Anou donne Jéhovah la gloire dan grand l’assemblée
1, 2. Ki l’occasion l’assemblée district donne nou, ek couma nou kapav faire sa?
1 Chaque l’année, nou l’assemblée district donne nou enn l’occasion extraordinaire pou donne Jéhovah la gloire. Nou ena mem sentiment ki David, ki ti chanté: “Mo’lé donne toi la gloire dan grand l’assemblée. Parmi enn quantité dimoune mo pou donne toi l’honneur.” (Ps. 35:18) Alors ki nou l’assemblée district pé kosté, couma nou kapav faire sur ki en tant ki enn peuple uni, nou donne Jéhovah la gloire?
2 Enn moyen ki nou kapav faire sa c’est par nou conduite. Manager enn batiment kot faire bann l’assemblée finn dire: “Kan bann lezot religion finn demann nou pou loué batiment, nou finn dire zot vini, ek guetté couma bann Témoins de Jéhovah organise zot l’assemblée; vrai-mem zot konn organise-zot couma bizin.” Par nou l’apparence, nou cooperation, ek nou conduite, sakenn parmi nou kapav faire so part pou ki lezot donne Bondié la gloire, enn la-gloire ki Bondié merité.—1 Pierre 2:12.
3, 4. Couma la modestie pou aide nou habille dan enn fason ki approprié pou bann ministre Bondié, pendant l’assemblée ek mem apré bann session?
3 Nou l’apparence: Pou ki nou l’habillement ek nou coiffure donne Jéhovah la gloire, nou bizin modeste. (1 Tim. 2:9) Livre École du ministère, page 132, dire: “Enn kikenn ki modeste faire attention pou li pa offense lezot pou nanyin, ek li pa attire l’attention lor li-mem.” Dan beaucoup pays, bann linge indecent inn vinn la mode. Mais Jéhovah apprecié tou bann zeffort ki nou faire pou represente Li dan enn fason ki digne. (Actes 15:14). Alors, kan nou rassemblé devant Jéhovah, nou bizin habille-nou dan enn fason ki digne Celui ki pli grand dan l’univers.—1 Chron. 29:11.
4 Nou bizin aussi veille lor nou l’apparence mem apré l’assemblée toulé-jour. Mem si nou envie mette enn linge pli relax pendant bann l’heure detente, li important ki nou l’habillement ek nou coiffure li toujours approprié pou bann ki “adore Bondié avek respé.” (1 Tim. 2:10) Nou pa kapav dire ki enn linge li acceptable zis parski li a la mode dan le monde. (1 Jean 2:16, 17) Dan nou bann publication nou trouve photo bann frere ek soeur ki finn habille-zot bien, avek modestie, dan different situation. Li important ki nou mette nou badge kan nou pé quitte lakaz pou al l’assemblée. Sa pou rappel nou ki touletan nou bann ministre Bondié.—2 Cor. 6:3, 4.
5, 6. Couma nou kapav montré respé pou la nourriture spirituel ki Jéhovah donne nou?
5 Respecté nourriture spirituel ki Jéhovah donne nou: Souverain l’univers inn prepare enn festin spirituel pou nou. (Is. 25:6; 1 Cor. 10:21) Si vrai-mem sa festin spirituel-la ena valeur pou nou, nou pou faire tou pou assisté toulé-trois jour l’assemblée. Eski ou finn organise transport, ek prend congé dan ou travail? Eski ou finn calculé comié lé-temps ou pou prend pou prepare-ou gramatin ek voyagé, pou ki ou arrive l’assemblée assez bonne-heure pou trouve enn place, pou koz avek bann frere ek soeur, ek pou donne Jéhovah la gloire ensam avek zot pendant premier cantik ek la priere?—Ps. 147:1.
