Anseyn Lezot Langaz Pir
1 Mem si zot sorti dan plizir ‘nasyon, tribi, pep ek lang,’ bann Temwin Zeova zot enn pep ki ini, zot form enn vre fami bann frer ek ser dan lemond antye. (Rev. 7:9) Dan lemond ki divize la, zot linite li remarkab. Kuma eski sa posib? Parski nu finn gayn “enn langaz pir” pu nu koze.—Sef. 3:9.
2 Bann Lefe Extraordiner: Ki sa langaz pir la sa? Se enn bon konpreansyon lor laverite ki dan Labib konsernan Zeova ek so bann proze, sirtu laverite lor Rwayom Bondye. Kuma Zezi ti anonse, nu gayn laverite par enn mwayin vizib lor later, setadir “esklav fidel ki ena bon zizman.” Ki rezilta sa ena? Ebyin, bann dimunn ki “koz tu lang ki bann nasyon koze,” pe aksepte vre ladorasyon.—Mat. 24:45; Zek. 8:23.
3 Amezir bann dimunn pe aprann sa langaz ki pir la, zot anvi viv dapre bann prinsip Zeova. Zot aprann pu “res byin ini dan mem fason panse ek mem konviksyon.” (1 Kor. 1:10) Lanseynman Bondye fer zot ena enn bon kondwit, pu koz laverite, sirtu kan nu koz labonn nuvel ar lezot. (Tit 2:7, 8; Ebre 13:15) Sa bann sanzman extraordiner la donn loner Zeova.
4 Par egzanp, enn proklamater ti pres ar enn misye ki ti poz buku kestyon, ek proklamater la ti servi Labib pu reponn li. Seki li ti tande ti telman inpresyonn li, ki li’nn kumans etidye de fwa par semenn ek li’nn kumans asiste bann reynion. Li ti etone par bon lakey ki li ti gayne dan Lasal DiRwayom, kot laplipar dimunn pa ti mem ras ar li. Enn tipe apre, li ek so madam finn fer bann sanzman dan zot lavi ek zot finn batize. Depi sa, li finn ed anviron 40 lezot dimunn pu servi Zeova, parmi ti ena plizir manb so fami. Malgre li sufer enn andikap, li’nn fek kumans servis pyonye.
5 Anseyn Lezot: Bann levennman ki ena dan lemond pe fer buku dimunn onet reegzaminn zot manyer panse ek zot lavi. Parey kuma Zezi, nu bizin ena dezir pu ed zot. Pu ed bann dimunn sinser aprann sa langaz ki pir la, nu bizin fer bann vizit ek bann letid efikas.
6 Enn bon fason pu reysi tus bann dimunn okipe, se kondir enn letid kurt devan zot laport. (kmCe 5/02 p. 1) Eski u’nn deza sey sa? Kan u pe prepar enn vizit, swazir enn prezantasyon dan sipleman Nu Minister DiRwayom Zanvye 2002 ki adapte ar sa dimunn la. Buku bann prezantasyon ki dan sa sipleman la, finn fer pu diriz direkteman konversasyon dan brosir Ki Bondye Pe Demann Nu? uswa dan liv Konesans Ki Amenn ver Lavi pu Tuletan. Pratik prezantasyon la pu ki, apre u lintrodiksyon, u kumans dusma-dusma egzaminn enn parmi sa bann paragraf la. Dan paragraf la, swazir enn uswa de verse Labib ki u pu lir ek explike. Apre prepar enn kestyon pu u termine. Sa pu ed u pu atir latansyon lor paragraf ki u’nn deside pu egzamine dan u prosin vizit.
7 Pep Zeova pe gayn buku benediksyon parski zot pe aprann sa langaz pir la. Anu fer buku zefor pu ed lezot vinn ansam avek nu pu ‘invok non Zeova’ ek pu ‘servi Li lamin dan lamin.’—Sef. 3:9