Eski ou ministere ena valeur pou ou?
1. Couma bann dimoune dan le monde considere nou ministere?
1 Beaucoup dimoune dan le monde Satan considere nou ministere couma “enn kitsoz bete.” (1 Cor. 1:18-21) Si nou pa faire attention, sa mauvais fason pensée-la kapav decourage nou ek diminué nou zele. (Prov. 24:10; Is. 5:20) Nou enn Témoin de Jéhovah, ek pou nou sa c’est enn grand privilege. Kifer?—Is. 43:10.
2. Kifer kapav dire ki nou ministere li enn “travail sacré”?
2 Enn “travail sacré”: Kan l’apotre Paul ti koz lor nou ministere, li ti servi l’expression “travail sacré.” (Rom. 15:15, 16) Couma eski c’est enn “travail sacré”? Kan nou participe dan nou ministere, en realité nou pé “travail ensam” avek Jéhovah, ’sa Kikenn ki Saint-la,’ ek sa permette ki so nom vinn saint. (1 Cor. 3:9; 1 Pierre 1:15) Pou Jéhovah nou ministere c’est “enn sacrifice louange,” alors, li enn l’aspect bien important dan nou l’adoration.—Héb. 13:15.
3. Kifer preche la bonne nouvelle c’est enn grand l’honneur?
3 C’est enn grand privilege pou preche la bonne nouvelle, mais pa zot tou ki gagne sa privilege-la. Bann ange ti pou bien content faire sa travail-la ek pena doute ki zot ti pou faire li extra bien. (1 Pierre 1:12) Mais selman, Jéhovah finn donne nou sa grand privilege-la, nou bann humain imparfait, “bann recipient la terre”!—2 Cor. 4:7.
4. Couma nou kapav montré ki nou ministere ena valeur pou nou?
4 Nou priorité: Nou considere nou ministere couma enn parmi “bann kitsoz ki pli important” dan nou la vie. C’est a cause sa ki sa privilege-la ena vrai-mem enn grand valeur pou nou. (Phil. 1:10) C’est pou sa ki toulé-semaine nou reserve le temps pou participe dan nou ministere. Pou enn musicien, joué dan enn l’orchestre ki bien renommé, c’est enn grand privilege. Pena doute ki avant chaque spectak, li pou faire bann repetition ek li pou faire zeffort pou developpe so talent. Pou nou aussi pareil, nou pou prepare nou bien avant ki nou sorti dan predication pou ki nou “konn servi parole la verité couma bizin.” En plus, nou pou faire zeffort pou ameliore nou “l’art pou enseigné.”—2 Tim. 2:15; 4:2.
5. Kisannla apprecié nou ministere?
5 Pa laisse mauvais fason pensée bann dimoune decourage nou. Pa blié ki ena encore beaucoup dimoune dan nou territoire ki content kan nou vinn visite zot. Selman, c’est pa faveur bann dimoune ki nou pé rodé, mais seki pli important c’est seki Jéhovah pensé. Nou bann zeffort ena enn grand valeur devant so lizié.—Is. 52:7.