C’est asterla le temps pou preché!
1. Kifer c’est asterla le temps pou preché?
1 “Ena la crainte pou Bondié ek donne Li la gloire.” Avek l’aide bann ange, sa message-la pé preché ar bann dimoune dan “tou nation, tribu, langue ek peuple.” Kifer? “Parski l’heure jugement [Bondié] inn arrivé.” Zordi, nou pé vive dan sa ‘l’heure jugement-la,’ ek sa pou fini par destruction sa system-la. Li bien important ki bann dimoune “adore sa Kikenn ki’nn crée le ciel, ek la terre, ek la mer ek bann la-source de l’eau.” Pena okenn lot travail ki pé faire zordi ki pli important ek ki pli urgent ki annonce sa ‘bon nouvel eternel-la.’ Oui, c’est asterla, le temps pou preché!—Rév. 14:6, 7.
2. Couma bann serviteur Jéhovah pé montré ki zot reconette ki pa reste beaucoup lé-temps avant la fin?
2 Pendant sa dix an ki’nn passé-la, bann serviteur Jéhovah finn passe apepré 12 milliard l’heure-temps pou preché ek pou faire bann disciple. Beaucoup finn faire bann changement dan zot la-vie pou ki zot kapav participe plus dan sa recolte spirituel-la. (Mat. 9:37, 38) Par exemple, l’année dernier, finn ena en moyenne plus ki 850,000 proclamateur ki ti pionnier chaque mois. Bann pionnier permanent bizin faire 70 heure-temps chaque mois ek bann pionnier auxiliaire, 50 heure-temps.
3. Ki bann changement souvent bann proclamateur bizin faire pou ki zot kapav faire service pionnier?
3 Ki ou bizin pou faire service pionnier?: Parski bann pionnier reconette ki “reste bien tigit lé-temps,” zot faire beaucoup zeffort pou garde zot la-vie simple. (1 Cor. 7:29, 31) Zot rod bann moyen pou diminué zot bann depense pou ki zot passe moins lé-temps dan enn travail profane. Par exemple, certain finn demenagé pou al reste dan enn pli tipti lakaz. Lezot finn debarrasse bann kitsoz ki zot ti ena, ek ki pa ti necessaire. (Mat. 6:19-21) Souvent, zot inn bizin laisse certain kitsoz ki zot ti envie faire. Zot faire tou sa avek l’objectif pou passe plus lé-temps ek donne plus l’attention zot ministere. (Éph. 5:15, 16) Beaucoup proclamateur finn reussi etabli enn program ki adapté ek ki permette zot faire pionnier, parski zot perseveré, zot ena enn l’esprit sacrifice, zot compte lor Jéhovah ek zot demann Li so l’aide dan la priere.
4. Ki bann kitsoz pratik kapav dirige ou vers service pionnier?
4 Eski ou kapav faire service pionnier? Kifer ou pa demann bann pionnier ki’nn reussi dan zot service, couma zot faire? Travail ensam avek zot dan predication, ek goutte la joie ki zot gagné. Etudié bann lartik dan nou bann publication ki koz lor service pionnier. Fixé bann l’objectif pou ou-mem ki kapav dirige ou vers service pionnier. Si asterla ena bann obstacle ki empeche ou faire service pionnier, koz sa avek Jéhovah dan la priere, ek demann Li so l’aide pou resoude sa bann problem-la.—Prov. 16:3.
5. Couma service pionnier aide nou pou ameliore nou bann capacité dan predication?
5 Bann benediction ek la joie: Kan nou faire service pionnier, sa ameliore nou capacité pou servi Parole Bondié, ek sa amenn beaucoup la-joie en retour. Enn jeune soeur pionnier finn dire: “C’est enn vrai benediction pou konn servi Parole Bondié couma bizin. Kan ou pionnier, ou servi la Bible tellement souvent. Asterla kan mo al preché, mo kapav pense bann verset ki adapté pou chaque dimoune ki mo joinde.”—2 Tim. 2:15.
6. Ki formation service pionnier kapav donne enn proclamateur?
6 Service pionnier enseigne nou aussi beaucoup lezot kitsoz ki kapav ameliore nou la-vie. Li kapav aide bann jeune pou aprann servi zot lé-temps couma bizin, pou vive dapré enn budget, ek pou reste bien avek bann dimoune. Beaucoup finn developpe enn vision pli spirituel lor la vie grace a zot service pionnier. (Éph. 4:13) En plus, souvent bann pionnier gagne l’occasion trouve la main Jéhovah dan zot la-vie.—Actes 11:21; Phil. 4:11-13.
7. Couma service pionnier aide nou pou vinn proche ar Jéhovah?
7 Kitfois enn parmi bann pli grand benediction service pionnier, c’est ki li aide nou pou vinn proche ar Jéhovah. Sa kapav aide nou pou reste ferme dan bann difficulté. Enn soeur ki’nn passe par enn period bien difficile, finn dire: “Sa relation intime ki mo finn developpé avek Jéhovah pendant mo service pionnier-la, finn aide moi pou faire face ar tou mo bann difficulté. Mo bien content ki mo finn passe mo la-vie adulte pou servi Jéhovah a plein temps. Sa finn permette moi offert mo-mem pou faire bann kitsoz ki jamais mo ti pensé mo pou kapav faire.” (Actes 20:35) Nou aussi nou kapav goutte sa bann benediction-la si nou faire tou nou possible dan predication la bonne nouvelle, enn travail ki bien important.—Prov. 10:22.