Eski ou pé laisse l’esprit Bondié guide ou?
“To l’esprit li bon; ki li conduire moi dan pays kot faire seki droite.”—Ps. 143:10.
1, 2. (a) Cite bann l’exemple kot Jéhovah ti servi so l’esprit saint en faveur so bann serviteur. (b) Eski l’esprit saint agir zis dan bann l’occasion special? Expliké.
KI BANN l’exemple vinn dan ou l’esprit kan ou pense fason ki l’esprit saint agir? Eski ou pense lor bann action extraordinaire ki Guidéôn ek Samson ti faire? (Juges 6:33, 34; 15:14, 15) Kitfois ou pense lor courage bann premier chretien ou-soit lor calme ki Étienne ti manifesté kan li ti devant Sanhédrin. (Actes 4:31; 6:15) Dan nou lepok, ki nou kapav dire concernant la joie ki nou trouvé dan nou bann l’assemblée international, l’integrité nou bann frere ki dan prison a cause zot neutralité, ek l’accroissement extraordinaire ki ena dan l’activité predication? Sa bann l’exemple-la montré bien ki l’esprit saint pé agir.
2 Eski l’esprit saint agir zis dan bann l’occasion special ou-soit dan bann situation extraordinaire? Non. Parole Bondié koz lor bann chretien ki “marche par l’esprit,” ki “laisse l’esprit guide [zot]” ek ki “vive par l’esprit.” (Gal. 5:16, 18, 25) Sa bann l’expression-la montré ki l’esprit saint kapav touletan ena enn l’influence lor nou la vie. Toulé-jour nou bizin suppliye Jéhovah pou guide nou bann pensée, nou bann parole ek nou bann action par so l’esprit. (Lire Psaume 143:10.) Kan nou laisse l’esprit agir sans okenn obstacle dan nou la vie, li pou faire nou produire enn fruit ki pou faire lezot dimoune di-bien ek ki pou loué Bondié.
3. (a) Kifer nou bizin laisse l’esprit saint guide nou? (b) Ki bann question nou pou examiné?
3 Kifer li bien important ki nou laisse l’esprit saint guide nou? Parski ena enn lot la force ki opposé ar l’esprit saint ki essaye controle nou. La Bible appel sa lot la force-la “la chair,” setadir tendance ki nou ena pou faire peché a cause l’imperfection ki nou finn herité ar Adam. (Lire Galates 5:17.) Alors, couma nou kapav laisse-nou guidé par l’esprit saint? Eski ena bann kitsoz pratik ki nou kapav faire pou lutte kont nou la chair imparfait? Anou reponn sa bann question-la pendant ki nou examine six dernier qualité ki forme partie dan “fruit l’esprit,” setadir, “patience, bienveillance, bonté, la foi, douceur, maitrise de soi.”—Gal. 5:22, 23.
Douceur ek patience favorise la paix dan congregation
4. Couma douceur ek patience favorise la paix dan congregation?
4 Lire Colossiens 3:12, 13. Pou favorise la paix dan congregation, bizin patience ek douceur toulé-deux. Sa deux qualité dan fruit l’esprit-la aide nou pou traite lezot avek compassion, pou reste calme kan lezot provok nou, ek pou evite tire vengeance kan lezot dire ou-soit faire bann mauvais kitsoz kont nou. Si nou’nn gagne enn probleme avek enn frere ou-soit enn soeur, patience pou aide nou pou pa baisse lé-bras, mais pou faire seki nou kapav pou retablir la paix. Eski vrai-mem nou bizin douceur ek patience dan congregation? Oui, parski nou tou nou imparfait.
5. (a) Ki ti arrivé entre Paul ek Barnabas? (b) Ki sa montré nou?
5 Anou guette seki ti arrivé entre Paul ek Barnabas. Zot ti travail ensam pendant plusieurs l’année pou faire la bonne nouvelle progressé. Toulé-deux ti ena bann bon qualité. Pourtant, enn jour, ti ena ‘enn grand colere entre zot, ek sakenn ti al so coté.’ (Actes 15:36-39) Sa l’evenement-la montré bien ki parfois kapav ena bann desaccord mem entre bann serviteur Bondié ki bien devoué. Si enn chretien gagne enn desaccord avek enn frere ou-soit enn soeur, ki li kapav faire pou empeche sa desaccord-la faire zot explosé ar colere, ek faire zot perdi bann bon relation ki ena entre zot?
