Contigne “rapporte beaucoup fruit”
1 Dan enn langage symbolik, Jésus compare li-mem couma enn vrai pié raisin, so Papa couma enn Planteur, ek so bann disciple oint couma bann branche sa pié raisin ki bien rapporte fruit. Kan li decrire travail sa Planteur symbolik-la, Jésus montré ki quantité li important pou nou pou reste bien attaché ar sa pié raisin-la. (Jean 15:1-4) Sa faire nou comprend ki tou bann dimoune ki ena enn relation personnel avek Jéhovah bizin couma enn branche sa “vrai pié raisin” setadir, Jésus Christ, ki rapporte bann fruit. Nou bizin contigne produire en grand quantité “fruit l’esprit” ek aussi bann fruit en rapport avek Royaume Bondié.—Gal. 5:22, 23; Mat. 24:14; 28:19, 20.
2 Fruit l’esprit: Si nou envie koné ki quantité nou’nn progressé lor plan spirituel, nou bizin demann nou-mem ki niveau nou’nn arrivé kan nou pé manifesté fruit l’esprit saint. Eski ou faire zeffort pou cultive fruit l’esprit Bondié kan ou etudié regulierement ek kan ou medite lor Parole Bondié? (Phil. 1:9-11) Pa hesité pou prié pou gagne l’esprit saint. Sa pou produire bann qualité dan ou-mem ki donne la gloire Jéhovah ek ki aide ou contigne faire bann progré spirituel.—Luc 11:13; Jean 13:35.
3 Kan nou cultive fruit l’esprit, sa pou aide nou aussi pou vinn bann proclamateur pli zelé. Par exemple, l’amour ek la foi pousse nou pou faire place dan nou program ki bien rempli, pou participe dan ministere regulierement. Bann qualité couma la paix, patience, bonté, douceur, ek maitrise de soi, aide nou pou reagir bien envers bann ki opposé ar nou. La joie permette nou gagne satisfaction dan nou ministere mem kan bann dimoune pa interessé.
4 Fruit ki en rapport avek Royaume Bondié: Nou envie aussi produire fruit en rapport avek Royaume Bondié. Sa vedir ki nou bizin offert aussi “enn sacrifice louange, setadir fruit nou la-levre ki faire declaration publik pou nom [Jéhovah].” (Héb. 13:15) Nou faire sa kan nou determiné ek nou zelé pou preche la bonne nouvelle. Eski ou pé faire tou ou possible pou produire plus fruit en rapport avek Royaume Bondié kan ou ameliore ou ministere?
5 Jésus ti montré ki so bann disciple fidel ti pou produire different quantité fruit. (Mat. 13:23) Alors, fodé pa nou compare nou avek lezot, mais nou bizin donne Jéhovah tou seki nou kapav. (Gal. 6:4) Si nou servi Parole Bondié pou analyse nou situation personnel, ek nou honnete avek nou-mem, sa pou aide nou pou contigne donne Jéhovah la gloire kan nou “rapporte beaucoup fruit.”—Jean 15:8.