Aide lezot pou vinn bann camarade Bondié
1 Zordi, bann dimoune dan tou bann nation pé gagne l’enseignement lor bann principe Jéhovah. (Is. 2:2, 3) Mais pou ki zot “rapporte bann fruit avek l’endurance,” zot bizin aprann content Jéhovah. (Luc 8:15; Marc 12:30) Si zot pena sa l’amour-la, zot pa pou ena la force pou resisté kont bann mauvais l’influence ni zot pou ena courage pou faire seki bon. Enn fason ki nou kapav aide lezot pou developpe enn bon relation avek Jéhovah c’est kan nou aide zot pou apprecié so bann qualité. Encourage zot pou prend le temps pou medite lor bann renseignement ki ena dan livre Approchez-vous de Jéhovah.
2 Ou l’exemple: Ou bann action kapav touche leker ou bann etudiant. Kan zot trouvé ki ou l’amitié avek Jéhovah ena enn grand valeur pou ou ek zot trouvé ki l’effet sa ena lor ou la-vie, sa kapav pousse zot pou developpe mem qualité l’amitié avek Jéhovah, zot aussi. (Luc 6:40) Avredir seki nou faire, souvent ena enn pli grand l’influence lor lezot, ki seki nou dire.
3 Enn moyen important ki bann parent kapav enseigne zot zenfant pou content Jéhovah c’est par zot l’exemple. (Deut. 6:4-9) Enn couple ki ti envie elevé zot zenfant dan la verité ti demann conseil ar bann parent ki ti reussi dan sa domaine-la. Mari-la dire: “Tou dimoune ki mo’nn demandé inn dire, ki l’exemple bann parent li bien important.” Alors, par zot fason vive, bann parent kapav vinn enn l’exemple pou zot zenfant ek montré ki vedir vinn “camarade Jéhovah.”—Jacq. 2:23.
4 Bann la-priere sincere: Ou kapav aide lezot pou developpe enn l’amitié avek Jéhovah kan ou enseigne zot pou prié avek tou zot leker. Ou kapav attire zot l’attention lor la priere model ki Jésus inn laissé ek lor enn quantité lezot la-priere sincere ki trouve dan la Bible. (Mat. 6:9, 10) Kan ou bann zenfant ek ou bann etudiant ecoute ou prié, ou pé enseigne zot couma faire la priere. Kan zot tann ou koz ar Jéhovah avek tou ou leker, zot ressenti bann sentiment ou ena pou Li. Encourage zot pou perseveré dan la priere kan zot pé faire face ar bann l’epreuve. (Rom. 12:12) Kan zot pou senti la main Jéhovah dan bann situation difficile, zot pou arrivé faire Li confiance ek content Li couma enn vrai camarade.—Ps. 34:8; Phil. 4:6, 7