“Li Pu Vinn Pros ar Zot”

“[Bondye] pa lwin ar sakenn parmi nu.”—AKT 17:27.

1, 2. (a) Kan nu get lesyel ranpli avek zetwal, ki kestyon nu demann numem konsernan nu Kreater? (b) Kuma eski Labib donn nu lasirans ki bann dimunn zot inportan devan lizye Zeova?

ESKI u finn deza get lesyel ranpli avek enn kantite zetwal enn lanwit kot pena okenn nyaz? Sirman u finn resanti enn gran admirasyon kan u finn get tu sa bann zetwal la, pa vre? Sa kantite zetwal la ek grander lespas fer nu ena lakrint pu Bondye. Me dan sa gran liniver la, later li zis enn ti pwin. Eski sa vedir ki Kreater, “sa kikenn ki Pli Siperyer lor later antye la,” Li tro gran pu ki Li pran bann dimunn kont? Eski Li tro lwin ar nu ek personn pa kapav konn Li?—Psom 83:18.

² Labib donn nu lasirans ki bann dimunn byin inportan devan lizye Bondye. Dayer, Parol Bondye ankuraz nu pu rod Li, kan li dir: “Li pa lwin ar sakenn parmi nu.” (Akt 17:27; 1 Kronik 28:9) Wi, kan nu fer bann zefor pu vinn pros ar Bondye, Li usi Li fer kitsoz an retur. Kuma? Bann parol tex lane pu 2003 donn nu sa repons byin ankurazan la: “Li pu vinn pros ar zot.” (Zak 4:8) Anu egzaminn sertin benediksyon extraodiner ki Zeova donn bann ki pros ar Li.

Zeova Fer Nu enn Kado Personel

3. Ki kado Zeova donn bann ki vinn pros ar Li?

³ Premyerman, bann serviter Zeova ena enn kado ki ena buku valer. Se enn kado ki Bondye finn rezerve pu so pep. Lemond avek tu so puvwar, so rises ek so ledikasyon, pa kapav donn nu sa kado la. Se enn kado personel ki Zeova donn zis bann ki vinn pros ar Li. Me ki sa kado la sa? Parol Bondye limem reponn: “Si . . . to kriye pu gayn kapasite pu ziz bann kitsoz, si to kontiyn rod sa kuma larzan, ek si to kontiyn rod sa kuma bann trezor ki finn kasyet, lerla to pu konpran lakrint Zeova ek to pu truv konesans Bondye. Parski Zeova Limem donn sazes.” (Proverb 2:3-6) Reflesi enn kut. Bann imin inparfe pe kapav gayn “konesans Bondye”! Sa kado la, setadir konesans ki truv dan Parol Bondye, li parey kuma “bann trezor ki finn kasyet.” Kifer?

4, 5. Kifer eski nu kapav konpar “konesans Bondye” ar “bann trezor ki finn kasyet”? Donn enn legzanp.

⁴ Enn rezon, se parski konesans Bondye ena enn gran valer. Enn parmi bann pli gran benediksyon ki nu gayne grasa sa kado la, se lespwar pu viv pu tuletan. (Zan 17:3) Me, sa konesans la amelyor kalite nu lavi depi asterla mem. Par egzanp, grasa enn letid profon lor Parol Bondye, nu finn gayn repons bann kestyon ki byin inportan. Par egzanp: Kuma Bondye apele? (Psom 83:18) Ki ariv bann dimunn kan zot mor? (Eklezyast 9:5, 10) Ki volonte Bondye pu later ek pu bann dimunn? (Izai 45:18) Nu finn aprann usi ki, kan nu aplik bann konsey ki truv dan Labib, samem pli bon fason pu nu amenn nu lavi. (Izai 30:20, 21; 48:17, 18) Donk, nu ena bann bon konsey ki ed nu pu fer fas ar bann traka lavi. Sa bann konsey la ed nu pu amenn enn lavi ki fer nu gayn boner ek satisfaksyon. Me pli inportan ankor, nu letid lor Parol Bondye finn ed nu pu konn bann kalite extraordiner ki Zeova ena, ek pu vinn pros ar Li. Ki kitsoz kapav ena plis valer ki enn bon relasyon avek Zeova ki baze lor “konesans Bondye”?

