Tir Maximem Profi ar Lasanble Distrik “Bann Proklamater Rwayom Ki Zele”
1 Enn Program Ki Pus Nu pu Azir: Nu finn vremem gayn enn program ki pus nu pu azir dan lasanble distrik ki nu’nn fek asiste! Nu tu nu ti rasanble pu enn mem rezon, pu vinn bann proklamater ki plis ekipe pu pres Rwayom Bondye avek zel. Eski u rapel ki lexplikasyon premye orater ti done pu mo “proklame”? Eski u rapel ki resers diskur “Nu Pa Per Parski Nu Kone Ki Zeova Avek Nu” ti ankuraz nu pu fer? Li ti ankuraz nu pu egzaminn lavi enn serviter fidel. Eski depi sa, u’nn reysi fer li?
2 Diskur an trwa parti “Kalite Nu Lafwa Teste par Diferan Leprev” ti donn trwa rezon prinsipal kifer Zeova permet persekisyon. Eski u kapav explike ki sa trwa rezon la sa? Lor ki pasaz Labib bann Kretyin baz zot, pu zot pa pran par dan bann zafer lemond? Ki lankurazman nu ti gayne pu nu prepar nu, pu bann problem ki nu kapav gayne parski nu pa pran par dan bann zafer lemond? Kuma eski kan nu fidel dan bann leprev sa donn loner Zeova?
3 Ki senn dan dram “Tini Ferm dan Bann Sityasyon Difisil” ti sirtu fer nu lafwa vinn for? Kuma eski nu kapav vinn kuma Zeremi?
4 Diskur piblik “Senn Sa Lemond La Pe Sanze,” ti dekrir bann sanzman inportan ki pu ena ek ki pu amenn ziska gran zur Zeova. Ki sa bann sanzman la sa? Kan u ti ekut dernye diskur “Antan Ki Bann Proklamater Rwayom Ki Zele, Anu Fer Buku Bon Travay” kuma eski u finn aplik bann ranseynman u finn gayne dan u prop minister?
5 Bann Pwin Inportan Ki Nu Bizin Met an Pratik: Kuma ti explike dan diskur “Montre U Rekonesans,” kuma eski nu kapav montre enn rekonesans sinser pu Zeova? Dan diskur tem, “Mesaz Rwayom Pe Brile Kuma enn Dife dan Leker Bann Proklamater,” kuraz kisannla nu ankuraze pu imite? Ki legzamin personel nu ti ankuraze pu fer?
6 Diskur an trwa parti “Profesi Mika Fortifye Nu pu Mars Dapre Zeova,” ti atir latansyon lor trwa kondisyon ki nu bizin ranpli pu gayn faver Bondye. Ki sa trwa kondisyon la sa? Eski li posib ranpli sa bann kondisyon la? (Mika 6:8) Dapre diskur “Protez U Leker Pu U Gard enn Kondwit Prop,” dan ki fason nu bizin res prop lor plan moral? Dan ki domenn diskur “Protez U Kont Tronpri” ti met nu an gard pu ki lezot pa tronp nu ek nu pa tronp lezot?
7 Ki bann pwin pratik dan diskur an trwa parti “Bann Proklamater Rwayom Ki Apresye Valer Zot Minister” u’nn kumans met an pratik dan u minister? Ti egzaminn Filipyin 4:8 dan diskur “Bann Konversasyon Spirityel Fortifye Nu.” Kuma eski sa verse la ed nu pu gayn bann konversasyon spirityel, ek kan eski nu bizin ena sa bann konversasyon la?
8 Diskur “Fer Zeova Ful Konfyans Kan U dan Difikilte” ti montre kuma nu kapav fer fas avek bann levennman difisil, bann difikilte lor plan finans, enn move lasante, bann problem fami, ek bann defo ki nu ena. Kuma eski nu kapav montre nu konfyans an Zeova kan nu pas par sa bann problem la?
9 Bann Nuvo Trezor Spirityel: Nu ti byin kontan kan nu ti gayn nuvo liv Ador Sel Vre Bondye. Ki lefe lexplikasyon ki ti done kan ti anons sa liv la finn ena lor u? Kifer eski sa liv la pu itil dan nu predikasyon kuma enn dezyem liv letid?
10 Apre sa, nu ti gayn sa zoli liv la: Approchez-vous de Jéhovah. Ki bann kitsoz spesyal ena dan sa liv la? Ki zimaz u pli kontan? Eski kan u’nn lir liv la, u’nn santi u pli pros ar Zeova? Kisannla kapav tir profi ar sa liv la?
11 Lasanble Distrik “Bann Proklamater Rwayom Ki Zele” ti donn nu lankurazman spirityel ki nu bizin pu fer fas ar lepok difisil ki nu pe viv. Pu ki nu kapav profit byin sa dispozisyon spirityel la, nu bizin fer tu nu posib pu rapel seki ti dir pandan lasanble, pu apresye seki nu’nn gayne ek pu met an pratik seki nu’nn aprann. (2 Pyer 3:14) Si nu fer sa, nu pu gard nu fidelite ek nu pu vinn bann proklamater zele parey kuma nu Senyer Zezi Kris ti ete, ek nu pu donn Zeova laglwar.—Fil. 1:9-11.