Faire maximum dimoune possible tann la bonne nouvelle
1. Ki bann premier disciple Jésus ti faire pou ki maximum dimoune possible tann la bonne nouvelle?
1 Bann premier disciple Jésus ti faire enn grand zeffort pou preche la bonne nouvelle lor Royaume Bondié partout. Zot ti prend bann disposition pratik pou ki maximum dimoune possible tann la bonne nouvelle. Bann ecrivain Les Écritures grecques chrétiennes ti ecrire message Bondié en grec—la langue ki majorité dimoune ti comprend dan l’Empire romain. En plus, li possible ki bann proclamateur zelé ki ti vive dan deuxieme ek troisieme siecle nou lepok, ti parmi bann premier dimoune pou servi bann livre [codex]. Li ti pli facile pou rod bann reference dan enn codex ki dan enn rouleau.
2, 3. (a) Couma eski Isaïe 60:16 pé accompli dan lepok modern? (b) Couma pé servi la technologie pou favorise vrai l’adoration?
2 Fason ki finn servi la technologie: A travers prophete Isaïe, Jéhovah ti predire: “To pou tete di-lait bann nation.” (Is. 60:16) Dan l’accomplissement modern sa prophetie-la, bann serviteur Jéhovah pé servi bann ressource ki ena dan bann nation pou faire travail predication avancé. Par exemple, en 1914, plusieurs l’année avant ki l’industrie cinema ti commence faire bann film avek mouvement ek son, bann Étudiants de la Bible ti commence presente “Photo-Drame de la Création.” Sa ti enn projection bann film en couleur avek mouvement ek son ek aussi bann zimage fixe en couleur, ki ti dure huit heure-temps. Grace a sa, plusieurs million dimoune finn gagne enn grand temoignage.
3 Zordi, bann serviteur Bondié servi bann la-presse ki imprime bien-bien vite, ek bann lezot zoutil electronik aussi, pou publié bann la-Bible ek bann lezot livre dan plusieurs centaine langue. Grace a bann moyen transport rapide, livraison bann publication biblik reussi arrive dan bann region bien loin lor la terre, ek bann dimoune dan plus ki 235 pays kapav gagne sa bann publication-la. Grace a so l’esprit saint, Jéhovah finn pousse so bann serviteur pou servi la technologie dan enn fason efficace, ek zordi, la verité ki trouve dan la Bible, li disponible pou pli beaucoup dimoune ki jamais avant dan l’histoire.
4. Ki bann changement certain finn faire dan zot la-vie pou ki maximum dimoune possible tann la bonne nouvelle?
4 Bann changement lor plan personnel: Bann vrai serviteur Jéhovah finn aussi motivé pou faire bann changement lor plan personnel pou ki maximum dimoune possible tann la bonne nouvelle. Beaucoup finn simplifié zot la-vie pou ki zot kapav participe plus dan travail predication. Certain finn al servi kot bizin plus proclamateur. Lezot finn aprann enn nouveau langue pou faire plus dan zot ministere.
5, 6. Ki ou kapav faire pou ki maximum dimoune tann la bonne nouvelle dan ou territoire?
5 En plus, nou kapav faire maximum dimoune tann la bonne nouvelle si nou preché kan bann dimoune kot zot, ek dan bann place kot kapav joinde zot. Si souvent bann dimoune pa kot zot pendant la journée dan ou territoire, eski ou kapav modifié ou program pou rann temoignage kitfois dan tantot? Eski ena bann place publik kot kapav donne temoignage? Eski ou’nn deja essaye rann temoignage par telephone ek preche dan bann l’endroit commercial? Eski ou rod bann l’occasion pou donne temoignage informel?
6 Oui, nou ena privilege pou participe dan grand temoignage ki pé donné lor nom Jéhovah ek lor so Royaume! Anou contigne partage la verité ki sorti dan Parole Bondié, ek ki kapav sauve la vie, avek maximum dimoune possible.—Mat. 28:19, 20.