⁵ Ena enn lot rezon kifer nu kapav konpar konesans Bondye ar bann “trezor ki finn kasyet.” Parey kuma buku trezor, konesans Bondye li byin rar dan sa lemond la. Zordi ena sis milyar dimunn lor later. Ena apepre sis milyon serviter Zeova. Donk, 1 dimunn lor 1000 apepre, finn truv “konesans Bondye.” Anu pran enn legzanp pu montre ki se vremem enn privilez byin rar pu konn laverite dan Parol Bondye. Anu get zis enn kestyon biblik: Ki arive kan bann dimunn mor? Dapre Labib, nu kone ki nam mor ek ki bann dimunn mor pa konn nanyin. (Ezekyel 18:4) Purtan, laplipar relizyon dan lemond krwar ki kan enn dimunn mor, ena enn kitsoz dan li ki reste. Sa krwayans la, li form enn parti byin inportan dan bann relizyon ki swadizan Kretyin. Li egziste usi dan Budis, Islam, Induis, Sikis, Sintois, Taois, Zayinis, ek Zidais. Mazinn enn ti kut, par milyar dimunn pe les zot anbete par sa sel fos lanseynman la!

6, 7. (a) Kisannla selman kapav truv “konesans Bondye”? (b) Ki legzanp montre ki Zeova finn donn nu kapasite pu konpran bann lanseynman ki ena dan Labib, alor ki bann “dimunn saz ek malin” pa finn arive konpran sa?

⁶ Kifer eski pena ankor plis dimunn ki finn truv “konesans Bondye”? Se parski personn pa kapav konpran sinifikasyon Parol Bondye san So led. Rapel ki sa konesans la se enn kado ki Zeova donn bann dimunn. Ek Li donn sa kado la zis bann dimunn ki pre pu rod so Parol avek enn leker sinser, ek ki konn abes zot. Kitfwa, pu lemond, sa bann kalite dimunn la zot pa bann dimunn ‘saz.’ (1 Korintyin 1:26) Lemond petet konsider buku parmi zot kuma bann ki “ordiner ek ki pena gran ledikasyon.” (Akt 4:13) Me, sa li pa inportan. Zeova donn nu so konesans akoz bann kalite ki Li truve nu ena dan nu leker.

⁷ Anu pran enn legzanp. Buku spesyalis Labib dan bann relizyon swadizan Kretyin finn fer bann komanter byin detaye lor Labib. Sa bann liv la koz lor sertin kontex istorik, uswa lor sinifikasyon sertin mo Ebre ek Grek, ek lezot kitsoz ankor. Avek tu zot konesans ki zot ena, eski vremem sa bann spesyalis la finn truv “konesans Bondye”? Eski vremem zot konpran byin tem Labib, setadir ki Rwayom Bondye pu zistifye drwa ki Zeova ena pu dirize? Eski zot kone ki Bondye Zeova pa fer parti dan enn Trinite? Nu, nu ena enn konesans egzak lor sa bann size la. Kifer? Se parski Zeova donn nu kapasite pu konpran sa bann lanseynman Biblik la. Purtan, buku “bann dimunn saz ek malin” pa reysi arive konpran sa. (Matye 11:25) Wi, vremem Zeova beni bann ki vinn pros ar Li!

“Zeova Protez Tu Bann Ki Kontan Li”

8, 9. (a) Kuma eski David ti dekrir enn lot benediksyon ki Zeova donn bann ki pros ar Li? (b) Kifer eski bann vre Kretyin bizin proteksyon Bondye?

⁸ Bann ki pros ar Zeova, zot gayn enn lot benediksyon. Zot gayn So proteksyon. David, ki ti enn ekrivin Psom, ek ki ti konn enn kantite difikilte, ti ekrir: “Zeova pre avek tu bann ki priye Li, tu bann ki priye Li avek laverite. Tu bann ki ena lakrint pu Li, Li donn zot seki zot demande. Li tann zot kan zot demann Li led, ek Li sov zot. Zeova protez tu seki kontan Li.” (Psom 145:18-20) Wi, Zeova pre ar tu bann ki kontan Li. Donk, Li kapav azir byin-byin vit kan zot demann Li so led.

