Bann l’etude biblik ki faire nou etudiant progressé—10eme Partie
Forme bann etudiant pou preché porte-en-porte
1 Kan bann ancien finn trouvé ki enn etudiant la Bible rempli bann condition pou vinn enn proclamateur, etudiant-la kapav sorti avek la congregation dan predication. (Guette livre Organisés pour faire la volonté de Jéhovah, page 79-81.) Couma eski nou kapav aide nou etudiant pou reussi commence preché porte-en-porte?
2 Prepare bann presentation ensam: Li bien important faire enn bon preparation. Montré etudiant-la kot-sa li kapav trouve bann model presentation dan Ministère du Royaume ek dan livre Comment raisonner, ek aide li pou choisir enn introduction simple ki adapté ar territoire ou congregation. Depuis commencement-mem, encourage etudiant-la pou servi la Bible dan so ministere.—2 Tim. 4:2.
3 Li pou bien utile pou pratik bann presentation, surtout pou enn nouveau proclamateur. Kan etudiant-la pé repete so presentation, montré li ki li kapav dire pou surmonte bann objection ki souvent ena dan territoire. (Col. 4:6) Rassure li ki bann proclamateur pa obligé konn reponse tou bann question ki bann dimoune kapav posé. Souvent, dan sa bann cas-la, li pli bon dire ki nou pou al faire bann recherche ek ki nou pou content pou retourné pou discute lor sa sujet-la dan enn lot l’occasion.—Prov. 15:28.
4 Preche ensam: Kan enn etudiant sorti en predication pou premier fois, laisse li observé couma ou faire pou servi presentation ki zot toulé-deux finn preparé ensam. Apré sa, encourage li aussi pou kozé. Dan certain cas, kitfois li pou pli bon si nouveau proclamateur-la faire zis enn partie presentation-la, par exemple lire ek faire enn commentaire lor enn text la Bible. Li important ki ou prend compte personnalité ek capacité ou etudiant. (Phil. 4:5) Pa hesité pou felicite li kan ou pé forme li tigit par tigit dan different aspect nou ministere.
5 Li important aide enn nouveau proclamateur pou faire enn program pou sorti en predication regulierement, si possible chaque semaine. (Phil. 3:16) Faire bann l’arrangement pou zot travail ensam dan predication, ek encourage li pou travail aussi avek bann ki zelé dan predication. Zot l’exemple ek zot frequentation pou aide li pou vinn efficace ek pou trouve la joie dan predication porte-en-porte.