Donn Distraksyon Plas Ki Bizin
1 Dan sa bann zur difisil la, detanzantan nu tu nu bizin kas inpe sa lavi rutinn la. Enn tipe distraksyon fer dibyin. Me, si enn kikenn pas tro buku letan dan distraksyon, divertisman, ek avek lezot dimunn, sa kapav amenn li pas mwins letan dan bann aktivite spirityel. Akoz sa, nu bizin donn distraksyon plas ki bizin. (Mat. 5:3) Kuma eski sa posib? Kan nu ekut konsey ki truv dan Efezyin 5:15-17.
2 Fixe Bann Limit: Pol ti ekrir ki bann Kretyin bizin “fer byin atansyon” pu gete sipa zot pe viv zot lavi avek sazes. Pu distrer nu enn fason zis, nu bizin rezonab ek metriz nu. Li bon nu reflesi serye-serye ki manyer nu pe servi nu letan lib. Normalman apre enn distraksyon, nu bizin santi ki nu finn gayn kitsoz, olye ki nu ena linpresyon nu finn perdi nu letan uswa sa finn fatig nu plis. Si apre enn distraksyon, nu santi tuzur enn vid, nu pa satisfe, ek nu mem santi nu inpe kupab apre ki nu finn partisip dan sa aktivite la, sa montre ki kitfwa nu pu bizin fer bann sanzman dan fason ki nu servi nu letan.
3 Vinn Rezonab: Pol ti donn konsey pu “reaste letan ki bizin” pu bann kitsoz ki pli inportan dan lavi, ek pa vinn bann dimunn ki “pa reflesi.” Bann Kretyin ki finn angaz zot avek Bondye pa kapav permet distraksyon vinn kitsoz pli inportan dan zot lavi. Mem ki repo ek distraksyon kapav redonn nu lafors fizik, lafors aktif Bondye, sa mem lasurs lenerzi spirityel. (Izai 40:29-31) Nu gayn so lespri dan bann aktivite teokratik—etidye Labib, asiste bann reynion kongregasyon, partisip dan predikasyon—pa dan bann distraksyon.
4 Fixe Bann Priyorite: Pol ti anseyn bann Kretyin pu “kontiyn konpran ki vedir volonte Zeova.” Zezi ti anseyne ki tu seki nu fer bizin turn otur Rwayom Bondye, parski sa mem nu priyorite dan lavi. (Mat. 6:33) Li byin inportan ki an premye nu fer bann kitsoz ki pu permet nu viv an akor avek nu langazman ar Zeova. Apre sa, nu kapav donn dis-traksyon plas ki bizin. Si nu fer sa, nu distraksyon pu ena enn bon lefe lor nu, ek nu pu profit li ankor plis.—Ekl. 5:12.