Aide ou etudiant pou apprecié bann qualité extraordinaire Jéhovah
1 Dan nou ministere, nou pa zis faire lezot konn bann l’enseignement principal ki ena dan la Bible. Nou aide zot aussi pou aprann koné couma Jéhovah Li été vrai-mem ek nou aide zot pou apprecié bann qualité extraordinaire ki Li ena. Kan bann dimoune sincere aprann la verité lor Bondié, sa ena enn grand l’effet lor zot. Sa pousse zot pou faire bann changement dan zot la-vie “pou ki zot marche dan enn fason ki Jéhovah approuvé, pou faire Li bien plaisir.”—Col. 1:9, 10; 3:9, 10.
2 Enn nouveau zouti pou faire l’etude: Livre Ki la Bible enseigné? attire l’attention lor bann qualité ki Jéhovah ena, depuis commencement-mem. Premier chapitre reponn bann question couma: Eski vrai-mem Bondié interessé ar ou? Couma Bondié été? ek Eski nou kapav vinn proche ar Bondié? En plus, sa chapitre-la montré nou ki Jéhovah Li saint (§ 10), Li ena la justice ek Li comprend nou (§ 11), Li ena l’amour (§ 13), Li puissant (§ 16), Li ena misericorde, Li ena compassion, Li pré pou pardonné, Li ena patience ek Li fidel (§ 19). Paragraphe 20 tire sa conclusion-la: “Plus ou aprann konn Jéhovah, plus Li pou vinn réel pou ou, ek ou pou ena plus raison encore pou content Li ek pou vinn proche ar Li.”
3 Couma nou kapav servi livre Ki la Bible enseigné? pou aide nou bann etudiant la Bible pou vinn proche avek Jéhovah? Apré ki nou finn examine enn paragraphe ki koz lor enn qualité ki Jéhovah ena, nou kapav demann etudiant-la, “Dapré seki ou trouvé ici, couma Jéhovah Li été vrai-mem?” ou-soit “Couma eski sa paragraphe-la montré ki Bondié Li interessé ar ou personnellement?” Kan nou servi bann question coumsa de-temps en-temps pendant l’etude, nou enseigne nou bann etudiant pou medite lor seki zot pé aprann. Nou aide zot aussi pou augmente zot l’appreciation pou bann qualité extraordinaire ki Jéhovah ena.
4 Servi l’encadré a la fin: A la fin chaque chapitre, invite etudiant-la pou dire seki li pensé lor chaque point ki trouve dan l’encadré “Seki la Bible enseigné.” Attire so l’attention lor bann verset ki mentionné. Pou encourage li dire seki ena dan so leker, ou kapav demann li, “Ki ou pensé lor seki la Bible dire lor sa point-la?” Kan ou faire sa, ou pa zis attire so l’attention lor bann point important ki ena dan sa chapitre-la, mais ou kapav aussi saisi bien seki ou etudiant croire vrai-mem. Ek sa pou aide etudiant-la pou developpe enn relation personnel avek Jéhovah.