6, 7. (a) Ki conseil biblik nou kapav suive avant ki enn conversation avek enn lot chretien commence vinn chaud? (b) Ki bann l’avantage nou gagné kan nou “pré pou ecouté, pa pressé pou kozé ek pa en colere vite”?
6 La Bible montré ki ‘sa grand colere’ ki ti ena entre Paul ek Barnabas-la ti arrivé enn sel coup ek ti grave. Si enn chretien senti ki li pé commence en colere kan li pé koz lor enn sujet avek enn lot chretien, li pou montré-li sage si li suive conseil ki trouve dan Jacques 1:19, 20: “Tou dimoune bizin pré pou ecouté, pa pressé pou kozé ek pa en colere vite; parski colere bann dimoune pa accompli la justice Bondié.” Tou depann lor situation-la, kitfois li pou essaye change sujet, contigne conversation-la enn lot fois, ou-soit li kapav allé, avant ki conversation-la vinn chaud.—Prov. 12:16; 17:14; 29:11.
7 Ki bann l’avantage ena pou suive sa conseil-la? Kan enn chretien prend le temps pou calmé-li, prié lor sa sujet-la, ek reflechi couma li kapav reponn dan enn bon fason, li pé laisse li-mem guidé par l’esprit Bondié. (Prov. 15:1, 28) Enba l’influence l’esprit saint, li kapav manifesté douceur ek patience. Lerla, li pou kapav suive conseil ki trouve dan Éphésiens 4:26, 29: “Zot kapav en colere, mais pa faire peché . . . Pa laisse okenn parole pourri sorti dan zot la bouche, mais plutot tou parole ki bon pou batir kan necessaire, pou ki bann ki pé ecouté kapav gagne kitsoz ki bon.” Oui, kan nou ena douceur ek patience, nou pou favorise la paix ek l’unité dan congregation.
Bienveillance ek bonté kapav faire ou famille di-bien
8, 9. (a) Couma ou pou decrire bienveillance ek bonté? (b) Ki l’effet bienveillance ek bonté ena dan enn famille?
8 Lire Éphésiens 4:31, 32; 5:8, 9. Pareil couma enn ti la brise ek enn la boisson bien glacé faire nou di-bien kan pé faire chaud, bienveillance ek bonté aussi faire di-bien. Sa bann qualité-la favorise enn bon l’ambiance dan la famille. Bienveillance c’est enn qualité bien attirant ki nou manifesté parski nou ena enn l’interet sincere pou lezot, enn l’interet ki nou manifesté par bann bon action ek bann parole gentil. La bonté aussi pareil, c’est enn qualité ki pousse-nou pou faire bann bon action envers lezot. Nou montré sa qualité-la kan nou genereux. (Actes 9:36, 39; 16:14, 15) Mais la bonté implik plus ki sa.
9 La bonté c’est tou seki bon lor plan moral. Li pa concerne zis seki nou faire, mais li concerne enn kitsoz pli important, seki nou été. Anou prend enn l’exemple. Pou ki enn fruit li bon, fodé ki li’nn paré ek li pa pourri ni endan ni en dehors. Li pareil aussi pou enn chretien, tou domaine so la vie bizin rempli ar bonté ki l’esprit saint produire.
10. Ki enn chef famille kapav faire pou aide so famille developpe fruit l’esprit?
10 Dan enn famille chretien, ki kapav aide chaque membre la famille pou traite sakenn so camarade avek bienveillance ek bonté? Enn connaissance exact lor Parole Bondié bien important. (Col. 3:9, 10) Certain chef famille reserve enn partie dan zot l’etude familial chaque semaine, pou etudié lor fruit l’esprit. Li pa difficile pou faire sa. Ou kapav servi different zouti ki disponible dan enn langue ki ou comprend, pou faire bann recherche lor chaque qualité ki forme partie dan fruit l’esprit. Ou kapav examine zis deux-trois paragraphe par semaine, ek passe plusieurs semaine lor chaque qualité. Pendant l’etude, lire ek discute lor bann verset ki’nn cité. Rod bann fason pou applik seki ou aprann, ek prié Jéhovah pou Li beni ou bann zeffort. (1 Tim. 4:15; 1 Jean 5:14, 15) Eski sa qualité l’etude-la kapav vrai-mem aide enn famille dan fason ki sakenn traite so camarade?
11, 12. Couma deux couple chretien finn tire bann bienfait ar zot l’etude lor bienveillance?
