Developpe bann bon l’habitude ek gagne beaucoup benediction
1. Kifer li bon ki nou examine nou program spirituel?
1 Kan ou ti fek baptisé, surement ou ti faire beaucoup zeffort pou ena enn bon program spirituel. Ou ti ena l’habitude pou etudié la Bible, assisté bann reunion, preché, ek prié. Jéhovah finn beni ou bann zeffort ek ou finn grandi lor plan spirituel. Kitfois sa faire plusieurs l’année depuis ki ou finn baptisé. Eski ou encore garde bann bon l’habitude spirituel ki ou ti ena zis apré ou bapteme?
2. Ki bienfait nou gagné kan nou lire la Bible toulé-jour?
2 Examine ou program: Eski ou ena l’habitude lire la Bible toulé-jour? Nou gagne beaucoup bienfait kan nou faire sa. (Jos. 1:8; Ps. 1:2, 3) Dan Israël, chaque lé-roi ti bizin faire enn copie la Loi ek li ti bizin lire sa “toute longue so la-vie.” Ki bann bienfait li ti pou gagné? Li ti pou developpe enn leker humble ek li ti pou aprann ena la crainte pou Jéhovah, seki ti pou permette li reste bien attaché ar So bann commandement. (Deut. 17:18-20) Li pareil zordi, si nou lire la Bible toulé-jour, sa pou aide nou pou reste sans defaut ek innocent dan sa mauvais lé-monde-la. Sa pou aide nou aussi pou reste bien equipé dan nou ministere.—Phil. 2:15; 2 Tim. 3:17.
3. Ki bann bienfait nou gagné kan nou assisté tou bann reunion?
3 Jésus ti habitué al synagogue, kot zot ti koz lor bann l’Ecriture. (Luc 4:16) Pena doute ki sa ti fortifié li pou faire face ar bann l’epreuve ki ti pé attann li devant. Nou aussi nou fortifié grace a bann l’enseignement spirituel ki nou gagné dan bann reunion ek ‘l’encouragement ki sakenn gagné ar so camarade.’ (Rom. 1:12) Kan nou rassemblé ensam avek nou bann frere, sa aide nou pou faire face ar bann problem ki nou gagné zordi. (Héb. 10:24, 25) Eski ou encore ena l’habitude assisté tou bann reunion?
4. Ki bienfait nou gagné kan nou participe dan predication chaque semaine?
4 La Bible dire ki bann zapotre ti annonce la bonne nouvelle “toulé-jour dan temple ek de maison-en-maison.” (Actes 5:42) Kitfois nou pa kapav preché toulé-jour, mais eski nou kapav prend l’habitude participe dan nou ministere chaque semaine? Kan nou faire sa, nou pou pli kapav servi Parole Bondié dan enn fason efficace, ek nou pou gagne bann bon l’experience kan nou partage la verité avek lezot.
5. Kifer li important pou prié Jéhovah regulierement?
5 Prophete Daniel ti gagne beaucoup benediction kan li ti ‘contigne’ servi Jéhovah toute longue so la-vie. Li ti ena l’habitude prié Jéhovah regulierement. (Dan. 6:10, 16, 20) Pareil, si nou ena l’habitude pou prié Jéhovah avek tou nou leker, Li pou donne nou so l’esprit saint. (Luc 11:9-13) En plus, pou montré ki Li’nn ecoute nou la-priere, Jéhovah pou vinn proche ar nou ek Li pou permette nou ena enn bon relation avek Li. (Ps. 25:14; Jacq. 4:8) Sa li enn grand benediction, pa vrai? Alors, anou faire bann zeffort pou garde bann bon l’habitude spirituel, ek lerla Jéhovah pou donne nou beaucoup benediction.