6 Kan nou respecté nourriture spirituel ki Jéhovah donne nou, nou pou faire tou pou concentré ek suive program l’assemblée. Nou pou evite koz avek lezot pou nanyin, nou pa pou mangé pendant bann session ni marche-marché dan la Salle l’assemblée. A travers l’esclave fidel ek avisé, Jéhovah pé donne nou la nourriture spirituel ki nou bizin asterla. (Mat. 24:45) Fodé pa nou rate okenn partie sa program-la. Bann parent bizin assize ensam avek zot bann zenfant ek aide zot pou tire maximum profit.—Deut. 31:12.
7. Ki nou tou nou encouragé pou faire pou repas midi, ek kifer?
7 Nou tou nou encouragé pou amenn nou repas pou midi, au lieu nou al acheté mangé en-dehors. L’année dernier la plupart bann delegué ti suive sa instruction-la, ek zot merite felicitation. Sa l’année-la, li ti pou encore pli bon si tou dimoune ti suive sa instruction-la! (Héb. 13:17) Sa pou permette nou profite compagnie nou bann frere ek soeur, ki pou encourage nou. Sa contribué aussi pou ki ena l’unité ek la paix, ek sa li enn kitsoz ki donne Jéhovah la gloire.—Ps. 133:1.
8, 9. Ki bann lezot l’occasion l’assemblée district donne nou pou donne Jéhovah la gloire?
8 Rann temoignage informel: Kan nou pé al l’assemblée ou-soit kan nou pé retourne lakaz, nou ena plusieurs l’occasion pou donne Jéhovah la gloire avek nou la-levre. (Héb. 13:15) Anou toujours rod bann l’occasion pou rann temoignage. Nou l’esprit ek nou leker pou rempli avek bann tresor spirituel apré l’assemblée. Anou partage sa bann bon kitsoz-la avek lezot kan nou rann zot temoignage.—1 Pierre 3:15.
9 Oui, nou pé attann avek impatience sa l’occasion pou beni Jéhovah “parmi bann la-foule rassemblé.” (Ps. 26:12) Anou tou ensam donne Jéhovah la gloire dan l’assemblée district “L’obeissance pou Bondié.”
[L’encadré page 5]
Bann rappel pou l’assemblée district
◼ Program: Chaque jour program pou commencé 9:30 a.m. La porte la Salle l’assemblée pou ouvert 8:00 a.m. Dé-trois minute avant program commencé, president session pou prend place lor l’estrade pendant ki la musik pé joué. La, nou tou nou bizin prend nou place pou ki program kapav commencé dan enn fason ordonné. Program pou terminé 5:05 p.m. vendredi ek samedi ek li pou fini 4:10 p.m. dimanche.
◼ Reserve bann place: Ou kapav reserve bann place zis pou ou famille, ou-soit pou bann dimoune ki pé voyage ensam avek ou dan mem vehicule.
◼ Bann donation: Ena beaucoup depense kan organise enn l’assemblée district. Nou kapav montré nou reconnaissance kan nou faire bann contribution volontaire soit dan la Salle du Royaume ou-soit dan la Salle l’assemblée. Bann donation ki faire par cheque dan bann l’assemblée district, bizin faire lor nom “Association les Témoins de Jéhovah.”
◼ Repas pou midi: Amenn ou repas pou midi au lieu ou al acheté mangé en-dehors. Ou kapav servi enn ti cooler-bag ki kapav rente enba ou chaise. Fodé pa amenn bann grand cooler-bag, ni bann kitsoz en verre. Bann boisson alkolik interdit dan l’assemblée.
◼ Enregistré program: Pa gagne droit branche okenn appareil pou enregistré lor la ligne electrik ou-soit lor system sonorisation. Si ou pé enregistré, fodé pa ki sa derange lezot.
◼ Photo: Si ou pé tire photo, pa servi flash pendant bann session.
◼ Pager ek portable: Ou bizin soit teigne ou pager ou-soit ou portable, soit reglé zot pou ki sa pa derange lezot.
◼ Bann accident ek urgence: Si ena enn urgence medical, ou bizin appel enn kikenn dan service l’accueil, ek li pou contacté l’aide premier secours.