“Vinn Pros ar Bondye”

“Vinn pros ar Bondye, ek Li pu vinn pros ar zot.”—ZAK 4:8.

1, 2. (a) Ki suvan bann dimunn pretann? (b) Ki lankurazman Zak ti done, ek kifer eski bann Kretyin ti byin bizin sa?

“BONDYE avek nu.” Nu kapav truv sa bann parol la lor bann lanblem nasyonal ek mem lor iniform bann solda. “Nu ena konfyans an Bondye.” Zordi, sa bann parol la grave lor enn kantite pyes larzan uswa biye. Suvan bann dimunn pretann ki zot ena enn bon relasyon avek Bondye. Me, pu enn kikenn ena sa kalite relasyon la, li bizin pa zis koz lor la uswa ekrir sa partu pu montre lezot. Eski u pa dakor ar sa?

² Labib montre ki nu kapav ena enn relasyon avek Bondye. Me pu nu ena sa relasyon la, nu bizin fer bann zefor. Mem sertin Kretyin ki ti swazire par lespri sin dan premye syek ti bizin ranforsi zot relasyon avek Bondye Zeova. Zak, ki ti enn ansyin, ti bizin averti sertin konsernan bann move tandans ki zot ti ena. Li ti dir zot fer atansyon parski zot ti kapav perdi zot propte lor plan spirityel. An mem tan li finn donn zot enn gran lankurazman: “Vinn pros ar Bondye, ek Li pu vinn pros ar zot.” (Zak 4:1-12) Ki Zak ti pe rod dir par sa expresyon “vinn pros” la?

3, 4. (a) Ki kitsoz, bann ki ti lir let Zak, finn petet rapel kan zot finn truv expresyon “vinn pros ar Bondye”? (b) Kifer eski nu kapav sir ki li posib pu nu apros ar Bondye?

³ Zak ti servi enn expresyon ki laplipar dimunn ki ti pu lir so let, ti deza kone. Lalwa Moiz ti donn bann pret bann linstriksyon presi kuma pu “apros” ar Zeova an faver lepep. (Egzod 19:22) Bann ki ti lir let Zak devet sirman ti rapel ki, apros ar Zeova li enn kitsoz ki byin serye. Zeova Limem personaz pli inportan dan liniver.

⁴ Lot kote, parey kuma enn spesyalis Labib finn remarke, “sa lankurazman la [dan Zak 4:8] fer nu dekuver enn gran lespwar.” Zak ti kone ki avek buku lamur Zeova finn tuletan invit bann dimunn inparfe pu vinn pros ar Li. (2 Kronik 15:2) Sakrifis Zezi finn uver semin pu bann dimunn kapav vinn pros ar Zeova ankor plis. (Efezyin 3:11, 12) Zordi, par milyon dimunn finn gayn posibilite pu apros ar Bondye! Me kuma eski nu kapav servi byin sa gran privilez ki nu finn gayne la? Nu pu egzaminn trwa fason ki pu ed nu pu vinn pros ar Bondye Zeova.

Kontiyn “Aprann Konn” Bondye

5, 6. Kuma eski legzanp zenn Samyel montre nu ki ete “aprann konn” Bondye?

⁵ Dan Zan 17:3, Zezi ti dir: “Ala seki vedir lavi pu tuletan: Se aprann konn twa, sel vre Bondye ek Zezi Kris, sa kikenn ki to finn anvwaye la.” Ki Zezi ti pe rod fer konpran kan li ti dir “aprann konn Bondye”? Enn kantite spesyalis finn remarke ki dan Grek orizinal sa mo la dekrir enn aksyon ki kontiyne. Se enn aksyon ki kapav mem amenn enn kikenn pu vinn enn kamarad intim avek enn lot.

⁶ Dan lepok Zezi, aprann konn Bondye byin, sa li pa ti enn kitsoz ki ti nuvo sa. Par egzanp, dan bann Lekritir Ebre nu lir ki kan Samyel ti ankor enn garson, li “pa ti ankor aprann konn Zeova.” (1 Samyel 3:7) Me, eski sa vedir ki Samyel pa ti tro konn so Bondye? Non. Sirman, so bann paran ek bann pret ti aprann li buku kitsoz lor Bondye. Me, get seki enn spesyalis Labib dir. Li dir ki kapav servi sa mo Ebre dan sa verse la pu ‘dekrir relasyon pli intim ki kapav ena.’ Donk, Samyel pa ti ankor konn Zeova byin. Me plitar kan li ti pu servi kuma port-parol Zeova, lerla li ti pu devlop sa kalite relasyon la avek Li. Amezir ki Samyel ti pe grandi, li finn vremem arive konn Zeova byin. Ek li finn gayn enn relasyon personel ek pros avek Li.—1 Samyel 3:19, 20.

