Program familial—Bann reunion
1 Si ou enn parent chrétien, ou envie ki, kan ou zenfant vinn grand, zot content Jéhovah, ek zot servi Li. Ou envie ki zot gagne la vie pou touletan dan enn nouveau lé-monde ki Bondié finn promette. Couma ou kapav aide zot pou mette la verité dan premier place dan zot la-vie? Enn fason pli important, c’est par ou l’exemple. (Prov. 20:7) Enn soeur rappel l’exemple so mama ki ti Témoin; li ti dire: “Pa ti ena okenn doute si nou pou al reunion ou-soit non.” Sa finn bien mark sa soeur-la.
2 Eski ou famille comprend l’objectif bann reunion? Seki nou aprann pendant bann reunion donne nou la force pou contigne faire volonté Bondié, ek compagnie nou bann frere ek soeur vrai-mem encourage nou. (Is. 54:13; Rom. 1:11, 12) Mais, l’objectif principal bann reunion, c’est pou donne Jéhovah louange “parmi bann la-foule rassemblé.” (Ps. 26:12) Bann reunion donne nou l’occasion pou montré nou l’amour pou Jéhovah ek pou adore Li.
3 ‘Reste lor zot garde’: Si nou comprend ki l’objectif nou bann reunion, li sacré, sa pou pousse nou pou ‘reste lor nou garde’ pou ki nou pa prend l’habitude rate bann reunion pou bann kitsoz ki pa important. (Éph. 5:15, 16; Héb. 10:24, 25) Kan ou faire ou program familial, ou kapav commence par ecrire l’heure bann reunion. Lerla, faire tou ou possible pou pa laisse bann lezot activité casse ou program. Faire sur ki ou famille considere l’assistance bann reunion couma enn priorité.
4 Eski sa pa touche nou kan nou lire ki nou bann frere pé reussi surmonte bann difficulté pou assisté bann reunion ek bann l’assemblée? Mem si ou situation pa aussi difficile ki sa, kitfois ou’si ou pé bizin faire face ar certain problem. Satan pé faire sa vinn encore pli difficile pou bann Témoins adore Jéhovah. Mais kan-mem, ou kapav sur ki ou zenfant pou trouve bann grand zeffort ki ou famille pé faire pou assisté bann reunion. Kan ou faire sa, ou pé partage avek zot enn cadeau spirituel ki jamais zot pa pou blié.