Bann Benediksyon Servis Pyonye
1, 2. Ki bann benediksyon ki asosye avek servis pyonye, ek kifer?
1 “Mo kone ki pena okenn lezot travay ki kapav fer mwa gayn satisfaksyon ki mo resanti kan mo partaz laverite avek lezot.” Se seki enn pyonye finn dir. Enn lot pyonye dir: “Alafin sak zur mo dormi byin ek mo leker ranpli ar lazwa.” Sa bann pyonye la exprim santiman bann frer ek ser dan lemond antye ki finn konn bann benediksyon servis pyonye.—Prov. 10:22.
2 Nu gayn vre satisfaksyon kan nu ed lezot pu gayn konesans Parol Bondye ki kapav sap zot lavi. (Akt 20:35; 1 Tes. 2:19, 20) Enn frer ki pyonye depi byin lontan, ekrir: “Li enn gran lazwa pu mwa ek mo lafwa vinn pli for kan mo truve avek ki kalite lafors Parol Bondye pus bann dimunn pu fer bann sanzman dan zot lavi.” Wi, kan bann pyonye montre zot disponib pu ed bann dimunn ek kondir bann letid Labib, zot pu gayn sa bann kalite benediksyon la.
3, 4. Kuma eski servis pyonye anseyn enn dimunn pu kont lor Zeova, ek kuma eski sa ed enn kikenn pu grandi lor plan spirityel?
3 Kont lor Zeova: Amezir ki zot akonpli zot minister, bann pyonye kont lor lespri sin Bondye tulezur. Sa ed zot pu devlop “frwi lespri sin” ek sa protez zot. (Gal. 5:16, 22, 23) Pwiski bann pyonye servi Parol Bondye regilyerman, suvan zot vinn bann fwet dan fason ki zot servi Labib pu defann laverite ek fortifye lezot. (2 Tim. 2:15) Enn frer ki’nn fer pyonye depi plizir dizenn lane fer sa komanter la: “Servis pyonye finn ed mwa pu gayn enn profon konesans lor Labib. Mo finn servi sa konesans la pu ed enn kantite dimunn pu aprann konn Zeova ek so bann proze.” Wi, sa vremem donn enn gran satisfaksyon!
4 Bann pyonye permanan usi bizin kont lor Zeova dan buku lezot fason. Zot lafwa vinn pli for kan zot truve kuma Zeova ed zot amezir ki zot fer zefor pu gayn bann kitsoz ki zot bizin lor plan materyel. Enn frer 72 an ki pyonye permanan depi 55 an dir: “Zame Zeova finn les mwa tonbe.” Anplis, kan bann pyonye gard enn lavi sinp, sa protez zot kont buku traka dan lavi. Eski sa lide ki nu proteze kont buku traka lavi la, atir u?—Mat. 6:22; Ebre. 13:5, 6.
5. Kuma eski servis pyonye kapav ed enn dimunn pu vinn pros ar Zeova?
5 Vinn Pros ar Bondye: Nu relasyon avek Zeova se dibyin pli presye ki nu kapav ena. (Psom 63:3) Kan nu partisip plin-plin dan minister parski nu kontan Zeova, nu vinn pli pros ar Li. (Zak 4:8) Enn frer ki dan servis pyonye depi plis ki 18 an dir: “Servis pyonye permet nu ‘gute ek gete ki Zeova Li bon.’ Ek li permet nu devlop bann relasyon deplizanpli for avek nu Kreater, zur apre zur.”—Psom 34:8.
6. Ki bann pyonye bizin ena, ek kisannla ki tir profi apart bann pyonye?
6 Li vre ki sityasyon bann pyonye permet zot pu fer sa servis la. Me zot bizin ena usi enn lafwa for, enn vre lamur pu Bondye ek pu zot prosin, ek montre zot dispoze pu fer bann sakrifis. (Mat. 16:24; 17:20; 22:37-39) Me, lazwa ki reflekte lor figir bann pyonye dan lemond antye, donn nu prev ki bann benediksyon servis pyonye li depas bann sakrifis. (Mal. 3:10) Pa zis bann pyonye ki gayn bann benediksyon, me zot fami ek kongregasyon usi gayn bann benediksyon grasa bon lespri ki bann pyonye manifeste.—Fil. 4:23.