Servi bien ou lé-temps
1 Desir ki nou ena pou faire Jéhovah plaisir, pousse nou pou organise nou la-vie autour bann activité spirituel. So Parole montré nou ki nou bizin ‘contigne rod le royaume avant tou kitsoz’ ek “verifié bien bann kitsoz ki pli important.” (Mat. 6:33; Phil. 1:10) Couma eski nou kapav trouve le temps pou faire bann kitsoz spirituel ek laisse bann kitsoz ki pa trop important dan zot place?—Éph. 5:15-17.
2 Mette bann activité spirituel dan premier place: Faire enn program, pou ki bann kitsoz ki pa important pa prend tou ou lé-temps. Certain faire enn program pou ki zot kapav preché au commencement chaque mois. Lerla zot faire attention pou pa laisse okenn lezot kitsoz vinn casse zot program. Nou kapav faire pareil pou bann reunion, pou faire nou l’etude personnel, ek pou al bann l’assemblée. Ena beaucoup ki faire enn program pou ki chaque jour zot lire la Bible, soit gramatin ou-soit tantot. Reserve enn lé-temps bien precis pou chaque activité important, ek pa laisse lezot kitsoz vinn derange sa pou nanyin.—Eccl. 3:1; 1 Cor. 14:40.
3 Pa trop profite le monde: Dan certain pays, bann dimoune gagne beaucoup facilité pou faire sport, pou faire bann activité detente, pou amusé, pou faire bann passe-temps ki zot content, ek faire lezot kitsoz encore. Lezot passe enn quantité lé-temps devant zot television ou-soit devant zot ordinateur. Seulement, nou pou gagne deception si nou trop absorbé ar bann loisir ek bann gadget ki sa lé-monde-la pé mette devant nou. (1 Jean 2:15-17) Alors, la Bible faire nou bien comprend ki fodé pa nou rod profite le monde maximum possible. (1 Cor. 7:31) Si ou ecoute sa bon conseil-la, ou pou kapav montré Jéhovah ki so l’adoration passe en premier dan ou la-vie.—Mat. 6:19-21.
4 Le temps ki resté pou sa system actuel-la pré pou fini. Bann ki mette bann kitsoz spirituel dan premier place dan zot la-vie, pou heureux ek pou gagne faveur Bondié. (Prov. 8:32-35; Jacq. 1:25) Alors, anou servi bien nou lé-temps, ki enn kitsoz ki ena enn grand valeur.