7, 8. (a) Kifer eski nu bizin pa dekuraze par bann lanseynman profon ki ena dan Labib? (b) Sit sertin bann lanseynman profon ki ena dan Parol Bondye ki li bon nu etidye.

⁷ Eski u pe aprann konn Zeova pu ki u kapav vinn so kamarad intim? Pu ki u kapav fer sa, u bizin “devlop enn gran dezir” pu nuritir spirityel ki Bondye donn nu. (1 Pyer 2:2) Fode pa u kontant u zis ar bann lanseynman debaz ki ena dan Labib. Fer zefor pu aprann bann lanseynman pli profon ki truv dan Labib. (Ebre 5:12-14) Eski u dekuraze, parski u panse ki sa bann lanseynman la tro difisil pu aprann? Si wi, rapel ki Zeova Li nu “Gran Instrikter.” (Izai 30:20) Li kone kuma pu fer bann dimunn inparfe konpran so bann lanseynman ki byin profon. Ek Li kapav beni u bann zefor sinser pu konpran seki Li pe anseyn u.—Psom 25:4.

⁸ Kifer eski u pa egzaminn latitid ki u ena anver “bann kitsoz profon an rapor avek Bondye”? (1 Korintyin 2:10) Nu pa kapav dir ki se bann size ki pa interesan ditu. Zot pa kuma bann size ki bann teolozyin ek bann pret servi pu fer bann sermon. Bann lanseynman ki truv dan Labib zot pratik ek zot itil. Zot fer nu konn enn kantite kitsoz byin interesan lor panse ek santiman nu Papa ki kontan nu. Dan Labib par egzanp, nu aprann lor ranson, lor “sekre sakre.” Nu aprann usi lor plizir lalyans ki Zeova ti fer pu beni so pep ek pu realiz so volonte. Nu kapav truv enn kantite lezot size kumsa dan Labib. Se bann size ki byin interesan ek ki kapav aprann nu enn kantite kitsoz kan nu pe fer bann resers personel ek kan nu pe etidye.—1 Korintyin 2:7.

9, 10. (a) Kifer eski fer vantar li enn kitsoz ki danzere, ek ki pu ed nu evit sa? (b) An seki konsern konesans Zeova, kifer eski nu bizin fer zefor pu abes numem?

⁹ Amezir u aprann plis lor bann lanseynman profon ki ena dan Labib, ek u ogmant u konesans, u bizin fer atansyon ar enn danze. Sa danze la se: fer vantar. (1 Korintyin 8:1) Se enn kitsoz ki danzere parski li kre distans ant bann dimunn ek Bondye. (Proverb 16:5; Zak 4:6) Rapel ki okenn dimunn pena bann bon rezon pu li fer vantar akoz so konesans. Par egzanp, anu get seki lintrodiksyon enn liv ki ziz bann nuvo resers syantifik, finn dir. Nu lir: “Plis nu aprann, plis nu realize ki nu konn byin tigit kitsoz. . . . Tu seki nu finn aprann, se nanyin ditu konpare avek seki nu pankor aprann.” Kan enn dimunn konn abes li kumsa, sa li byin diferan avek enn kikenn ki vantar. Asterla, si nu get kantite konesans ki Bondye Zeova ena, nu ena ankor plis rezon pu nu abes nu tuletan. Kifer?

¹⁰ Get seki sertin pasaz Labib dir lor Zeova. “To bann panse zot byin-byin profon.” (Psom 92:5) “Lintelizans [Zeova] pena limit.” (Psom 147:5) “Nu pa kapav fuy dan lintelizans [Zeova].” (Izai 40:28) “Bondye ena vremem enn gran rises; so sazes ek so konesans byin-byin profon!” (Romin 11:33) Wi, li kler ki zame nu pa pu kapav konn tu kitsoz lor Zeova. (Eklezyast 3:11) Li finn anseyn nu buku kitsoz extraodiner. Purtan, nu pu ena tuletan enn kantite kitsoz pu aprann ankor. Kuma eski u truv sa lide la? Eski u pa truv sa extraodiner ek an mem tan eski sa pa ankuraz nu pu abes nu? Donk, amezir nu aprann, anu tuzur servi nu konesans kuma enn kitsoz ki fer nu vinn pros avek Zeova, ek ed lezot usi pu fer sa. Fode zame nu servi sa konesans la pu rod grander.—Matye 23:12; Lik 9:48.

