Developpe capacité pou raisonne avek lezot
1. Ki recit dan la Bible nou pou examiné, ek kifer?
1 Discours ki l’apotre Paul ti faire dan synagogue Antioche de Pisidie, ek ki finn ecrire dan Actes 13:16-41, donne enn bon l’exemple lor couma pou raisonne avek lezot. Paul ti prend compte culture ek mentalité bann dimoune ki ti pé ecoute li, ek li finn adapté so presentation ar sa bann dimoune-la. Pendant ki nou pou examine sa recit-la, anou guetté couma nou kapav faire pareil dan nou ministere.
2. Ki nou aprann ar fason ki Paul finn commence so discours?
2 Rod enn terrain d’entente: Mem si message Paul ti tourne autour role important ki Jésus ena dan realisation projet Bondié, li pa ti commence so discours par sa point-la. La majorité dimoune ki ti pé ecoute li ti bann Juif, alors li ti koz lor enn kitsoz ki li ti ena en commun avek zot—l’histoire bann Juif. (Actes 13:16-22) Nou aussi pareil, nou pou pli efficace pou capté l’attention bann dimoune ek pou touche zot leker, si nou rod enn terrain d’entente avek zot. Kitfois nou pou bizin pose bann question avek tact pou encourage zot pou exprime zot pensée, ek nou pou bizin ecoute bien pou nou kapav koné seki vrai-mem important pou zot.
3. Kifer li ti difficile pou bann ki ti pé ecoute Paul, pou accepté ki Jésus li-mem Messie ki finn promette?
3 Kan Paul ti pé koz lor l’histoire bann Juif, li ti rappel zot promesse ki Bondié ti faire, ki Li pou donne zot enn Sauveur ki pou sorti dan descendance David. Mais beaucoup Juif ti pé attann pou gagne enn grand chef militaire ki pou libere zot enba domination bann Romain, ek ki pou faire nation juif vinn pli grand ki tou lezot nation. Zot ti koné aussi ki bann chef religieux juif ti rejette Jésus dan Jérusalem, zot ti livré li ar bann dirigeant romain, ek ti touye li. Couma Paul ti pou kapav convaink zot ki Jésus ti sa Messie ki ti promette-la?
4. Couma Paul finn raisonne bien avek bann Juif ki ti pé ecoute li?
4 Adapté ou presentation: Paul ti koné ki zot ti pé pensé, ek li ti servi la Bible pou raisonne ar zot lor bann kitsoz ki zot ti deja accepté. Par exemple, li ti presente Jésus couma enn descendant David, ek ki Jean le Baptiste, ki beaucoup ti considere couma enn prophete Bondié, ti li aussi identifié Jésus. (Actes 13:23-25) Paul ti montré ki, kan bann chef religieux ti rejette Jésus ek ti condamne li a mort, zot “ti accompli seki bann Prophete ti dire.” (Actes 13:26-28) En plus, li ti expliké ki ti ena dimoune ki finn trouve Jésus avek zot lizié apré ki li finn ressuscité, ek li finn attire zot l’attention lor bann passage la Bible ki bann Juif ti koné ek ki finn realisé par resurrection Jésus.—Actes 13:29-37.
5. (a) Couma Paul ti adapté so presentation kan li ti koz avek bann Grec? (b) Couma nou kapav imite l’exemple Paul kan nou pé preché dan nou territoire?
5 Parkont, kan li ti pé koz avek bann Grec lor l’Aréopage dan Athènes, Paul ti servi enn lot method. (Actes 17:22-31) Mais toujours, li finn presente sa mem message important-la, ek dan toulé-deux l’occasion, so bann zeffort finn donne bann bon resultat. (Actes 13:42, 43; 17:34) Zordi aussi pareil, nou pou pli efficace si nou rod enn terrain d’entente avek bann dimoune ki ecoute nou, ek si nou adapté nou presentation dapré zot culture ek zot fason pensé.