Byin Ekipe pu Anseyn Parol Bondye

“Bondye . . . finn vremem kalifye nu kuma bizin pu vinn bann minis.”—2 KORINTYIN 3:5, 6.

1, 2. Ki bann zefor finn fer parfwa pu prese, me kifer eski laplipar ditan sa bann zefor la finn tom dan delo?

KUMA eski u pu santi u si u gayn enn travay, me ki u pena okenn kalifikasyon pu fer li? Purtan, u ena tu zuti ek tu seki u bizin devan u. Me, u pa kone kuma pu fer sa travay la. Lor la, luvraz la byin prese. Dimunn pe kont lor u. U pu byin anbarase!

² Sa sityasyon difisil la li zis enn legzanp ki nu finn sey mazine. Anu pran enn ka. Parfwa enn bann legliz Lakretyinte finn rod organiz ek fer predikasyon laport-laport. Me suvan tu sa zefor ki zot finn fer la tom dan delo, ek li arete apre detrwa semenn uswa detrwa mwa. Kifer? Abe parski bann legliz Lakretyinte pa finn ed zot bann disip pu kalifye zot pu sa travay la. Mem bann pret, ki purtan finn swiv bann gran-gran kur dan bann lekol ek dan bann seminer pandan plizir lane, zot pa kalifye pu fer sa travay predikasyon la. Kifer eski nu kapav dir sa?

3. Ki lexpresyon finn servi trwa fwa dan 2 Korintyin 3:5, 6, ek ki sa vedir?

³ Parol Bondye explike ki kitsoz ki kalifye enn kikenn pu vinn enn vre predikater labonn nuvel. Par lespri Bondye, Lapot Pol finn ekrir: “Pa par nu mem ki nu finn kalifye kuma bizin, pu konsider sa kuma enn kitsoz ki sorti ar nu, me si nu kalifye kuma bizin se grasa Bondye, ki finn vremem kalifye nu kuma bizin pu vinn bann minis.” (2 Korintyin 3:5, 6) Not sa lexpresyon ki paret trwa fwa dan sa bann verse la—“kalifye kuma bizin.” Ki sa vedir? Dapre Vine’s Expository Dictionary of Biblical Words: “Kan [sa mo Grek] ki tradir “kalifye kuma bizin” la aplik ar bann kitsoz, li vedir ‘ase’ . . . ; kan li aplik ar bann dimunn, li vedir enn kikenn ki ‘ena kapasite,’ ek ki ‘ena bann merit.’ ” Alor, enn kikenn ki “kalifye kuma bizin” li enn kikenn ki ena kapasite ek ki merit fer travay ki finn donn li. Wi, bann vre minis labonn nuvel, zot kalifye pu prese. Zot ena kapasite ki bizin, uswa bann merit ki bizin pu fer sa travay la.

4. (a) Kuma eski legzanp Lapot Pol montre ki pa zis enn tigit dimunn ki siperyer ki kapav kalifye pu minister Kretyin? (b) Ki trwa mwayin Zeova servi pu kalifye nu pu vinn bann minis?

⁴ Me, kot zot finn gayn sa kalifikasyon la? Eski zot finn gayn sa par zot bann prop kapasite? Eski zot ena enn pli gran lintelizans? Eski zot finn swiv bann kur spesyal dan bann gran-gran lekol? Li paret ki Lapot Pol ti ena tu sa bann kitsoz la. (Akt 22:3; Filipyin 3:4, 5) Purtan, avek limilite, li ti rekonet ki Zeova ki finn kalifye li pu vinn enn minis, pa bann lekol kot gayn gran-gran konesans. Eski sa bann kalifikasyon la finn rezerve zis pu sertin dimunn ki siperyer? Dan sa bann verse ki Pol finn ekrir kongregasyon Korint la, li mansyone ki “nu kalifye kuma bizin.” Sa vedir ki Zeova fer sir ki tu so bann serviter fidel gayn kapasite pu fer travay ki Li finn donn zot. Kuma eski Zeova kalifye bann vre Kretyin zordi? Anu egzaminn trwa mwayin ki Li servi: (1) so Parol, (2) so lespri sin, ek (3) so lorganizasyon lor later.

Parol Zeova Kalifye Nu

5, 6. Ki lefe bann Lekritir Sakre ena lor bann vre Kretyin?

