“Nourri Avec Bann Parole la Foi”
1 Contigne amène enn la-vie ki reflète l’attachement ar Bondié, sa demann bann grand zeffort. (1 Tim. 4:7-10) Si nou compte lor nou propre la-force pou contigne lor sa chemin-la, nou pa pou tardé pou fatigué et nou pou risqué tombé. (Is. 40:29-31) Enn façon ki nou kapav gagne la force ar Jéhovah, c’est kan nou ‘nourri nou avec bann parole la foi.’—1 Tim. 4:6.
2 Enn Nourriture Spirituel Ki Donne Nou Tou Séki Nou Bizin: À travers so Parole ek “l’esclave fidèle et avisé,” Jéhovah donne nou enn nourriture spirituel ki aide nou pou reste fidèle. (Mat. 24:45) Eski nou pé faire nou part pou profite sa? Eski nou lire la Bible toulé-jour? Eski nou’nn fixé enn l’heure kot nou faire nou l’étude personnel ek nou médité? (Ps. 1:2, 3) Enn bon nourriture spirituel coumsa donne nou la force ek protège nou kont le monde Satan ki kapav affaibli nou. (1 Jean 5:19) Si nou rempli nou l’esprit avec bann bon kitsoz ek nou mette zot en pratik, Jéhovah pou avec nou.—Phil. 4:8, 9.
3 Jéhovah fortifié nou aussi par bann réunion congrégation. (Héb. 10:24, 25) L’enseignement spirituel ek bon fréquentation ki nou gagné dans sa bann rassemblement-la, fortifié nou pou reste ferme malgré bann épreuve. (1 Pierre 5:9, 10) Enn jeune soeur ki découragé à cause bann difficulté so la-vie toulé-jour, dire: “Bann réunion zot couma enn l’endroit kot éna de l’eau dans désert, kot mo régagne la force pou mo kapav faire face ar lendemain.” Nou vrai-mem béni pou zeffort ki nou faire pou assisté bann réunion!
4 Proclame la Vérité: Prêche avec lézot, sa ti couma dire mangé pou Jésus; oui, sa ti donne li plus l’énergie. (Jean 4:32-34) Pareillement, kan nou koz avec lézot lor bann promesse extraordinaire ki Bondié inn faire, sa redonne nou la force. Kan nou bien occupé dans nou ministère, sa aussi pou aide nou fixé nou léker ek nou l’esprit lor Royaume Bondié ek bann bénédiction ki bientôt nou pou gagné. Oui, péna doute ki sa redonne nou la force.—Mat. 11:28-30.
5 Li vrai-mem enn privilège pou kapav profite nourriture spirituel ki Jéhovah pé donne so peuple zordi. Anou toujours contigne remercié Li ek glorifié Li dans la joie.—Is. 65:13, 14.