Eski U Pe Met an Pratik Seki U Finn Aprann dan Lasanble Distrik “Bann Anseynan Parol Bondye?”
1 Tu bann ki finn asiste lasanble distrik sa lane la finn kapav truve ki lepep Zeova pe konsantre li plis dan so misyon pu vinn bann anseynan Parol Bondye. (Mat. 28:19, 20) Kan u finn return lakaz, ki bann instriksyon presi u ti byin deside pu met an pratik dan u prop lavi ek dan predikasyon?
2 Bann Lekritir Ki Bondye Finn Fer Ekrir Zot Profitab pu Anseyne: Tem premye zurne lasanble ti atir latansyon lor 2 Timote 3:16. Diskur tem ti montre nu ki pu nu “Byin Ekipe pu Anseyn Parol Bondye,” nu bizin ena enn gran lestim pu parol Bondye, respekte li plis ki ninport ki lopinyon uswa tradisyon bann zom, ek servi li tuletan. Nu bizin usi priye tulezur pu ki lespri sin ed nu dan nu minister ek nu bizin fer zefor pu devlop so frwi prinsipal—lamur. Ek nu bizin permet lorganizasyon Zeova lor later form nu atraver tu bann reynion kongregasyon, pu nu vinn bann minis.
3 Diskur an trwa parti ki ti ena Vandredi, “Anseyn Nu Mem Kan Nu Anseyn Lezot,” ti explike ki nu bizin donn legzanp kan nu (1) obeir bann lalwa Bondye dan tu seki konsern moralite Kretyin, (2) gard bann bon labitid letid, ek (3) tir bann latitid ek bann kondisyon nu leker ek nu lespri ki Satan kapav explwate. Apre sa diskur la, nu finn aprann bann manyer pratik pu protez nu fami kont pornografi ki kuma enn lepidemi dan lemond. Ti ankuraz bann paran pu donn legzanp zot mem. Zot bizin evit get enn senn sexyel mem pu enn ti moman. Zot bizin kontrol usi fason ki zot zanfan servi Internet ek seki zot gete lor televizyon. Ki bann pwin dan program Vandredi u finn fini kumans met an pratik?
4 Dernye diskur sa lazurne la ti fer nu pli determine ki zame pu kontan lalimyer Zeova, pu res pros avek bann manb 144,000 fidel ki ankor lor later, ek pu ogmant lape ki ena parmi lepep Zeova. Eski u finn lir sa nuvo liv ki ti paret la, La prophétie d’Isaie, lumière pour tous les humains II?
5 Byin Kalifye pu Anseyn Lezot: Tem dezyem zurne lasanble ti baze lor 2 Timote 2:2. Kan u finn ekut diskur an trwa parti ki ti fer Samdi gramatin, eski u finn not bann lide lor manyer pu (1) rod bann ki merite, (2) kiltiv zot lintere, ek (3) anseyn zot pu pratik tu seki Kris finn komande? Eski u pe met an pratik seki u finn aprann—pu montre dimunn ki u zwenn dan predikasyon omwin enn pwin dan Labib ek pu poz enn baz pu enn prosin vizit? Eski u finn kumans servi liv Konesans ek bann lezot nuvo trak an Kreol dan u minister?
6 Program lapremidi ti montre linportans pu imit Zezi, nu Gran Anseynan. Dan ki bann domenn u pe fer zefor pu plis resanble li? Avek seki u finn aprann dan dezyem diskur an trwa parti ki ti ena sa zur la, kuma eski u panse u kapav “Profit Plis Ledikasyon Ki Bondye Donn Nu”? Ki bann sigzesyon u finn met an pratik pu ogmant u konsantrasyon kan u fer u letid personel ek kan u asiste reynion?
7 Pena dut, sa nuvo liv ki pu sorti byinto la, Tirez profit de l’École du ministère théocratique pu ed nu pu ogmant nu bann kapasite kuma bann orater ek anseynan Parol Bondye. Bann serviter fidel Bondye ki Labib mansyone ti devlop bann kalite kan zot ti anseyne. Abe, sa nuvo laranzman pu lekol la pu atir plis latansyon lor sa bann kalite ki inportan pu anseyne la. Dan sak leson sa nuvo liv la ena bann lankadre ki montre byin dan detrwa mo seki nu bizin fer, kifer li inportan nu fer sa, ek ki manyer pu fer sa. Ena usi bann legzersis pratik. Bann ser pu gayn 29 kad, ek zot pu kapav swazir enn ladan pu fer zot devwar. Plitar, sa bann sanzman ki finn anonse la pu rant dan program lekol. Eski u ena bon labitid pu etidye ek pu prepare pu byin profit Lekol Minister Teokratik sak semenn?
8 Vinn Bann Anseynan Depi Tu Sa Letan Ki Finn Pase La: Ebre 5:12 finn prepar lespri bann asistan pu Dimans. Diskur an trwa parti sa gramatin la, “Profesi Malaki Prepar Nu pu Zur Zeova,” finn ankuraz nu pu donn Bondye tu seki nu ena pli bon ek pu ayir tu bann kondwit tret pu ki nu kapav sape dan gran zur Zeova ki fer per. Dram, “Respekte Lotorite Zeova,” finn montre byin kuma lorgey, lanbisyon, zaluzi, ek fidelite mal plase ki Kora ek bann ki finn swiv li ti ena, finn amenn zot pu rebel kont Zeova Limem. Diskur ki ti ena zis apre finn montre kuma li inportan zordi ki nu sumet ar lotorite Bondye dan fami ek dan kongregasyon. Diskur piblik, “Kisannla Pe Anseyn Tu Bann Nasyon Laverite?” finn pruve ki zis bann Temwin Zeova ki pe kapav fer sa, kontrerman avek Lakretyinte ki zis pretann li pe anseyn laverite ki ena dan Labib.
9 Vremem, Zeova pe form nu pu vinn bann meyer anseynan so Parol. Anu aplik seki nu finn aprann, ek anu kontiyn fer atansyon ar nu mem ek ar nu lanseynman, pu ki nu kapav sov nu lavi ek lavi bann ki ekut nu.’—1 Tim. 4:16.