⁵ Dabor, kuma eski Parol Bondye ed nu pu nu kalifye pu vinn bann minis? Pol finn ekrir: “Tu Lekritir finn inspire par Bondye, ek li profitab pu anseyne, pu korize, pu met bann kitsoz an ord, pu disiplinn dan lazistis, pu ki zom Bondye kapav byin kalifye, byin ekipe pu tu bon travay.” (2 Timote 3:16, 17) Alor, bann Lekritir Sakre kapav fer nu “byin kalifye, byin ekipe” pu fer “bon travay,” setadir anseyn bann dimunn Parol Bondye. Ki nu kapav dir lor bann krwayan dan bann legliz Lakretyinte? Zot usi, zot ena Labib. Me, kuma eski enn mem liv pe kapav ed sertin dimunn pu vinn bann minis kalifye ek pa ed lezot? Abe, sa depann lor nu latitid anver Labib.

⁶ Malerezman, laplipar dimunn ki al legliz pa aksepte mesaz Labib kuma “seki li ete vremem, setadir parol Bondye.” (1 Tesalonisyin 2:13) Lakretyinte finn gayn enn move repitasyon dan sa domenn la. Mem si bann pret finn pas plizir lane pu etidye Labib dan bann gran-gran lekol, eski sa vedir ki zot byin ekipe pu anseyn Parol Bondye? Non. Sertin etidyan ti krwar dan Labib kan zot ti kumans zot kur dan bann seminer, me purtan apre ki zot finn gayn zot diplom, zot finn kumans ena dut. Lerla, olye ki zot pres parol Bondye—ki laplipar parmi zot nepli krwar—zot abord lezot size. Zot pran par sertin dimunn dan bann deba politik, zot pres levanzil sosyal setadir ankuraz pu servi bann prinsip Levanzil pu regle bann problem sosyal, ek zot koz plis lor bann filozofi lemond dan zot bann sermon. (2 Timote 4:3) Me bann vre Kretyin zot, zot swiv legzanp Zezi Kris dan sa domenn la.

7, 8. Kuma eski latitid ki Zezi ti ena anver Parol Bondye pa ti parey avek latitid bann sef relizye sa lepok la?

⁷ Zezi pa ti les bann sef relizye so lepok inflyans so panse. Kan li ti pe anseyn enn ti grup dimunn, kuma par egzanp so bann zapot, uswa bann gran laful, Zezi ti sit plizir fwa bann Lekritir Sakre. (Matye 13:10-17; 15:1-11) Pwiski li ti servi bann Lekritir, sa ti rann li diferan ar bann sef relizye so lepok. Sa bann sef la ti dekuraz lepep pu etidye bann kitsoz profon ki ena dan parol Bondye. Avredir sa lepok la, li ti normal pu enn profeser pretann ki sertin pasaz Lekritir ti tro profon pu egzaminn avek ninport ki dimunn, eksepte avek so zelev prefere—ek la usi li pu koz dusma-dusma ek li pu kuver so latet. Wi, akoz zot bann siperstisyon, bann sef relizye pa ti rod diskit lor sertin porsyon Labib, parey kuma zot pa ti rod pronons non Bondye!

⁸ Me, Zezi pa ti kuma zot. Li ti kone ki pa zis sertin dimunn siperyer ki ti bizin pran kont “tu parol ki sorti dan labus Zeova,” me tu dimunn. Zezi pa ti interese pu donn zis enn grup zelev siperyer privilez pu partaz konesans lor bann Lekritir. Li ti dir so bann disip: “Seki mo dir zot dan nwar, dir li dan lalimyer; ek seki zot finn tande dusma-dusma dan zot zorey, pres li [lao] lor bann teras.” (Matye 4:4; 10:27) Zezi ti ena enn gran dezir pu fer maximem dimunn posib gayn konesans Bondye.

9. Kuma eski bann vre Kretyin servi Labib?

⁹ Kan nu anseyne, nu bizin atir latansyon premyerman lor Parol Bondye. Par egzanp, kan nu pe fer enn diskur dan Lasal DiRwayom, li pa sifi zis lir bann verse Labib ki finn swazire. Nu bizin pran letan pu explike, pu donn bann legzanp ek pu aplik verse la dapre so kontex. Nu bizin fer resorti mesaz ki ena dan sa verse la, ek grav li dan leker bann dimunn ki pe ekut nu. (Neemya 8:8, 12) Bizin servi usi Labib kan li neseser pu konseye uswa pu disipline. Mem si bann serviter Zeova koz diferan lang, ek zot sorti dan diferan kominote, zot tu zot respekte Labib—sa gran liv la.

