La predication aide nou pou enduré
1 Parole Bondié encourage nou pou “galope avek endurance sa lé-course ki devant nou-la.” (Héb. 12:1) Pareil couma enn coureur bizin l’endurance pou li reussi arrive dan bitte, nou aussi nou bizin l’endurance pou nou kapav gagne la vie eternel. (Héb. 10:36) Couma la predication kapav aide nou pou enduré ziska la fin?—Mat. 24:13.
2 La predication fortifié nou lor plan spirituel: Kan nou annonce promesse extraordinaire ki ena dan la Bible, ki pou ena enn nouveau lé-monde kot pou ena la justice, sa aide nou pou garde nou l’esperance bien clair dan nou l’esprit. (1 Thess. 5:8) Kan nou sorti regulierement dan predication, nou gagne l’occasion pou faire lezot konn bann verité ki nou finn aprann dan la Bible. Nou gagne l’occasion pou defann nou la-foi, ek sa en retour, fortifié nou lor plan spirituel.
3 Pou ki nou kapav enseigne lezot dan enn fason efficace, li important ki nou-mem, nou comprend bien bann verité ki ena dan la Bible. Nou bizin faire bann recherche ek medite lor seki nou aprann. Kan nou faire bann zeffort sincere, sa augmente nou connaissance, sa faire nou la-foi vinn pli solid ek sa redonne nou la force lor plan spirituel. (Prov. 2:3-5) Avredir, kan nou essaye aide lezot, nou pé fortifié nou-mem.—1 Tim. 4:15, 16.
4 Kan nou participe avek zèle dan predication, sa forme enn partie important “l’equipement complet ki Bondié donné,” enn l’equipement ki nou bizin pou reste ferme kont Satan le Diable ek bann demon. (Éph. 6:10-13, 15) Kan nou bien occupé dan nou service sacré, sa aide nou pou garde nou l’esprit fixé lor bann kitsoz spirituel ek pou evite laisse le monde Satan gate nou l’esprit. (Col. 3:2) Pli nou enseigne lezot pou obeir bann la-loi Jéhovah, pli sa rappel nou comié li important ki nou garde enn conduite pur.—1 Pierre 2:12.
5 Bondié donne nou la force: Enfin, nou participation dan travail predication enseigne nou pou mette nou confiance en Jéhovah. (2 Cor. 4:1, 7) Sa li vrai-mem enn benediction! Sa qualité confiance-la pa zis aide nou pou accompli nou ministere, mais aussi li aide nou pou faire face ar n’importe ki difficulté ki kapav arrivé dan nou la-vie. (Phil. 4:11-13) Oui, aprann mette tou nou confiance en Jéhovah, sa-mem ki pli important pou aide nou enduré. (Ps. 55:22) Oui, dan plusieurs fason, la predication aide nou pou enduré.