Pa Blié ki le Temps Pressé!
1 Kan li ti lor la terre, Jésus ti koné ki li pa ti éna beaucoup lé-temps pou accompli travail so Papa. (Jean 9:4) Donc, li’nn accompli so ministère avec sentiment ki le temps pressé, ek li’nn forme so bann disciples pou faire pareil. (Luc 4:42-44; 8:1; 10:2-4) Li ti mette bann confort matériel dans deuxième place dans so la-vie. (Mat. 8:20) C’est coumsa ki li’nn kapav fini travail ki Jéhovah ti donne li.—Jean 17:4.
2 Le Temps Limité: Nous pa reste beaucoup lé-temps pou prêche la bonne nouvelle “partout kot dimoune resté lor la terre.” (Mat. 24:14) Prophétie ki éna dans la Bible montré ki nous pé vive en plein dans l’époque la fin. Bientôt “bann ki pa konn Bondié ek ki pa pé obéir la bonne nouvelle concernant nou Seigneur Jésus . . . pou konn enn punition judiciaire d’enn destruction éternelle.” (2 Thess. 1:6-9) Sa jugement-la pou arrivé avec enn rapidité extraordinaire. (Luc 21:34, 35; 1 Thess. 5:2, 3) Bann dimoune bizin prend conscience ki zot dans enn situation dangereux. C’est nou responsabilité pou aide zot rode faveur Jéhovah alors ki zot encore éna le temps.—Tseph. 2:2, 3.
3 Faire Tou Séki Nous Kapav: Bann serviteurs Bondié reconnaite ki “reste bien tigit lé-temps” et à cause sa, zot donne l’activité prédication la priorité. (1 Cor. 7:29-31; Mat. 6:33) Certains finn renonce à bann l’occasions pou gagne pli beaucoup l’argent ou-soit bann lézot l’objectifs personnel pou zot kapav augmente zot l’activité dans le ministère. (Marc 10:29, 30) Certains éna toujours ‘beaucoup pou faire dans travail nou Seigneur’ malgré bann l’épreuves. (1 Cor. 15:58) Beaucoup pé annonce la bonne nouvelle depuis plusieurs dizaines l’années ‘sans zot baisse lé-bras.’ (Héb. 10:23) Jéhovah bien apprécié tou bann sacrifices ki bann proclamateurs faire pou soutenir bann l’intérêts So Royaume.—Héb. 6:10.
4 Kan nous centré nou la-vie lor nou service pou Jéhovah, séki inclure la prédication aussi, sa kapav aide nous pou pa blié ki jour Jéhovah li bien près. Sa aide nous pou empêche le monde Satan distraire nous lor plan spirituel ek sa fortifié nou détermination pou garde enn bon conduite. (2 Pierre 3:11-14) Oui, kan nous faire nou travail prédication avec sentiment ki le temps pressé, sa kapav sauve nou la-vie ek la vie bann ki pé écoute nous.—1 Tim. 4:16.