11 Enn jeune couple ki ti envie reussi zot mariage, ti decidé pou faire enn l’etude profond lor fruit l’esprit. Ki bienfait zot inn gagné? Soeur-la dire: “Depuis ki nou finn aprann ki la bonté implik manifesté fidelité, sa finn ena enn grand l’effet lor fason ki nou traite nou camarade ziska zordi. Sa finn enseigne nou pou pli disposé pou cedé ek aussi pou pardonné. Nou finn comprend l’importance pou dire ‘merci’ ek ‘excuse moi,’ kan bizin.”
12 Enn lot couple chretien ki ti pé gagne bann probleme dan zot mariage, ti realisé ki zot pa ti pé manifesté bienveillance entre zot. Zot ti decidé pou etudié lor sa qualité-la ensam. Ki resultat zot ti gagné? Mari-la raconté: “L’etude ki nou ti faire lor bienveillance ti aide nou pou trouve l’importance pou faire confiance nou conjoint au lieu ki nou doute so mobile, ek pou trouve bann qualité nou conjoint. Nou ti commence plus interesse-nou ar besoin nou camarade. Mo ti manifesté bienveillance envers mo femme kan mo ti laisse li dire franchement seki li ti pensé, sans ki mo ti offensé. Sa vedir ki mo ti bizin mette mo l’orgueil enn coté. Kan nou ti commence manifesté bienveillance dan nou mariage, nou ti nepli ena tendance pou touletan defann nou-mem. Sa ti enn vrai soulagement.” Eski bann membre ou famille pou gagne bann bienfait si zot faire enn l’etude lor fruit l’esprit?
Manifesté la foi kan ou tousel
13. Nou bizin faire attention kont ki danger ki menace nou spiritualité?
13 Bann chretien bizin laisse l’esprit Bondié guide zot kan zot en publik ek aussi kan zot tousel. Zordi, dan sa le monde Satan-la, bann zimage immoral ek bann divertissement malprop finn augmenté. Sa kapav mette nou spiritualité en danger. Ki enn chretien bizin faire? Parole Bondié donne nou sa conseil-la: “Rejette tou seki impur ek sa kitsoz ki en plus-la: mechanceté, ek accepté avek douceur ki la parole rente dan pli profond zot-mem, parole ki kapav sauve zot nâme.” (Jacq. 1:21) Anou guetté couma la foi, enn lot qualité ki forme partie dan fruit l’esprit, kapav aide nou pou reste pur devant Jéhovah.
14. Couma enn mank la foi kapav pousse certain pou ena enn mauvais conduite?
14 Si nou ena la foi, Jéhovah pou enn Kikenn ki réel pou nou. Mais si Bondié pa réel pou nou, nou pa pou tardé pou ena enn mauvais conduite. Prend l’exemple seki ti arrive bann serviteur Bondié dan le passé. Jéhovah ti faire prophete Ézékiel koné ki certain Israélite ti pé faire bann kitsoz detestable en cachiette. Li ti dire: “Ah garson enn zom, eski to’nn trouvé seki bann zom agé dan lakaz Israël pé faire dan noir, sakenn dan bann la chambre ki dan fond kot ena so bann zimage sculpté? Parski zot pé dire: ‘Jéhovah pa trouve nou. Jéhovah finn quitte pays.’” (Ézék. 8:12) Eski ou finn remarké kifer zot ti pé agir coumsa? Zot ti pensé ki Jéhovah pa ti koné ki zot ti pé faire. Jéhovah pa ti réel pou zot.
15. Couma enn la foi solide en Jéhovah protege nou?
15 Anou prend l’exemple Joseph ki ti montré-li different. Mem si li ti loin ar so famille ek so peuple, Joseph ti refuse commette l’adultere avek femme Potiphar. Kifer? Li ti dire: “Couma mo kapav faire enn mauvais kitsoz coumsa ek vrai-mem faire peché kont Bondié?” (Gen. 39:7-9) Oui, Jéhovah ti réel pou li. Si Bondié réel pou nou, kan nou tousel, nou pa pou guette bann divertissement impur ou-soit nou pa pou faire nanyin ki nou koné pou faire Bondié la peine. Nou pou ena mem determination ki sa psalmiste-la, ki ti chanté: “C’est avek enn leker rempli ar fidelité ki mo pou marche dan mo lakaz. Mo pa pou mette devant mo lizié okenn kitsoz ki pa vaut nanyin.”—Ps. 101:2, 3.