Par Bann Aksyon, Montre ki U Kontan Zeova

11, 12. (a) Ki lefe konesans ki nu gayne lor Zeova bizin ena lor nu? (b) Kuma nu pu kone si enn dimunn li vremem kontan Bondye?

¹¹ Lapot Pol ti montre rapor ki ena ant konesans ek lamur. Li ti ekrir: “Ala seki mo pe kontiyn dir dan mo lapriyer, ki zot lamur kontiyn ogmante plis avek konesans egzak ek ful konpreansyon.” (Filipyin 1:9) Sak lanseynman presye ki nu aprann lor Zeova ek lor so bann proze bizin ogmant nu lamur pu nu Papa ki dan lesyel. Fode pa ki sa fer nu vinn vantar.

¹² Li vre ki buku dimunn ki pretann ki zot kontan Bondye, an realite, zot pa kontan Li vremem. Kitfwa vremem zot leker ranpli avek bann santiman byin for pu Li. Sa bann santiman la zot byin bon. Nu kapav mem felisit zot pu sa. Me, fode ki sa bann santiman la zot an akor avek enn konesans egzak. Nu pa kapav dir ki sa bann santiman la sa mem vre lamur pu Bondye. Kifer? Get seki Parol Bondye dir lor sa kalite lamur la: “Ala seki vedir lamur Bondye, ki nu met an pratik so bann komannman.” (1 Zan 5:3) Donk, nu montre ki nu ena enn vre lamur pu Zeova kan nu obeir Li.

13. Kuma eski lakrint pu Bondye ed nu pu montre ki nu kontan Zeova?

¹³ Lakrint pu Zeova ed nu pu obeir Li. Nu devlop enn profon lakrint ek enn profon respe pu Zeova kan nu aprann konn Li. Par egzanp, nu aprann ki Li enn Bondye ki byin sin. Nu bizin aprann konn so gran laglwar, so gran puvwar, so gran lazistis, so gran sazes ek so gran lamur. Li byin inportan ki nu ena sa konesans la. Kifer? Parski sa mem ki pu fer nu ena enn profon lakrint ek enn gran respe pu Li. Dayer, get seki Psom 25:14 dir: “Se bann ki ena lakrint pu Zeova ki vinn so bann kamarad intim.” Donk, nu kapav vinn pros ar nu Papa ki dan lesyel ek ki nu byin kontan, si nu ena lakrint pu depler Li. Lakrint pu Bondye pu ed nu pu swiv bon konsey ki truv dan Proverb 3:6: “Dan tu bann kitsoz ki to fer, pran Li kont, ek Li pu fer to bann semin vinn drwat.” Ki sa vedir?

14, 15. Sit sertin desizyon ki nu bizin pran tulezur. (b) Kuma eski nu kapav pran bann desizyon dan enn fason ki montre nu lakrint pu Bondye?

¹⁴ Tulezur u bizin pran bann desizyon, ki li bann ti desizyon uswa bann gran desizyon. Par egzanp, ki kalite konversasyon u pu ena avek u bann kamarad travay, u bann kamarad lekol, ek u bann vwazin? (Lik 6:45) Kan u ena bann travay pu fer, eski u pu fer li byin, uswa u pu tap latas? (Kolosyin 3:23) Eski u pu vinn pli pros avek bann dimunn ki ena enn tigit uswa pena okenn lamur pu Zeova? Uswa eski u pu fer tu seki u kapav pu ranforsi u relasyon avek bann dimunn ki kontan Zeova? (Proverb 13:20) Ki u pu fer pu avans bann lintere Rwayom Bondye, mem si u pa kapav fer buku? (Matye 6:33) Si u les bann prinsip Labib ki nu finn mansyone avan gid u kan u pran bann desizyon tulezur, u pu montre ki vremem u pe pran Zeova kont ‘dan tu bann kitsoz ki u fer.’