10. Ki lefe mesaz Labib ki inspire par Bondye kapav ena lor nu?

¹⁰ Kan nu servi Parol Bondye avek sa kalite respe la, li ena enn puvwar dan lavi bann dimunn. (Ebre 4:12) So mesaz pus bann dimunn pu fer bann sanzman dan zot lavi, pu aret bann pratik ki pa an akor avek bann prinsip Labib kuma par egzanp, fer bann vis sexyel, ladilter, idolatri, bwar ziska su, ek kokin. Li finn ed enn kantite lezot dimunn pu ranplas zot ansyin personalite par nuvo personalite. (Efezyin 4:20-24) Wi, si nu respekte Labib kuma enn liv pli siperyer ki bann panse uswa tradisyon bann zom ek si nu servi li tuletan, li pu vremem fer nu kalifye, byin ekipe pu anseyn Parol Bondye.

Lespri Zeova Kalifye Nu

11. Kifer eski li apropriye pu apel lespri sin “asistan”?

¹¹ Dezyeman, anu gete kuma lespri sin Zeova, uswa so lafors aktif ekip nu byin. Fode zame nu bliye ki lespri Zeova, sa mem lafors pli pwisan ki kapav ena. Zeova finn donn Zezi pwisans pu li servi sa lafors inpresyonan la an faver tu bann vre Kretyin. Akoz sa, Zezi ti apel lespri sin “asistan.” (Zan 16:7) Li ti ankuraz so bann disip pu demann Zeova so lespri ek li ti donn zot lasirans ki Zeova pu donn zot sa avek bonker.—Lik 11:10-13; Zak 1:17.

12, 13. (a) Kifer eski li inportan ki nu priye pu ki lespri sin ed nu dan nu minister? (b) Kuma eski bann Farizyin ti montre ki lespri sin pa ti pe azir lor zot?

¹² Tulezur, nu bizin priye pu gayn lespri sin, pu li ed nu sirtu dan nu minister. Ki lefe sa lafors aktif la ena lor nu? Li kapav inflyans nu lespri ek nu leker, ek li ed nu pu sanze, pu grandi lor plan spirityel ek pu ranplas nu vye personalite par nuvo personalite. (Kolosyin 3:9, 10) Li kapav ed nu pu devlop bann kalite ki ena valer, ki Kris ti ena. Buku parmi nu kapav resit Galat 5:22, 23 parker. Sa bann verse la dres enn lalis bann frwi lespri Bondye. Premye frwi ki mansyone, li lamur. Sa li enn kalite ki byin inportan dan nu minister. Kifer?

¹³ Lamur mem ki motiv nu. Lamur pu Zeova ek pu zot prosin pus bann vre Kretyin pu pres bon nuvel. (Mark 12:28-31) San sa lamur la, nu pa ti pu vremem kalifye pu anseyn parol Bondye. Remark diferans ki ti ena ant Zezi ek bann Farizyin. Matye 9: 36 dir konsernan Zezi: “Letan li finn truv sa bann laful la, li finn gayn pitye pu zot, parski zot pa ti ena nanyin ek zot ti fane inpe partu-partu parey kuma bann muton ki pena berze.” Me bann Farizyin zot, ki santiman zot ti ena pu sa bann ti dimunn la? Zot finn dir: “Sa laful ki pa konn lalwa la, zot bann dimunn modi.” (Zan 7:49) Wi, sa bann Farizyin la pa ti ena enn su lamur pu lepep, okontrer zot ti mepriz bannla! Li kler ki lespri Zeova pa ti pe azir lor zot.

