Garde Zot Lizié Simple
1. Ki veut dire éna enn lizié simple, ek kifer li important?
1 Dans so Sermon lor Montagne, Jésus ti attire l’attention lor grand l’influence ki nou lizié spirituel kapav éna dans tou nou la-vie. Li ti dire: “Si to lizié simple, to lé-corps entier pou dans la lumière; mais si to lizié mauvais, to lé-corps entier pou dans ténèbres.” (Mat. 6:22, 23) Enn lizié ki simple li concentré lor enn seul l’objectif, c’est à dire faire volonté Bondié. Li pa laisse li distraire par bann tracas inutile concernant bann biens materiels. (Mat. 6:19-21, 24-33) Ki kapav aide nous pou garde nou lizié simple?
2. Ki point de vue la Bible encourage nous pou éna lor bann biens materiels?
2 Aprann Contente Nous Avek Séki Nous Éna: Donne nou famille séki li bizin lor plan matériel, c’est enn obligation Biblique. (1 Tim. 5:8) Mais sa pa veut dire ki nous pou bizin faire la tête lipié pou gagne bann pli bon kitsoz ki à la mode. (Prov. 27:20; 30:8, 9) Au contraire, la Bible encourage nous pou contente nous avek “mangé ek linge,” bann kitsoz ki permette nous vive. (1 Tim. 6:8; Héb. 13:5, 6) Si nous prend compte sa conseil-la, sa kapav aide nous pou garde nou lizié concentré lor enn seul kitsoz.
3. Ki kapav aide nous pou évite mette bann poids inutile lor nous?
3 Nous pou faire bien si nous évite contracté bann dettes inutile, ou-soit gagne bann di-biens ou-soit même engage nous dans bann l’activités ki demann beaucoup lé-temps ek l’attention. (1 Tim. 6:9, 10) Couma nous kapav faire sa? Kan nous pé pense pou faire kitsoz, li bon ki nous examine sa question-la dans la prière, ek nous guetté franchement si nou décision pou empêche nous réalise nou bann objectifs spirituel. Nous bizin bien déterminé pou mette bann kitsoz spirituel en premier dans nou la-vie.—Phil. 1:10; 4:6, 7.
4. Kifer nous bizin rode bann moyens pou simplifié nou la-vie?
4 Simplifié Nou la-Vie: Enn l’autre moyen ki kapav aide nous pou pa tombe dans piège matérialiste, c’est kan nous simplifié nou la-vie. Enn frère finn trouvé ki so famille kapav vive juste avec bann kitsoz ki nécessaire. Guette séki li dire: “Asterla, mo kapav faire plus dans la congrégation pou aide mo bann frères. Mo sûr ki Jéhovah béni tou so bann serviteurs ki mette bann kitsoz spirituel avant zot l’intérêt personel.” Eski ou aussi ou kapav gagne bann pli grand bénédictions si ou simplifié ou la-vie?
5. Kifer nous bizin contigne faire zeffort pou garde nou lizié simple?
5 Nous bizin contigne faire zeffort pou resisté contre l’influence Satan, so lé-monde matérialiste, ek nou propre l’imperfection. Au lieu ki nous laisse nous lizié promené inpé partou, anou garde zot concentré lor l’accomplissement volonté Bondié ek lor nou grand l’espérance c’est à dire la vie éternelle.—Prov. 4:25; 2 Cor. 4:18.