¹⁵ Avredir, sak fwa ki nu pran enn desizyon, nu bizin demann numem: ‘Ki Zeova anvi mo fer? Pu fer Li plezir, ki mo bizin fer?’ (Proverb 27:11) Montre ki nu ena lakrint pu Bondye dan sa fason la, li enn bon mwayin pu montre Zeova ki nu kontan Li. Lakrint pu Bondye pu usi pus nu pu res prop lor plan spirityel, moral ek fizik. Rapel ki dan sa mem verse ki Zak ti ankuraz bann Kretyin pu “vinn pros ar Bondye,” li ti donn enn lot konsey. Li ti dir: “Netway zot lamin, zot ki fer pese, ek fer zot leker vinn prop, zot bann ki ezite pu pran desizyon.”—Zak 4:8.

16. Kan nu donn Zeova, ki kitsoz zame nu pa pu kapav fer, me ki kitsoz kitfwa tuletan nu kapav reysi fer?

¹⁶ Byinsir, se pa zis kan nu pa fer seki move ki nu montre ki nu kontan Zeova. Lamur pus nu pu fer usi seki bon. Par egzanp, ki nu reaksyon kan nu truv gran zenerozite ki Zeova manifeste anver nu? Zak ti ekrir: “Sak don ki bon ek sak don ki parfe sorti lao, parski li sorti kot nu Papa.” (Zak 1:17) Li vre ki kan nu donn Zeova tu seki nu ena, nu pa fer Li vinn pli ris. Dayer, tu seki ena lor later, pu Li. (Psom 50:12) Ek kan nu donn Zeova nu letan ek nu lenerzi, nu pa pe donn Li enn kitsoz ki Li ti byin bizin, ek ki Li pa pu kapav gayne par Limem. Mem si nu refiz al pres bon nuvel lor Rwayom Bondye, Li kapav fer bann ros kriye! Alor, kifer eski nu donn Zeova tu nu bann dibyin, nu letan ek nu lenerzi? Se sirtu parski dan sa fason la ki nu montre ki nu kontan Li avek tu nu leker, tu nu nam, tu nu lespri ek tu nu lafors.—Mark 12:29, 30.

17. Ki kitsoz kapav pus nu pu done avek lazwa?

¹⁷ Kan nu donn Zeova, nu bizin fer li avek leker kontan, “parski Bondye kontan enn dimunn ki donn avek lazwa.” (2 Korintyin 9:7) Prinsip ki truv dan Deteronom 16:17 kapav ed nu pu donn avek lazwa: “Don ki sakenn done bizin dapre benediksyon ki Zeova to Bondye finn donn twa.” Kan nu reflesi ki kantite kitsoz Zeova donn nu, nu resanti enn gran dezir pu donn Li avek lazwa ek avek tu nu leker. Kan nu done dan sa fason la, Li byin kontan. Li resanti preske mem lazwa ki enn paran ena kan so zanfan ki li byin kontan ofer li enn ti kado. Si nu montre Zeova ki nu kontan Li dan sa fason la, sa pu ed nu pu vinn pros avek Li.

Vinn enn Kamarad Intim Avek Zeova Grasa Lapriyer

18. Kifer eski li vo lapenn ki nu reflesi kuma nu kapav amelyor kalite nu bann lapriyer?

¹⁸ Bann lokazyon ki nu gayne pu priye personelman, donn nu enn gran privilez. Nu gayn lokazyon pu koz bann kitsoz ki konfidansyel avek nu Papa ki dan lesyel. (Filipyin 4:6) Lapriyer se enn mwayin byin-byin inportan pu nu vinn pros ar Bondye. Akoz sa, li vo lapenn ki nu pran letan pu reflesi lor kalite nu bann lapriyer. Li pa neseser ki nu servi bann gran-gran mo ek ki nu devlop nu bann lapriyer dan enn fason spesyal. Me, kan nu priye, fode ki seki nu pe dir li sorti dan nu leker. Kuma eski nu kapav amelyor kalite nu bann lapriyer?

19, 20. Kifer eski li bon ki nu medite avan nu priye? Sit sertin size lor ki nu kapav medite.

¹⁹ Kitfwa nu kapav sey medite avan nu priye. Si nu fer sa, nu pu kapav kone egzakteman ki nu pu dir ek nu lapriyer pu ena enn sans. Kumsa nu pu evit labitid repet tuletan bann mem-mem fraz ki nu rapel fasilman. (Proverb 15:28, 29) Par egzanp nu kapav medit lor bann size ki Zezi ti mansyone dan lapriyer model. Nu kapav gete usi kuma zot ena enn rapor avek nu prop sityasyon, ek sirman sa kapav ed nu. (Matye 6:9-13) Par egzanp, nu kapav demann numem: Ki nu espere fer pu akonpli volonte Zeova lor later, mem si nu pa kapav fer buku? Eski nu anvi exprim Zeova nu dezir pu servi Li otan ki nu kapav? Eski nu anvi demann Li so led pu nu kapav asim bann responsabilite ki Li’nn donn nu? Eski nu santi nu kraze par bann traka konsernan nu bann bezwin materyel? Pu ki kalite pese nu bizin pardon, ek kisannla nu bizin pardone inpe plis? Ki bann tantasyon ki pe fatig nu? Eski nu realize ki li byin inportan ki nu gayn proteksyon Zeova dan sa domenn la?