⁹ Kifer eski nu bizin proteksyon Bondye? Se parski nu pe viv dan “bann letan kritik ek difisil pu siporte,” ek nu santi so bann move lefe. (2 Timote 3:1) Anplis, Satan, prinsipal lennmi Zeova, pe atak sirtu bann vre Kretyin. Sa lennmi malin la li’nn deside pu ‘devor’ nu. (1 Pyer 5:8) Satan persekit nu, li met presyon lor nu ek li tant nu. Li rod usi bann move fason panse uswa bann move latitid ki nu ena dan nu leker ek li sey explwat sa. Li ena enn lobzektif. Li anvi fer nu lafwa vinn feb ek detrir nu lor plan spirityel. (Revelasyon 12:12, 17) Nu bizin lager kont enn lennmi ki byin-byin pwisan. Donk, eski nu pa santi nu regayn kuraz kan nu kone ki “Zeova protez tu seki kontan Li”?

10. (a) Kuma eski Zeova protez so pep? (b) Ki kalite proteksyon ki pli inportan, ek kifer?

¹⁰ Me, kuma eski Zeova protez so pep? Se vre ki Zeova finn promet nu ki Li pu protez nu. Me sa pa vedir ki nu pu amenn enn lavi san okenn problem dan sa lemond la. Sa pa vedir usi ki Li oblize fer bann mirak pu nu. Me selman, Zeova vremem protez so pep antan ki enn grup, lor plan fizik. Dayer, zame Li pa pu les Satan eliminn tu so bann vre adorater lor later! (2 Pyer 2:9) Me, Zeova protez nu sirtu lor plan spirityel. Li ekip nu pu ki nu kapav fer fas ar bann leprev. Li usi ekip nu pu nu kapav protez nu relasyon avek Li. Alafin, proteksyon ki pli inportan se proteksyon spirityel. Kifer? Parski, tank ki nu ena enn bon relasyon avek Zeova, nanyin, ni mem lamor, pa kapav fer nu ditor pu tuletan.—Matye 10:28.

11. Ki bann laranzman Zeova finn pran pu protez so pep lor plan spirityel?

¹¹ Zeova finn fer buku laranzman pu protez bann ki pros avek Li lor plan spirityel. Atraver so Parol Labib, Li donn nu sazes ki nu bizin pu kapav reysi fer fas ar diferan problem ki nu gayne. (Zak 1:2-5) Kan nu aplik bann konsey pratik ki truv dan Labib, sa mem enn proteksyon. Anplis, Zeova donn “lespri sin bann ki demann Li.” (Lik 11:13) Sa lespri la, se lafors pli pwisan ki ena dan liniver. Donk, li kapav ekip nu pu nu reysi fer fas ar ninport ki difikilte uswa tantasyon ki vinn devan nu. Atraver Kris, Zeova fer nu “don bann zom.” (Efezyin 4:8) Zeova ena enn profon konpasyon pu nu. Sa bann zom ki kalifye lor plan spirityel la, zot fer tu pu manifeste sa mem kalite la anver nu. Ek zot montre sa kan zot ed zot bann frer ek ser.—Zak 5:14, 15.

12, 13. (a) Kuma eski Zeova donn nu nuritir spirityel dan ler ki bizin? (b) Ki u santiman kan u get tu sa bann laranzman ki Zeova finn pran pu protez nu lor plan spirityel la?

¹² Zeova donn nu enn lot kitsoz pu protez nu. Li donn nu nuritir spirityel dan ler ki bizin. (Matye 24:45) Zeova donn nu seki nu bizin dan ler ki nu bizin. Li donn nu sa par bann piblikasyon, parmi ena Latur Degard ek Réveillez-vous ! , bann reynion, ek bann lasanble. Eski u rapel enn lokazyon kot u ti tann enn kitsoz dan enn reynion, uswa enn lasanble ki ti tus u leker ek ki ti fortifye u uswa ki ti sulaz u? Eski finn deza arive ki u lir enn lartik dan enn bann zurnal ki nu’nn mansyone lao ek u dir, ‘Sa finn ekrir zis pu mwa’?

¹³ Enn parmi bann zarm pli efikas ki Satan servi, se dekurazman. Nu pa kapav dir ki zame sa pa pu afekte nu. Satan kone ki enn profon santiman dekurazman kapav afebli nu. Lerla, nu vinn enn kikenn ki li kapav atake fasilman. (Proverb 24:10) Satan pe sey profit bann moman kot nu ena bann panse negatif. Akoz sa nu bizin led. Suvan, bann magazinn Latur Degard ek Réveillez-vous !, finn pibliye bann lartik ki ed nu pu konbat dekurazman. Get seki enn ser finn ekrir konsernan enn sa bann lartik la: “Mo lir sa lartik la preske tulezur, ek sak fwa mo lir sa, mo larm kul tusel. Mo gard li pre kot mo lili pu ki ninport kan mo santi mwa dekuraze mo ena sa avek mwa. Grasa bann lartik kumsa, mo kapav santi lamin Zeova otur mwa ek mo santi so proteksyon.”a Eski nu pa rekonesan ki Zeova donn nu nuritir spirityel dan ler ki bizin? Rapel, ki sa bann laranzman ki Li pran pu nu byinet spirityel la montre ki Li pros ar nu ek ki Li protez nu.

