Devlop enn Lintimite Avek Zeova
1. Ki enn ser inn fini par pran konsyans konsernan so bann aktivite spirityel?
1 Enn ser ti admet: “Pandan sa anviron vin dernye lane ki’nn pase-la, la verite ti vinn enn rutinn pu mwa; mo ti kontant mwa al reynion ek partisip dan predikasyon.” Me, li azute, “Mo’nn fini par truve ki mem si sa bann kitsoz-la inportan, zot pa ti ase pu sutenir mwa kan ti kumans ena difikilte. . . . Asterla mo konpran ki mo bizin reget mo fason panse ek kumans enn program letid serye pu vremem aprann konn Zeova ek kontan Li ek apresye seki so Garson inn donn nu.”
2. Kifer li inportan ki nu kiltiv lintimite avek Zeova?
2 Pu devlop enn relasyon intim avek Zeova, sa demann buku zefor. Li pa sifi zis swiv enn program aktivite spirityel. Si nu pa koz avek Zeova regilyerman dan enn fason intim, avek letan, Li kapav vinn kuma enn kamarad ki ti byin pros ar nu, me avek ki nu finn perdi kontak. (Rev. 2:4) Anu gete kuma enn letid personel ek lapriyer kapav ed nu pu devlop enn lintimite avek Zeova.—Psom 25:14.
3. Kuma nu letid personel bizin ete pu li rapros nu ar Zeova?
3 Lapriyer ek Meditasyon Byin Inportan: Pu ki nu letid personel nuri nu leker, nu pa kapav kontant nu sinpleman suliyn bann pwin-kle ek get bann verse Labib ki’nn site. Letid personel vedir reflesi lor seki sa ranseynman-la revel nu lor bann fason azir Zeova, lor so bann prinsip, ek lor so personalite. (Egz. 33:13) Kan nu arive konpran bann kitsoz spirityel, sa ena enn lefe lor nu bann santiman ek pus nu pu pans nu prop lavi. (Psom 119:35, 111) Nu bizin fer letid personel avek lobzektif pu vinn pros ar Zeova. (Zak 4:8) Enn letid serye demann letan ek enn lanvironnman ki favorab. Ek pu arive fer sa regilyerman, nu bizin disiplinn numem. (Dan. 6:10) Mem si u lavi byin sarze, eski u rezerv letan sak zur pu medit lor bann kalite extraordiner ki Zeova ena?—Psom 119:147, 148; 143:5.
4. Kuma eski kan nu priye avan nu kumans nu letid personel, sa ed nu pu kiltiv lintimite avek Zeova?
4 Lapriyer sinser okip enn plas inportan dan enn letid personel ki serye. Pu ki bann verite Biblik tus nu leker ek pus nu pu ‘ofer Bondye enn servis sakre avek la krint pu Li,’ nu bizin lespri sin Bondye. (Ebre 12:28) Alor, sak fwa avan nu etidye, nu bizin sipliy Zeova pu Li donn nu so lespri. (Mat. 5:3, not) Kan nu reflesi an profonder lor bann verse Labib ek kan nu servi bann piblikasyon ki lorganizasyon Zeova donn nu pu etidye, nu pe uver nu leker ar Zeova. (Psom 62:8) Kan nu etidye kumsa, se enn fason ki nu donn Zeova ladorasyon, kot nu exprim ek nu ranforsi nu latasman pu Li.—Zid 20, 21.
5. Kifer li inportan ki, sak zur, nu medit lor Parol Bondye?
5 Pu enn relasyon dire, bizin antretenir li. Pareyman, nu bizin kontiyn antretenir nu relasyon avek Zeova pu ki sa kontiyn grandi tutlong nu lavi. Donk, sak zur, anu rod letan pu nu vinn pros ar Bondye, parski nu kone ki, an retur, Li pu vinn pros ar nu.—Psom 1:2, 3; Efe. 5:15, 16.