Protege ou leker kan ou manifesté maitrise de soi
16, 17. (a) Pareil couma nou trouvé dan livre Proverbes, couma “enn jeune homme ki ti mank leker” ti tombe dan peché? (b) Dapré seki nou trouvé lor page 30, couma enn kitsoz coumsa kapav arrive enn chretien zordi n’importe ki l’age li ena?
16 Maitrise de soi c’est dernier qualité dan fruit l’esprit. Sa qualité-la donne nou la force pou rejette bann kitsoz ki Bondié condamné ek kapav aide nou pou protege nou leker. (Prov. 4:23) Anou examine Proverbes 7:6-23 ki raconte seki ti arrive enn jeune homme. Sa ‘jeune homme-la ti mank leker’ ek li ti laisse-li influencé par manigance enn prostitué. Li ti tombe dan piege apré ki li ti “passe pré ar coin la rue kot sa femme-la ti été.” Kitfois, par curiosité li ti al promené dan quartier kot sa femme-la resté. Bien vite, li ti laisse femme-la embete li pou faire seki mauvais, sans ki li ti rann-li compte ki sa ti “concerne so prop nâme.”
17 Couma sa jeune homme-la ti kapav evite sa mauvais conduite-la? Si li ti suive sa l’avertissement-la: “Pa al promené-promené lor so bann chemin.” (Prov. 7:25) Nou kapav tire enn leson: si nou envie ki l’esprit Bondié guide nou, fodé pa ki nou mette nou-mem dan bann situation ki kapav tente nou. Enn fason ki enn dimoune kapav prend mem chemin ki sa “jeune homme ki ti mank leker[-la]” c’est kan li passe so le temps pou change bann chaine television ou-soit al lor bann site Internet, sans okenn but precis. Ki li ena l’intention pou faire sa ou-soit non, li kapav tombe lor bann scene immoral ki excite bann desir sexuel. Li kapav tigit par tigit, developpe enn mauvais l’habitude pou guette pornographie. Sa pou ena bann consequence bien grave lor so conscience ek lor so bann relation avek Bondié. Sa kapav mette so la vie-mem en danger.—Lire Romains 8:5-8.
18. (a) Ki bann precaution enn chretien kapav prend pou protege so leker? (b) Couma kan li faire sa, li manifesté maitrise de soi?
18 Bien sur, nou kapav ek nou bizin manifesté maitrise de soi ek agir vite si nou en face ar enn zimage erotik. Mais li pli bon si nou evite sa situation-la avant-mem! (Prov. 22:3) Maitrise de soi pousse-nou pou prend bann precaution ki bizin pou protege nou ek pou faire seki nou finn decidé. Par exemple, nou kapav mette nou ordinateur dan enn place kot tou dimoune trouvé, sa kapav enn protection pou nou. Certain finn trouvé ki li preferable ki zot servi zot ordinateur ou-soit ki zot guette television zis kan lezot la. Ena lezot ki finn decidé pou pena Internet kot zot. (Lire Matthieu 5:27-30.) Anou prend tou disposition ki necessaire pou protege nou-mem ek nou famille pou ki nou kapav adore Jéhovah avek “enn leker pur ek enn bon conscience, ek enn la foi ki pa hypocrite.”—1 Tim. 1:5.
19. Ki bann bienfait nou gagné kan nou laisse l’esprit saint guide nou?
19 Fruit ki l’esprit saint produire amenn beaucoup bienfait. Douceur ek patience favorise la paix dan congregation. Bienveillance ek bonté favorise le bonheur dan la famille. La foi ek maitrise de soi aide nou pou reste proche ar Jéhovah ek pur devant Li. En plus, Galates 6:8 donne nou sa l’assurance-la: “Sa kikenn ki pé semé pou l’esprit-la, pou recolté ar l’esprit la vie eternel.” Oui, grace a la ranson, Jéhovah pou servi l’esprit saint pou donne la vie eternel tou bann ki laisse-zot guidé par l’esprit.
Couma ou pou reponn?
• Couma douceur ek patience favorise la paix dan congregation?
• Ki kapav aide bann chretien pou manifesté bienveillance ek bonté kot zot?
• Couma la foi ek maitrise de soi aide enn chretien pou protege so leker?
[Zimage page 28]
Couma ou kapav empeche enn conversation vinn chaud?
[Zimage page 29]
Enn l’etude lor fruit l’esprit kapav faire ou famille gagne bann bienfait
[Zimage page 30]
Ki bann danger nou kapav evité si nou ena la foi ek maitrise de soi?