Sef Fami—Gard Bann Bon Labitid Spirityel

¹ Danyel ti viv plizir dizenn lane dan Babilonn. Li ti anture ar bann dimunn ki ti ador zidol ek ki ti fer tu sort kalite move kitsoz. Purtan, Danyel ti ena repitasyon enn dimunn ki ti ‘kontiyn servi Zeova tuletan.’ (Dan. 6:16, 20) Ki ti permet Danyel res for lor plan spirityel? Labib montre ki Danyel ti ena bann bon labitid pu fer bann kitsoz ki an rapor avek vre ladorasyon. Par egzanp, li ti ena labitid fer lapriyer trwa fwa par zur dan so lasam. (Dan. 6:10) Pena dut ki li ti ena usi enn bon program pu fer bann lezot aktivite spirityel, kuma par egzanp lir Lalwa. Donk, tusala finn ed Danyel pu gard enn latasman ferm avek Zeova, mem kan so lavi ti menase. Ek Zeova finn sov li par enn mirak.—Dan. 6:4-22.

² Zordi, nu’si nu bizin fer zefor pu “kontiyn veye tuletan.” (Efe. 6:18) Lemond kot nu pe viv “li dan puvwar sa kikenn ki move la.” (1 Zan 5:19) Enn ku san ki nu atann, nu kapav gayn lopozisyon ek bann leprev ki teste nu lafwa. Dan gran detres, Satan, Gog ki sorti dan peyi Magog, pu servi tu bann mwayin posib pu atak bann serviter Bondye. Sa lepok la, kitfwa lespwar pu sape pu paret byin mins. Lerla, nu pu bizin fer Zeova ful konfyans.—Eze. 38:14-16.

³ “Enn kitsoz byin neseser, se fer sir ki lektir, letid ek diskisyon an fami lor Labib okip enn plas byin inportan dan nu lavi.” Sa se bann parol ki ti ena dan introdiksyon dram “Fami—Fer Lektir Labib Tulezur Okip enn Plas Inportan dan Zot Lavi!” ki ti zwe dan Lasanble Distrik an 1998. Li kontiyne: “Kan bann fami swiv enn program kumsa regilyerman ek zot rann zot lektir Labib vivan, sa ena enn gran lefe lor lafami. Enn program kumsa ogmant nu konesans. Li fer nu lafwa vinn pli for. Nu gayn legzanp plizir zom ek fam lepok lontan ki ti res byin fidel ek ki zordi, pus nu pu tini ferm dan laverite.” Asterla, amezir ki nu pu egzaminn detrwa bon labitid spirityel, bann sef fami bizin rod enn uswa de fason pu amelyor program spirityel zot fami.

⁴ Egzaminn Parol Bondye Tulezur: “Kan Rwayom Bondye pu reyne san ki ena okenn lopozisyon ek kan Bondye pu realiz so volonte lor later, parey kuma dan lesyel, okenn dimunn vyolan—ni mem okenn zanimo—pa ‘pu fer later ditor.’ (Izai 11:9; Mat. 6:9, 10)” Sa se bann parol ki ti paret dan brosir Examinons les Écritures chaque jour—2001, dan komanter pu le 11 Septam. Nu’nn truve ki kantite sa bann parol la finn konsol buku dimunn apre! Antan ki enn sef fami, eski u ena labitid egzaminn tex dizur ek so komanter avek u fami tulezur? Sa pu ed u fami tir buku profi. Si li pa pratik pu tu dimunn reyni ansam dan gramatin, kitfwa u kapav reyni tu dimunn inpe plitar dan lazurne. Enn papa ti dir: “Kan nu dine aswar, sa mem pli bon ler pu nu, pu egzaminn tex dizur.”

⁵ Si u ena deza enn bon labitid pu fer tex dizur an fami regilyerman, nu felisit u. Ki u kapav fer ankor pu tir plis profi? Kitfwa, u kapav fer u fami lir usi enn porsyon Labib an mem tan. Sertin ena labitid lir sapit Labib kot tex dizur la finn tire. Ena ki swiv enn lektir Labib. Dusma-dusma zot lir enn liv Labib ki zot inn swazire. Si u fami lir Labib tulezur, sa pu fer zot devlop enn lakrint pu depler Zeova ek sa pu bon pu zot. Sa pu ogmant usi zot dezir pu fer volonte Bondye.—Det. 17:18-20.

⁶ U fami pu tir plis profi ankor avek program lektir Labib ek tex dizur, si u pran detrwa minit pu diskit ansam kuma bann ranseynman la kapav servi zot. Liv École du ministère, paz 60 donn sa sigzesyon la: “U kapav . . . swazir detrwa verse dan lektir pu lasemenn. Diskit lor seki zot vedir, ek poz sa bann kestyon la: ‘Kuma sa li gid nu? Kuma eski nu kapav servi sa bann verse la dan predikasyon? Ki zot aprann nu lor Zeova ek lor fason ki Li fer bann kitsoz? Kuma sa ogmant nu lestim pu Li?’” Sa bann kalite konversasyon spirityel la pu ed tu bann manb u fami pu “kontiyn konpran volonte Zeova.”—Efe. 5:17.