Nu Kapav Apros “Sa Kikenn Ki Tann Lapriyer La”

14, 15. (a) Ki benediksyon Zeova donn bann ki pros ar Li? (b) Kifer eski li enn gran privilez pu apros ar Zeova kan nu anvi?

¹⁴ Eski u finn deza remarke kuma bann dimunn vini kan zot gayn puvwar uswa lotorite? Li byin difisil pu bann ki travay anba zot lotorite, apros ar zot. Me, ki nu kapav dir konsernan Bondye Zeova? Eski Li tro lwin avek nu ki Li pa interes Li avek seki nu, bann sinp dimunn kapav dir Li? Okontrer! Lapriyer, se enn lot benediksyon ki Zeova donn bann ki pros ar Li. Nu kapav apros “sa Kikenn ki tann lapriyer la” kan nu anvi. Sa li vremem enn gran privilez! (Psom 65:2) Kifer?

¹⁵ Anu pran enn legzanp. Enn patron dan enn gran konpayni, se enn kikenn ki ena buku responsabilite. Li deside ki bann problem li pu regle personelman ek ki li pu donn lezot pu regle. Li parey pu Pli Gran Dirizan liniver. Li kapav deside ki bann kitsoz li pu okipe personelman, ek ki bann kitsoz Li pu donn lezot okipe. Par egzanp get tu seki Zeova finn donn Zezi, so garson ki Li byin kontan, pu okipe. Li finn donn li ‘lotorite pu zize.’ (Zan 5:27) Bann anz bizin “sumet ar li.” (1 Pyer 3:22) Zeova les Zezi servi so lespri sin ki byin pwisan. Lespri sin Zeova ed li pu diriz so bann disip lor later. (Zan 15:26; 16:7) Akoz sa mem Zezi ti kapav dir: “Mo’nn gayn tu lotorite dan lesyel ek lor later.” (Matye 28:18) Me, an seki konsern nu bann lapriyer, Zeova finn swazir pu okip sa personelman. Akoz sa ki Labib dir nu ki nu bizin adres nu lapriyer zis ar Zeova, atraver Zezi.—Psom 69:13; Zan 14:6, 13.

16. Kifer eski nu kapav sir ki Zeova vremem ekut nu bann lapriyer?

¹⁶ Eski vremem Zeova ekut nu bann lapriyer? Si Zeova pa ti kas latet ar nu, zame Li pa ti pu ankuraz nu pu “kontiyn priye.” Uswa, zame Li pa ti pu dir nu zet nu fardo ek nu bann traka lor Li. (Romin 12:12; Psom 55:22; 1 Pyer 5:7) Bann fidel serviter lepok lontan, ti ena ful konfyans ki Zeova ekut lapriyer. (1 Zan 5:14) Akoz sa mem, David, enn ekrivin Psom ti dir: “Zeova ekut mo lavwa.” (Psom 55:17) Nu’si, parey kuma David, nu sir ki Zeova pros avek nu, ek ki Li pre pu ekut sak panse ek sak traka ki nu ena.

Zeova Rekonpans So Bann Serviter

17, 18. (a) Kuma eski Zeova konsider servis fidel so bann kreatir intelizan? (b) Explike kuma Proverb 19:17 montre ki Zeova remark bann aksyon ki nu fer pu ed lezot?

¹⁷ Zeova Limem Pli Gran Dirizan Liniver. Seki nu, bann sinp imin nu kapav fer uswa refiz pu fer, pena okenn lefe lor so pozisyon. Purtan, Zeova Li enn Bondye ki montre so lapresyasyon. Li apresye servis fidel so bann kreatir intelizan. Sa servis la ena buku valer devan so lizye. (Psom 147:11) Wi, Zeova rekonpans so bann serviter. Sa se enn lot byinfe ki Zeova donn bann ki pros ar Li.—Ebre 11:6.

