Pe Rasanble Bann Dimunn Tu Lang
1 Parol Bondye pe realize! Bann dimunn “tu lang, tu nasyon” pe aksepte vre relizyon. (Zek. 8:23) Kuma eski bann Temwin Zeova pe ed bann dimunn dan tu ‘nasyon, lepep, ek lang’ pu gayn enn pozisyon faver devan Zeova, avek lespwar pu pas vivan “gran detres”?—Rev. 7:9, 14.
2 Lorganizasyon Bondye Reazir: Kolez Santral finn fer laranzman pu ki nu kapav gayn bann piblikasyon dan apepre 380 lang. Kumsa partu lor later bann dimunn kapav byin konpran linportans labonn nuvel. Li enn gro travay pu prepar ek pu fer bann piblikasyon paret dan sa kantite lang la. Pu fer sa, bizin rasanble bann lekip tradikter kalifye ek donn zot led ki bizin pu tradir bann piblikasyon dan tu sa bann lang la. Nu bizin usi inprim sa bann piblikasyon la ek avoy zot dan bann kongregasyon. Me se bann proklamater Rwayom ki fer travay pli inportan. Se zot ki amenn sa mesaz Labib ki kapav sap lavi la kot bann dimunn.
3 Ki Nu Kapav Fer?: Asterla dan buku peyi ena enn kantite dimunn etranze. Pli ale bann serviter Bondye pe fer zefor pu aprann Sinwa, Ris, Espanyol uswa enn lot lang ki dimunn koze dan zot landrwa. Zot fer sa pu zot kapav arive partaz labonn nuvel avek sa bann dimunn la. Lezot pe aprann Langaz Siyn Amerikin. Dan États-Unis, ena anviron 2,900 kongregasyon ek 240 grup ki pres dan 38 lezot lang apart Angle. Ena dimunn ki avan zame pa ti tann koz lor Zeova uswa pa ti konn nanyin lor Labib, aster pe aksepte laverite Parol Bondye.—Rom. 15:21.
4 Eski nu kapav fer plis zefor pu anons labonn nuvel ar bann dimunn ki pa koz mem lang ki nu. (Kol. 1:25) Dan Moris nu ena par egzanp bann dimunn ki sorti an Chine, Madagascar, ek an Inde. Eski nu fer zefor pu pres ar sa bann dimunn la? Buku kongregasyon pe organiz predikasyon dan bann landrwa kot ena bann etranze. Bann proklamater bizin prepar enn ti prezantasyon an Angle ek an Franse. Kumsa, zot kapav fer enn sinp prezantasyon. Par egzanp: “Bonzur. Ala enn bon nuvel pu u. [Ofer enn trak uswa enn brosir ki disponib dan sa lang la.] Orevwar.” Sa li enn ti legzanp kuma pu kumanse. Ek Zeova vremem pe beni sa. Bann ki koz byin Angle ek Franse kapav usi etidye avek sa bann dimunn la. Lezot kapav servi brosir Une bonne nouvelle pour toutes les nations pu ed bann dimunn ki koz enn lang etranze dan nu teritwar.
5 Mesaz Rwayom atir bann dimunn tu kominote ek lang. Anu sezi tu lokazyon pu partaz sa mesaz la avek zot.