²⁰ Anplis, petet nu kapav mazinn bann dimunn ki nu kone bizin led Zeova. (2 Korintyin 1:11) Me fode pa nu bliye pu remersye Zeova. Si nu pran letan ek nu reflesi lor la, sirman nu pu truv bann bon rezon pu remersye Zeova ek pu donn Li laglwar tulezur pu so gran bonte. (Deteronom 8:10; Lik 10:21) Kan nu fer sa nu gayn enn lot byinfe. Sa kapav ed nu pu apresye lavi ek truv li dan enn fason pli pozitif.

21. Ki bann legzanp biblik kapav ed nu kan nu apros Zeova dan lapriyer?

²¹ Letid usi kapav amelyor nu bann lapriyer. Dan Parol Bondye ena bann legzanp lapriyer remarkab ki bann zom ek bann fam fidel finn fer. Par egzanp, kitfwa nu pu bizin fer fas ar enn difikilte ek sa fer nu gayn buku traka, uswa nu pe per pu nu ek bann dimunn ki nu kontan. Ki nu kapav fer? Kitfwa, nu kapav lir lapriyer ki Zakob ti fer kan li ti bizin al zwenn Ezai, so frer ki ti pe rod pus vanzans kont li. (Zenez 32:9-12) Uswa nu kapav etidye lapriyer ki Lerwa Aza ti fer kan enn larme enn milyon Etyopyin ti menas lepep Bondye. (2 Kronik 14:11, 12) Si enn problem ki kapav gat repitasyon Zeova pe trakas nu, ki nu kapav fer? Petet li bon ki nu egzaminn lapriyer ki Eliya ti fer devan bann adorater Baal lor Montayn Karmel. Nu kapav usi egzaminn lapriyer ki Neemya ti fer konsernan move kondisyon ki ti ena dan Zerizalem. (1 Lerwa 18:36, 37; Neemya 1:4-11) Kan nu lir ek nu medit lor sa bann kalite lapriyer la, sa kapav fortifye nu lafwa. Sa kapav donn nu bann lide kuma nu kapav apros Zeova dan enn pli bon fason ek dir Li seki pe trakas nu.

22. Sit tex pu lane 2003, ek ki kitsoz li bon nu demann numem detanzantan tutlong sa lane la?

²² Wi, pena pli gran loner, pli bon lobzektif ki swiv konsey Zak, setadir “vinn pros ar Bondye.” (Zak 4:8) Anu fer sa, kan nu kontiyne aprann konn Bondye, ek kan nu fer tu pu montre Li ki nu kontan Li ankor plis. Nu bizin usi priye Li, kumsa nu pu vinn so kamarad intim. Pandan lane 2003, anu gard dan nu lespri tex sa lane la, setadir Zak 4:8. Ek anu kontiyne egzaminn numem pu gete si vremem nu pe vinn pros ar Zeova. Me ki nu kapav dir lor dezyem parti sa tex la? Dan ki sans eski Zeova pu “vinn pros ar u”? Ek ki bann benediksyon u pu gayne? Prosin lartik pu koz lor la.

Eski U Ankor Rapel?

• Kifer eski apros ar Zeova se enn kitsoz ki byin serye?

• Sit sertin lobzektif nu kapav met devan nu an seki konsern aprann konn Zeova.

• Kuma eski nu kapav montre ki vremem nu kontan Zeova?

• Kuma eski grasa lapriyer nu kapav vinn pli intim avek Zeova?

[Lankadre lor paz 12]

Tex lane pu 2003 se: “Vinn pros ar Bondye, ek Li pu vinn pros ar zot.” —Zak 4:8.

[Zimaz lor paz 8]

Amezir ki li’nn grandi, Samyel finn aprann konn Zeova byin

[Zimaz lor paz 12]

Lapriyer ki Eliya ti prononse lor Montayn Karmel, li enn bon legzanp pu nu