¹⁸ Labib montre nu klerman ki Zeova apresye tu seki so bann serviter fer. Par egzanp, nu lir: “Sa kikenn ki ed sa ti dimunn ki bizin led la, se kumadir li pe pret Zeova kitsoz, ek Zeova pu rann Li seki li finn fer.” (Proverb 19:17) Dan Lalwa Moiz, nu truv byin kuma Zeova ti ena pitye pu bann ti dimunn ki ti bizin led. (Levitik 14:21; 19:15) Ki Zeova resanti kan nu imit Li ek nu manifeste pitye anver bann ti dimunn ki bizin nu led? Kan nu donn sa ti dimunn la, san ki nu atann kitsoz an retur, Zeova konsider sa kumadir nu pe pret Li kitsoz. Li promet nu ki Li pu rann nu sa kan Li pu donn nu so faver ek bann benediksyon. (Proverb 10:22; Matye 6:3, 4; Lik 14:12-14) Kan, avek tu nu leker, nu ed enn adorater Zeova ki dan difikilte, sa tus leker Zeova! Wi, nu byin rekonesan kan nu kone ki nu Papa ki dan lesyel, remark bann aksyon ki nu fer pu ed lezot!—Matye 5:7.

19. (a) Kifer eski nu kapav sir ki Zeova apresye seki nu fer dan laktivite predikasyon ek pu fer bann disip? (b) Kuma eski Zeova rekonpans servis ki nu fer pu sutenir so Rwayom?

¹⁹ Zeova apresye sirtu seki nu fer pu so Rwayom. Kan nu vinn pros ar Zeova, li normal ki nu anvi partisip otan ki posib dan laktivite predikasyon ek fer bann disip. (Matye 28:19, 20) Nu anvi servi tu nu letan, tu nu lenerzi ek tu nu dibyin dan sa laktivite la. Defwa, li kapav arive ki nu santi ki nu pe fer byin tigit pu Zeova. Nu leker inparfe kapav amenn nu pu demann numem si vremem Zeova apresye bann zefor ki nu fer. (1 Zan 3:19, 20) Me, Zeova byin apresye tu kitsoz ki nu fer pu Li avek enn leker ranpli ar lamur. Mem si se enn ti kitsoz. (Mark 12:41-44) Labib donn nu sa lasirans la: “Bondye Li pa enn kikenn ki pena lazistis, pu Li bliye zot travay ek zot lamur ki zot finn montre pu so non.” (Ebre 6:10) Wi, Zeova rapel ek rekonpans mem enn pli tipti kitsoz ki nu fer pu sutenir so Rwayom. Li donn nu bann benediksyon asterla mem. Anplis nu kapav atann avek inpasyans lazwa ki nu pu gayne pu viv dan nuvo lemond ki pu vini. Dan sa nuvo lemond la, Zeova pu uver gran so lamin ek Li pu satisfer dezir tu bann ki pros ar Li!—Psom 145:16; 2 Pyer 3:13.

20. Tutlong lane 2003, kuma eski nu kapav gard byin dan nu lespri bann parol ki truv dan tex lane, ek ki rezilta nu pu gayne?

²⁰ Tutlong lane 2003, anu demann numem si nu pe kontiyn fer zefor pu vinn pros ar nu Papa ki dan lesyel. Si wi, nu kapav sir ki Li pu fer seki Li finn promet nu. Dayer, “Bondye . . . pa koz manti.” (Tit 1:2) Si u vinn pros ar Li, Li pu vinn pros ar u. (Zak 4:8) Ek ki rezilta u pu gayne? Deza asterla mem, u pu gayn enn kantite benediksyon. Ek u pu ena lespwar pu vinn ankor pli pros ar Zeova pu tuletan!

[Not anba paz]

Eski U Ankor Rapel?

• Ki kado Zeova donn bann ki vinn pros ar Li?

• Ki bann laranzman Zeova fer pu protez so pep lor plan spirityel?

• Kifer eski se enn gran privilez pu apros ar Zeova kan nu anvi?

• Kuma eski Labib montre ki Zeova apresye servis fidel so bann kreatir intelizan?

[Zimaz lor paz 15]

Zeova finn ed nu pu konpran bann lanseynman ki truv dan Labib

[Zimaz lor paz 16, 17]

Zeova donn nu enn proteksyon spirityel

[Zimaz lor paz 18]

Zeova pros ar nu, ek Li pre pu ekut sak lapriyer ki nu fer