, 16.
8. Kifer nou bizin réexamine de temps en temps nou situation?
8 Réguette ou situation: Nou situation personnel souvent changé. Li bon ki ou réexamine ou situation de temps en temps. Par exemple, eski ou pré pou arrete travail pou prend ou retraite? Randy, ki’nn prend so retraite boner, dire: “Sa decision-la finn permette moi faire pionnier permanent ensam avek mo madame, ek sa finn donne nou l’occasion pou demenagé pou al servi la kot bizin proclamateur. Pa kapav compté ki quantité benediction mo finn gagné parski mo finn prend sa decision-la, mais pli grand benediction ki mo finn gagné c’est enn bon conscience.”
9. Ki bann couple marié bizin examiné?
9 Certain couple, apré ki zot finn bien examine zot situation, finn trouvé ki li pa necessaire ki zot toulé-deux travail a plein temps. Li vrai ki sa kapav demann la famille simplifié zot la vie, mais c’est enn sacrifice ki vaut la peine. John, ki so madame inn fek kit so travail a plein temps pou augmente so ministere, raconté: “Pena nanyin ki faire moi senti-moi pli bien ki kan mo koné mo madame occupé dan service Jéhovah pendant la journée.”
10. Ki pousse bann chretien pou reflechi lor service pionnier?
10 Enn preuve l’amour ek la foi: Jéhovah finn faire predication vinn travail pli important ki n’importe kisannla parmi nou kapav faire. Sa vié systeme-la pou detruire bientot, ek zis bann ki pou invok nom Jéhovah ki pou sauvé. (Rom. 10:13) Enn leker ki rempli ar l’amour pou Li ek rempli ar reconnaissance pou seki Li’nn faire pou nou pou motive nou pou obeir l’ordre ki so Garson finn donné pou preche avek zele. (Mat. 28:19, 20; 1 Jean 5:3) En plus, la foi ki nou ena ki nou pé vive dan bann dernier jour pou pousse nou pou faire tou seki nou kapav dan ministere pendant ki nou ena encore le temps, au lieu ki nou profite sa le monde-la maximum possible.—1 Cor. 7:29-31.
11. Couma nou bizin considere enn dimoune ki dire nou ki nou kapav vinn enn bon pionnier?
11 Faire pionnier permanent, c’est pa zis faire plus l’heure dan predication; c’est enn fason ki nou montré nou l’attachement pou Bondié. Alors, si enn dimoune dire ou ki ou kapav vinn enn bon pionnier, considere sa couma enn compliment. Ek examine dan la priere possibilité pou joinde bann ki pé faire sa service ki donne zot satisfaction-la.
[L’encadré page 4]
Parent, eski ou pé aide ou zenfant pou choisir service a plein temps?
[L’encadré page 5]
Jéhovah finn faire predication vinn travail pli important ki n’importe kisannla parmi nou kapav faire.