“Li donne la force seki fatigué”
1 Nou tou fatigué de temps en temps. Sa pa zis arrivé a cause nou travail ou-soit lezot zeffort physik ki nou faire, mais aussi a cause bann problem ki nou bizin faire face dan sa ‘lepok critik ki difficile pou supporté-la.’ (2 Tim. 3:1) Nou, bann serviteur Jéhovah, couma nou kapav gagne la force spirituel ki nou bizin pou pa ralenti dan nou ministere? Nou gagne sa kan nou compte lor sa kikenn ki ‘puissant par la force-la,’ Jéhovah. (Is. 40:26) Li koné seki nou bizin ek Li ena enn l’interet sincere pou aide nou.—1 Pierre 5:7.
2 Disposition ki Jéhovah prend pou aide nou: Jéhovah donne nou la force par so l’esprit saint. C’est sa la-force-la-mem ki Li ti servi pou crée l’univers. L’esprit saint Bondié aide nou pou “regagne la force” si nou fatigué. (Is. 40:31) Demann ou-mem: ‘Kan dernier fois mo finn prié surtout pou gagne l’esprit saint ki pou donne moi la force pou mo rempli mo bann responsabilité en tant ki chrétien?’—Luc 11:11-13.
3 Kan nou lire ek medite lor Parole ki inspiré par Bondié chaque jour ek kan nou nourri-nou lor plan spirituel par enn l’etude regulier dan bann publication, nou pou couma enn “pié ki’nn planté dan bord bann canal de l’eau, ek ki rapporte fruit dan so saison. So feuillage pa fletri.”—Ps. 1:2, 3.
4 Jéhovah servi aussi nou bann frere ek soeur, ki kapav vinn “enn aide ki fortifié” nou. (Col. 4:10, 11) Dan bann reunion zot fortifié nou par zot bann conversation, bann commentaire ek sujet encourageant. (Actes 15:32) Bann ancien surtout, donne nou enn l’aide spirituel ek enn l’encouragement ki fortifié nou.—Is. 32:1, 2.
5 La predication: Si ou senti ki ou pé perdi la force, pa arrete preché! Predication pa couma n’importe ki lezot activité. Avredir, kan nou regulier dan predication, sa redonne nou la force. (Mat. 11:28-30) Preche la bonne nouvelle aide nou pou concentré-nou lor Royaume Bondié ek pou garde dan nou l’esprit la vie eternel ek so bann benediction ki pé vini.
6 Ena encore beaucoup travail pou faire avant ki sa mauvais system-la detruire. Nou ena bann bon raison pou reste ferme dan nou service ek “depann lor la force ki Bondié donné.” (1 Pierre 4:11) Avek l’aide Jéhovah nou pou reussi fini nou travail, parski “Li donne la force seki fatigué.”—Is. 40:29.