Suive Christ kan ou montré dignité
1. Couma theme l’assemblée sa l’année-la ena enn rapport avek manifesté dignité?
1 La Bible dire ki Jéhovah, pli grand le Roi dan l’univers, inn mette dignité coumadir enn linge lor Li. (Ps. 104:1) Jésus ti touletan koz ek ti agir dan enn fason ki ti honore so Papa ek bann disposition ki Li ti’nn prend. (Jean 17:4) Pendant prochain l’assemblée district “Suive Christ!,” nou tou pou gagne l’occasion imite Jésus ek donne la gloire Jéhovah.
2. Couma sa honore Jéhovah kan nou prepare-nou pou present dan chaque session?
2 Enn l’adoration ki digne: Nou kapav donne Jéhovah l’honneur kan nou faire enn maniere pou present pendant festin spirituel ki Li’nn preparé pou nou. Eski ou finn koz avek ou patron ek ou finn faire bann l’arrangement pou ki ou kapav vinn l’assemblée toulé-trois jour, setadir vendredi aussi? Eski ou finn prepare ou pou vinn boner pou ou kapav rod enn place ek present pendant cantik ek la priere commencement? Eski ou finn prevoir pou amenn ou mangé avek ou pou ou mange avek ou bann frere ek soeur dan la Salle l’assemblée? Dan commencement chaque session kan president invite nou pou assizé avant ki la musik commencé, sans tardé, nou bizin arrete nou bann conversation ek al assizé avant program commencé.
3. Couma kan nou attentif pendant program, sa rann nou l’adoration digne?
3 Kan nou attentif pendant program, sa aussi honore nou Papa ki dan le ciel. Apré ki li’nn observe enn l’assemblée district, enn journaliste ti ecrire ki enn dimoune ki ti pou observe bann assistant, ti pou impressionné par zot “bon conduite, parski zot ecoute bien tou seki pé dire, sans faire okenn tapage, ek sa montré ki zot ena enn grand l’interet pou bann kitsoz spirituel.” Li ti faire aussi enn commentaire lor “enn grand quantité zenfant . . . , ki, pa koné couma, ti ena enn bon conduite ek ti mem bien occupé pou rod bann verset dan la Bible.” Kan program commencé, c’est pa asterla ki bizin koz pou nanyin, envoye SMS, mangé, ou-soit marche-marché. Bann jeune bizin assize kot zot parent pou ki zot parent kapav aide zot pou profite program-la. (Deut. 31:12; Prov. 29:15) Sa bann zeffort-la montré ki nou ena respé pou lezot ek ki nou apprecié la nourriture spirituel ki nou gagné ek ki bien important pou nou.
4. Kifer nou bizin ena enn l’apparence digne kan nou dan l’assemblée?
4 Enn l’apparence ki digne: Dan l’assemblée district l’année derniere, beaucoup inn dire ki zot inn apprecié bann rappel ki zot ti gagné dan discours “ Montrez-vous des chrétiens dignes en toutes circonstances. ” Sa discours-la ti mette l’emphase lor couma bann serviteur Bondié bizin faire zeffort pou montré ki zot bann chrétien digne par zot l’habillement ek zot coiffure. Sa l’année-la aussi nou bizin veille bien lor sa point-la. Nou l’apparence montré seki nou ressenti pou Jéhovah ek pou privilege ki nou ena pou forme partie dan so bann Témoin. Touletan nou bizin habille couma bann ki “dire ki zot adore Bondié avek respé.”—1 Tim. 2:9, 10.
5. Ki bann bon resultat nou gagné kan nou montré ki nou bann chrétien ki digne?
5 Bann bon resultat: Kan nou montré ki nou bann chrétien digne dan l’assemblée, sa crée bann l’occasion pou rann temoignage informel, ek bann dimoune ki pé guette nou, pou ena enn bon l’opinion lor nou. Apré enn l’assemblée, enn responsable ti dire: “Jamais nou pa finn trouve bann dimoune ena enn bon comportement coumsa. Zot pareil couma Bondié envie ki nou été.” Kan nou montré-nou digne, sa montré ki nou ena respé ek l’amour pou lezot, ek sa donne Jéhovah la gloire. (1 Pierre 2:12) Sa montré ki nou ena la crainte pou Bondié ek ki nou ena reconnaissance pou privilege ki nou ena pou gagne l’instruction avek nou Papa. (Héb. 12:28) Alors ki nou pé attann l’assemblée district “Suive Christ!,” anou faire zeffort pou montré-nou digne.
[Box on page 5]
Bann rappel pou l’assemblée district
◼ Program: Toulé-trois jour program pou commencé 9:20 a.m. Pou ouvert la porte la Salle l’assemblée 8:00 a.m. Kan la musik commence joué, nou tou bizin prend nou place pou ki program kapav commencé dan enn fason ki digne. Program pou terminé 5:05 p.m. vendredi ek samedi, ek 4:10 p.m. dimanche.
◼ Parking: Parski bann place parking limité, nou encourage bann frere pou organise-zot pou voyage ensam pou evité ki enn l’auto amenn zis enn ou deux dimoune.
◼ Reserve bann place: Ou kapav reserve bann place zis pou ou famille, ou-soit pou bann dimoune ki pé voyage ensam avek ou.
◼ Repas pou midi: S’il vous plait, amenn ou repas pou midi au lieu ou al acheté mangé en-dehors pendant pause. Ou kapav servi enn ti cooler-bag ki kapav rente enba ou chaise. Fodé pa amenn bann grand cooler-bag, ni bann kitsoz en verre. Bann boisson alkolik interdit dan l’assemblée.
◼ Bann donation: Ena beaucoup depense kan organise enn l’assemblée district. Nou kapav montré nou reconnaissance kan nou faire bann contribution volontaire soit dan la Salle du Royaume ou-soit dan la Salle l’assemblée. Bann donation ki faire par cheque dan bann l’assemblée district, bizin faire lor nom “Association les Témoins de Jéhovah.”
◼ Bann accident ek urgence: Si ena enn urgence medical, ou bizin appel enn kikenn dan service l’accueil, ek c’est li ki pou contacté service premier secours.
◼ Enregistré program: Pa gagne droit branche okenn l’appareil lor la ligne electrik ou-soit lor system sonorisation la Salle l’assemblée. Si ou enregistré program, fodé pa ki sa derange lezot.
◼ Bann forme pou suive l’interet: Bizin servi forme Veuillez suivre l’intérêt (S-43) pou donne bann renseignement lor n’importe ki dimoune ki manifesté l’interet kan nou donne temoignage informel pendant l’assemblée. Bann proclamateur bizin amenn dé-trois sa bann forme-la avek zot kan zot vinn l’assemblée. Apré, zot kapav donne sa forme-la secretaire zot congregation.—Guette Ministère du Royaume février 2005, p. 6.