14. Kuma eski legzanp Zezi dan fason ki li finn manifeste lamur dan so minister motiv nu?

¹⁴ Zezi ti konpran santiman bann dimunn. Li ti konn zot duler. Li ti kone ki zot ti gayn maltrete, ki zot pa ti ena nanyin, ek ki zot ti fane inpe partu-partu kuma bann muton ki pena berze. Zan 2:25 dir nu ki Zezi “ti kone ki ena dan zom.” Pwiski pandan kreasyon li ti Zuvriye Kalifye Zeova, li finn tuletan byin konpran natir bann dimunn. (Proverb 8:30, 31) Sa mem ki finn fer so lamur vinn pli profon. Anu les sa mem kalite lamur la pus nu pu prese! Si nu truve ki nu bizin amelyor nu dan sa domenn la, anu priye Zeova pu nu gayn so lespri sin ek anu azir an armoni avek nu bann lapriyer. Zeova pu reponn nu. Li pu avoy so lafors pu ed nu pu resanble plis Zezi Kris, ki ti ena pli bon kalifikasyon ki kapav pu pres labonn nuvel.

15. Kuma eski bann parol Izai 61:1-3 aplik byin ar Zezi ek an mem tan devwal laverite lor bann skrib ek bann Farizyin?

¹⁵ Me kot Zezi finn gayn so bann kalifikasyon? Li ti dir: “Lespri Zeova lor mwa.” (Lik 4:17-21) Wi, Suverin liniver finn swazir Zezi avek lespri sin. Zezi pa ti bizin gayn ankor lezot diplom. Eski lespri sin ti swazir bann sef relizye dan so lepok? Non, ni zot ti ekipe pu realiz profesi Izai 61:1-3 ki Zezi ti lir for ek ki ti aplik ar li. Silvuple lir sa bann verse la ek gete par u mem kuma bann skrib ek bann Farizyin ipokrit pa ti ena okenn kalifikasyon. Zot pa ti ena okenn bon nuvel pu anons bann pov. Ek kuma eski zot ti pu kapav pres liberasyon ar bann esklav ek anonse ki bann aveg pu truv kler? Dayer, lor plan spirityel, zot mem zot ti bann aveg ek esklav bann tradisyon zom! Me nu, eski nu kalifye pu anseyn bann dimunn?

16. Ki lasirans eski lepep Zeova kapav ena an seki konsern zot kalifikasyon kuma bann minis?

¹⁶ Li vre ki nu pa finn swiv bann gran-gran kur dan bann lekol Lakretyinte. Ni nu finn nome anseynan par bann seminer teolozi. Me eski sa vedir ki nu pena okenn kalifikasyon? Non! Zeova ki finn nom nu. (Izai 43:10-12) Si nu priye pu gayn so lespri, ek nu azir an armoni avek nu lapriyer, nu pu gayn pli gran kalifikasyon ki kapav ena. Byinsir, pwiski nu inparfe, nu pa kapav imit egzak pu egzak legzanp nu Gran Anseynan, Zezi Kris. Malgre sa, eski nu pa bizin rekonesan anver Zeova pu so lespri sin ki Li servi pu kalifye nu ek ekip nu pu anseyn so parol?

Lorganizasyon Zeova Kalifye Nu

17-19. Kuma eski sa sink reynion ki lorganizasyon Zeova donn nu tulesemenn la, ed nu pu kalifye kuma bann minis?

¹⁷ Asterla, anu get trwazyem mwayin ki Zeova servi pu byin ekip nu pu anseyn so Parol—so kongregasyon lor later uswa so lorganizasyon ki form nu pu vinn bann minis. Kuma? Nek pans program lanseynman ki nu gayne! Dan enn semenn, nu asiste sink reynion. (Ebre 10:24, 25) Nu reyni an ti grup dan Letid Liv Kongregasyon pu etidye Labib an profonder atraver enn liv ki lorganizasyon Zeova prepare pu nu. Kan nu ekute ek kan nu donn bann komanter, nu aprann ar lezot ek nu ankuraz lezot. Kondikter letid liv donn nu enn linstriksyon ek enn latansyon personel. Kan nu asiste Diskur Piblik ek Letid Latur Degard, nu gayn nuritir spirityel ki pli ris ankor.

