Prese dan enn Lemond Ki Tuletan Pe Sanze
1 Enn kut bann kitsoz kapav sanze! Byin-vit, enn katastrof natirel, enn kriz ekonomik, enn bulversman politik, uswa enn maler ki’nn gayn gran piblisite, kapav vinn size konversasyon tu dimunn. Me, bann dimunn pa tarde pu turn zot latansyon ver enn lot kitsoz. (Akt 17:21; 1 Kor. 7:31) Dan sa lemond ki tuletan pe sanze la, kuma eski nu kapav kapte latansyon bann dimunn ek kumsa partaz mesaz lor Rwayom avek zot?
2 Konpran Seki Pe Trakas Bann Dimunn: Enn fason pu kapte lintere bann dimunn se kan nu koz lor bann levennman ki pe pase. Enn fwa, Zezi ti koz lor bann maler ki ti fek pase, ek ki ti ankor dan lespri bann dimunn. Li ti mansyonn sa pu ankuraz bann dimunn ki ti pe ekut li pu reflesi serye-serye lor zot pozisyon devan Bondye. (Lik 13:1-5) Pareyman, kan nu pe pres bon nuvel, li bon nu koz lor enn nuvel ki pe fer laktyalite uswa enn kitsoz ki’nn arive dan landrwa ki interes bann dimunn dan nu teritwar. Me, kan nu koz lor sa bann kalite size la, nu bizin fer byin atansyon. Fode pa, ki par seki nu dir nu montre ki nu pe pran par enn parti dan bann zafer politik uswa sosyal.—Zan 17:16.
3 Kuma eski nu kapav kone ki kitsoz pe preokip bann dimunn ansemoman mem? Defwa, meyer mwayin pu kone, se zis si nu poz enn kestyon ek nu ekute. (Mat. 12:34) Lintere pu bann dimunn pu pus nu pu pran kont pwindevi lezot ek avek tak, sey konn inpe plis. Defwa, seki enn dimunn dir enn kut kumsa, kapav ed nu konpran ki kitsoz trakas bann dimunn dan landrwa. Ek sa kapav uver semin pu donn enn temwaynaz.
4 Prepar enn Prezantasyon: Kan nu pe prepar nu pu al prese dan sa lemond ki pe tuletan sanze la, nu kapav servi liv Comment Raisonner. Lor paz 9-10, anba sutit “l’Actualité” ek lor paz 11 anba sutit “Crime/Sécurité,” nu pu truv bann bon sigzesyon lor kuma nu kapav inklir bann levennman ki pe fer laktyalite dan nu prezantasyon. Nu kapav gayn bann ranseyman parey kumsa dan Nu Minister DiRwayom, Septam 2000 paz 4, an Franse. Kan nu pe prepar nu prezantasyon, li bon ki nu asir nu ki nu prezant enn tex Labib ki apropriye.
5 Amezir ki nu remark bann kitsoz ki pe sanze ek ki trakas bann dimunn dan nu teritwar, nu bizin adapte nu prezantasyon bon nuvel avek seki pe pase. Kumsa, nu pu koz avek bann dimunn lor bann kitsoz ki tus zot buku. Nu pu kapav usi ed enn kantite dimunn pu aprann konn sa Kikenn ki pa sanze la. So bann kalite ek so bann prinsip res tuletan parey.—Zak 1:17.