Finn confié nou enn tresor
1 Bondié ti donne l’apotre Paul mission pou preché. Sa mission-la ti ena enn grand valeur pou li ek li ti appel sa enn “tresor.” (2 Cor. 4:7) Li ti endure bann l’epreuve ek persecution pou ki li kapav accompli sa mission-la. Li ti contigne preché avek n’importe ki dimoune ki li ti joinde, jamais li ti arreté. Li ti faire beaucoup voyage ki ti difficile ek dangereux. Couma nou kapav imite Paul ek montré ki nou ministere ena vrai-mem enn grand valeur pou nou? (Rom. 11:13) Kifer nou ministere li enn tresor ki nou pa kapav comparé?
2 Enn tresor ki pli grand: Bann tresor materiel souvent amenn beaucoup la-peine ek zot faire bann dimoune gagne bann bienfait ki limité ek ki temporaire. Parkont, nou ministere amenn bann bienfait ki durable pou nou ek pou lezot. (1 Tim. 4:16) Li aide bann dimoune ki sincere pou konn Jéhovah, pou faire bann changement ki bizin dan zot la-vie ek pou gagne enn vrai l’espoir, la vie eternel. (Rom. 10:13-15) Kan nou considere nou ministere couma enn kitsoz ki ena enn grand valeur, nou gagne enn but dan nou la-vie, nou toujours ena sentiment ki nou pé faire kitsoz ki vaut la peine, ek nou ena enn l’espoir pou l’avenir ki fortifié nou.—1 Cor. 15:58.
3 Montré ki ou tresor ena enn grand valeur pou ou: Souvent nou montré ki enn kitsoz ena valeur pou nou par sacrifice ki nou paré pou faire pou sa kitsoz-la. Li enn grand privilege pou nou pou servi nou lé-temps ek nou l’energie pou loué Jéhovah, pa vrai? (Éph. 5:16, 17) Fason ki nou servi nou lé-temps bizin montré ki bann kitsoz spirituel ena plus valeur pou nou ki bann l’objectif materiel. Nou ena enn kitsoz ki ena grand valeur pou nou partagé. Alors nou pou envie preché avek zèle ek rod tou l’occasion pou koz lor la bonne nouvelle.
4 En general, bann dimoune pa cachiette bann tresor ki ena enn extra grand valeur mais zot expose sa bann tresor-la pou ki lezot kapav admiré. Si nou considere nou ministere couma enn tresor, li pou ena enn place important dan nou la-vie. (Mat. 5:14-16) Avek enn leker rempli ar reconnaissance, anou touletan imite l’apotre Paul ek saisi tou l’occasion pou montré ki nou ministere ena vrai-mem enn grand valeur pou nou, ki nou considere li couma enn tresor.