⁷ Letid Familyal: Li bon ki bann sef fami diriz letid familyal regilyerman tulesemenn. Sa se enn fason pu zot montre zot bann zanfan ki bann kitsoz spirityel pas avan. Enn zennzan rapel sa: “Parfwa, Papa ti telman fatige ki li ti kapav apenn gard so lizye uver. Me mem sa, li ti fer letid familyal. Sa finn fer nu konpran ki letid familyal li enn kitsoz byin serye.” Bann zanfan usi kapav fer zot par pu ki reysi fer letid familyal. Dan enn fami, ti ena nef zanfan. Zot tu ti lev sinker dimatin regilyerman pu fer letid familyal parski zot pa ti kapav dan lezot ler.

⁸ Pu ki enn letid familyal donn bon rezilta, enn sef fami bizin ‘fer atansyon ar so lanseynman.’ (1 Tim. 4:16) Liv École du ministère, paz 32, dir: “Pu u letid familyal donn bon rezilta, avan u bizin byin egzaminn u fami. Kuma eski zot ete? Eski zot pe progrese lor plan spirityel? . . . Kan u dan predikasyon avek u bann zanfan, eski zot kapav dir san ezite ki zot Temwin Zeova avek bann kamarad ki zot zwenn? Eski zot kontan program lektir ek letid Labib ki fer an fami? Eski vremem zot aplik bann prinsip Bondye dan zot lavi? Si u egzaminn byin u fami dan sa fason la, u pu truve antan ki sef fami, seki bizin fer pu ed sak manb u fami pu devlop bann kalite spirityel.”

⁹ Bann Reynion Kongregasyon: Prepare ek asiste bann reynion bizin okip enn plas inportan dan u program lasemenn. (Ebre 10:24, 25) Detanzantan, u kapav prepar sertin reynion an fami. Olye atann dernye minit, eski u kapav aranz u pu prepar reynion byin alavans? Si u ena enn bon program, sa pu amelyor kalite u preparasyon ek u pu tir plis profi dan bann reynion.—Pro. 21:5.

¹⁰ Kalite ek regilarite, se de kitsoz ki fer enn bon program spirityel. Me ki pu fer, si u gayn difikilte pu prepar tu bann reynion? Liv École du ministère, paz 31, fer sa sigzesyon la: “Ena bann pyez ki u bizin evite. Evit par egzanp tap latas zis pu montre ki u’nn prepare. Evit usi tandans pu pa prepar ditu, sinpleman parski u pa kapav prepar tu. Me plito, gete ki kantite u kapav etidye, ek etidye sa byin. Fer sa tulesemenn. Avek letan, fer zefor pu ogmant kantite letan ki u etidye pu prepar lezot reynion usi.”

¹¹ Kan bann fami vinn reynion boner, sa permet zot byin prepar zot lespri pu donn Zeova laglwar ek pu tir profi ar lanseynman ki Li done. Eski u fami ena labitid vinn reynion boner? Pu sa, zot bizin organiz zot ek sakenn bizin fer so par. Si u truve ki dan zur reynion u fami pe bizin tultan pres-prese ek zot strese, eski u kapav fer bann sanzman dan u program? Eski ena kitsoz ki kapav prepare alavans? Si enn manb ena buku kitsoz pu fer, eski lezot kapav ed li? Si sakenn pare pu al reynion inpe pli boner, eski sa pu diminye zot stres? Kan bann kitsoz byin organize, sa favoriz lape dan lafami ek dan kongregasyon.—1 Kor. 14:33, 40.

¹² Predikasyon: Fixe bann zur pu al prese, sa usi fer parti dan enn bon program spirityel. Enn zenn ki apel Jayson rapel sa: “Dan mo fami, ti tuzur rezerv bann Samdi gramatin pu predikasyon. Sa ti bon pu mwa parski plis mo ti al prese, plis mo ti truv dibyin ki sa travay la akonpli ek mo finn plis kontan li.” Buku ki finn grandi dan laverite partaz sa santiman la. Zot finn truve ki kan zot finn rezerv enn letan fix tulesemenn pu al prese, sa finn ed zot pu progrese ek vinn bann bon proklamater.

¹³ Enn bon program kapav usi ed u fami pu truv lazwa dan predikasyon ek gayn bann bon rezilta. Dan ki fason? Latur Degard 1 Zilyet, 1999, paz 21 an Franse ti fer sa sigzesyon la: “Eski u pran enn tipe letan detanzantan dan u letid familyal pu ed u fami pu prepar zot pu predikasyon? Si u fer sa, zot pu tir buku profi. (2 Timote 2:15) Sa pu ed zot partisip dan zot servis enn fason pli aktif ek gayn bann bon rezilta. Defwa, u kapav mem rezerv enn letid familyal an antye pu fer zis sa preparasyon la. Me pli suvan, u kapav rezerv enn tipe letan apre letid familyal uswa dan lezot moman dan lasemenn pu koz lor lezot domenn an rapor avek predikasyon.” Eski u fami finn sey sa sigzesyon la?

¹⁴ Kontiyn Progrese: Apre ki nu’nn egzaminn sa lartik la, eski u truv bann domenn kot u fami pe fer byin? Si wi, felisit zot ek fer zefor pu kontiyn amelyore. Si u truve ki ena plizir domenn ki bizin amelyore, swazir enn u de domenn lor ki u kapav kumans travay. Kan sa enn, uswa de kitsoz la finn fini rant dan u bann labitid spirityel, travay lor lezot pwin. Res pozitif ek rezonab. (Fil. 4:4, 5) Pu etabli bann bon labitid spirityel pu u fami, sa demann buku zefor. Me, li vo lapenn, parski Zeova donn nu sa lasirans la: “Enn kikenn ki pe swiv enn semin fix, mo pu fer li truv delivrans Bondye.”—Psom 50:23.