¹⁸ Nu Lekol Minister Teokratik finn fer pu form nu pu nu kapav anseyne. Kan nu prepar bann size ki bann zelev ena pu fer, nu aprann kuma servi Parol Bondye pu anseyn lor enn gran varyete size. (1 Pyer 3:15) Eski finn deza arive, u aprann enn kitsoz nuvo pandan ki u pe prepar enn devwar lor enn size ki u deza kone? Suvan sa ariv nu. Pu ogmant nu konesans lor enn size, pena meyer mwayin apart anseyn lezot sa size la. Mem si nu pena okenn size pu prezante, la usi nu kapav aprann pu vinn bann meyer anseynan. Nu remarke ki sak zelev ena bann kalite, ek nu kapav reflesi kuma pu imit sa bann kalite la.

¹⁹ Reynion Servis usi finn fer pu ekip nu pu vinn bann anseynan Parol Bondye. Semenn apre semenn, nu apresye bann diskur byin vivan, bann size kestyon repons, ek bann demonstrasyon ki finn prepare pu ed nu dan nu minister. Ki prezantasyon nu pu servi? Kuma eski nu kapav reponn sertin obzeksyon dan teritwar? Dan ki bann lezot form predikasyon kitfwa nu bizin partisip inpe plis? Ki kitsoz ki kapav ed nu pu nu vinn bann pli bon anseynan kan nu fer bann vizit ek bann letid Labib? (1 Korintyin 9:19-22) Reynion Servis egzaminn tu sa bann kestyon la an detay. Buku size baze lor Nu Minister DiRwayom, enn lot zuti ki lorganizasyon Zeova done pu ekip nu pu sa travay byin-byin inportan la.

20. Kuma eski nu kapav tir profi ar bann reynion ek bann lasanble?

²⁰ Kan nu prepare ek asiste nu bann reynion, ek kan nu aplik seki nu aprann dan nu travay lanseynman, nu gayn enn gran formasyon. Me, ena plis ki sa. Nu ena usi bann pli gran reynion—tu bann lasanble—ki ekip nu pu nu vinn bann anseynan Parol Bondye. Wi, nu inpasyan pu ekut bann size avek buku latansyon ek pu met an pratik sa bann konsey ki nu gayne la!―Lik 8:18.

21. Ki prev nu ena ki nu formasyon finn donn bon rezilta, ek kisannla ki merit gayn loner pu sa?

²¹ Eski sa formasyon ki Zeova finn done la finn donn bann bon rezilta? Anu get bann prev. Sak lane, plizir santenn milye dimunn pe gayn led pu aprann bann lanseynman prinsipal ki ena dan Labib, ek pu viv an akor avek seki Bondye pe demann zot. Nu kantite pe ogmante, me personn parmi nu pa merit loner pu sa. Nu bizin realis parey kuma Zezi, ki finn dir: “Personn pa kapav vinn ver mwa, amwin mo Papa, ki finn anvway mwa, atir li.” Parey kuma bann zapot, laplipar parmi nu, nu bann dimunn ordiner ki pa finn fer gran klas. (Zan 6:44; Akt 4:13) Me, Zeova ki fer nu reysi, parski Li mem ki atir bann dimunn sinser ver laverite. Lapot Pol ti ena rezon kan li ti ekrir: “Mo finn plante, Apolos finn aroze, me Bondye ki ti pe fer li puse.”—1 Korintyin 3:6.

22. Kifer eski nu bizin pa tro dekuraze pu partisip afon dan minister Kretyin?

²² Wi, Zeova pe zwe enn gran rol dan nu travay lanseynman. Defwa, nu kapav santi ki nu pa kalifye pu anseyn lezot. Me rapel ki Zeova ki atir bann dimunn ver Limem ek ver so Garson. Limem ki, atraver so Parol, so lespri sin, ek so lorganizasyon lor later, kalifye nu pu anseyn bann nuvo. Alor, anu apresye formasyon ki Zeova pe donn nu. Anu ekute, aprann, ek met an pratik bann bon kitsoz ki Li pe done pu byin ekip nu pu anseyn so parol!

Kuma Eski U Pu Reponn?

• Kuma eski Labib ekip nu pu prese?

• Ki rol eski lespri sin zwe pu kalifye nu kuma bann minis?

• Dan ki bann fason eski lorganizasyon Zeova lor later ed u pu u kalifye kuma enn predikater labonn nuvel?

• Kifer eski nu bizin ena lasirans kan nu pran par dan predikasyon?

[Zimaz lor paz 19]

Antan ki enn anseynan Parol Bondye, Zezi ti montre lamur pu bann dimunn