Eski ou kapav rente par “enn grand la-porte pou l’activité”?
1. Ki “grand la-porte pou l’activité” ki ouvert devant nou?
1 Kan “enn grand la-porte pou l’activité” ti ouvert devant l’apotre Paul, c’est avek enn grand desir ki li ti saisi l’occasion pou contigne travail predication malgré ki li ti ena beaucoup opposant. (1 Cor. 16:9) Zordi ena apepré 642,000 proclamateur lor la terre ki finn rente par enn grand la-porte pou l’activité kan zot inn vinn pionnier permanent.
2. Kifer li bon ki nou examine nou situation de temps en temps?
2 Changement situation: Mem si asterla nou situation pa permette nou faire beaucoup dan nou l’activité, mais nou situation kapav changé. Alors, li bon ki nou examine nou prop situation de temps en temps ek pa attann kan tou marche bien pou faire plus dan nou l’activité. (Eccl. 11:4) Eski ou enn jeune ki pré pou fini college? Eski ou enn parent ki ou zenfant pré pou rente lekol? Eski ou pré pou prend ou retraite? Sa bann changement-la kapav donne ou plus lé-temps libre ek permette ou faire service pionnier permanent. Enn soeur ki ti gagne bann problem la santé finn decide pou vinn pionnier alors ki li ti ena 89 an. Kifer? Parski li pa ti’nn retourne l’hopital depuis plus ki enn an, li’nn senti ki so la-santé ti pou permette li faire pionnier.
3. Ki changement certain finn faire pou zot kapav faire pionnier permanent?
3 Paul li, au commencement li ti’nn decidé pou visite so bann frere dan Corinthe. Mais, li’nn modifié so bann plan a cause la bonne nouvelle. Zordi beaucoup pionnier permanent finn bizin faire bann changement pou kapav faire pionnier. Certain finn simplifié zot la-vie kan zot finn arrete travail a plein temps pou travail a mi-temps, parski sa assez pou couvert zot bann depense ki’nn diminué. Zot finn gagne la joie kan zot finn gagne privilege pou commence service pionnier. (1 Tim. 6:6-8) Certain couple finn faire bann changement dan zot la-vie. Zot finn decidé ki zis mari-la ki pou travail, pou ki so femme kapav faire pionnier.
4. Ki nou kapav faire si nou pa sur ki nou pou reussi gagne nou l’heure?
4 Pa pressé pou dire ki ou pa pou kapav faire pionnier permanent parski ou peur ki ou pa reussi gagne ou l’heure. Ou pou bizin faire zis enn tipé plus ki deux heure-temps par jour. Si ou pa sur ki ou kapav faire li, essaye faire pionnier auxiliaire enn ou deux mois, avek l’objectif pou faire 70 heure-temps. Sa pou permette ou goute la joie ki ena dan service pionnier. (Ps. 34:8) Koz avek bann ki deja pé faire pionnier. Kitfois zot finn bizin surmonte bann mem difficulté ki ou. (Prov. 15:22) Demann Jéhovah pou beni bann zeffort ki ou pé faire pou faire plus dan ou ministere.—1 Jean 5:14.
5. Kifer service pionnier permanent li enn l’activité ki vaut la peine?
5 Enn l’activité ki vaut la peine: Service pionnier permanent amenn beaucoup benediction. Sa permette ou konn sa pli grand la-joie ki gagné kan nou donne plus-la. (Actes 20:35) Service pionnier pou ameliore ou capacité pou servi Parole Bondié ki la verité, couma bizin. (2 Tim. 2:15) Ou pou gagne plus l’occasion pou trouve la main Jéhovah dan ou la-vie. (Actes 11:21; Phil. 4:11-13) Service pionnier pou aide ou aussi developpe bann qualité spirituel, couma l’endurance, ek pou faire ou vinn pli proche avek Jéhovah. (Jacq. 4:8) Eski ou kapav rente par sa grand la-porte pou l’activité-la ek vinn enn pionnier permanent?