Pa hesité pou conduire enn l’etude la Bible!
1. Dan ki fason nou “pa refuse faire di-bien”?
1 Kan nou participe avek zele pou annonce la bonne nouvelle lor Royaume Bondié, sa montré ki nou pa “refuse faire di-bien” bann dimoune dan nou territoire. (Prov. 3:27) Pena okenn pli bon message ki nou kapav dire bann dimoune ki message kot bientot nou pou vive dan enn bon lepok kot Bondié pou dirigé. Mem si ou faire beaucoup pou partage la bonne nouvelle lor l’esperance Royaume Bondié kan ou rann temoignage informel, ou-soit kan ou place bann publication, kifer ou pa fixé l’objectif pou conduire enn l’etude la Bible, si ou pa deja pé faire li?
2. Ki kapav faire nou hesité pou commence enn l’etude la Bible?
2 Parfois, c’est nou prop sentiment ki enn parmi bann pli grand difficulté ki empeche nou conduire enn l’etude la Bible. Certain hesité pou conduire enn l’etude la Bible parski zot pa senti-zot capable pou faire sa, ou-soit parski zot program bien chargé. Sa dé-trois suggestion ki pou suive-la, kapav aide ou pou pa hesité pou conduire bann l’etude la Bible.—Mat. 28:19; Actes 20:20.
3. Kifer nou qualifié pou enseigne la Bible?
3 Kan ou mank confiance: Kitfois ou pa finn faire grand classe, ou-soit pou bann lezot raison, ou mank confiance dan ou capacité pou conduire enn l’etude la Bible. Dan premier siecle, bann chretien efficace “ti bann zom ordinaire ki pa ti ena grand l’instruction.” Ki ti permette zot pou enseigne lezot la verité? “Bannla ti avek Jésus.” (Actes 4:13) Zot ti aprann avek Grand Enseignant, Jésus, ek so l’enseignement ek so bann methode inn ecrire dan la Bible pou nou. Mem si ou pa finn faire grand classe, ou pé gagne l’enseignement spirituel ki pli important ki n’importe ki lot l’enseignement.—Is. 50:4; 2 Cor. 3:5.
4. Ki nou kapav aprann ar l’exemple Amos?
4 Parfois Jéhovah ti servi bann prophete pou corrige bann dirigeant ki ti pé mal agir ou-soit lezot dimoune ki ti ena enn bel position. Certain prophete, couma Amos, pa ti ena enn grand position. Amos ti reconette: “Mo pa ti enn prophete, ni garson enn prophete; mais mo ti enn gardien troupeau ek mo ti pique bann figue sycomore.” (Amos 7:14) Malgré sa, Amos pa ti hesité pou annonce message jugement Jéhovah ar pretre Amatsia, enn adorateur bann veau. (Amos 7:16, 17) Fodé jamais nou blié ki nou pé faire travail Bondié ek Li pou faire nou gagne formation ki bizin pou nou kapav faire travail ki Li’nn donne nou.—2 Tim. 3:17.
5. Kifer nou bizin faire tou pou commence enn l’etude la Bible mem si nou program chargé?
5 Kan ou ena enn program chargé: Mem si ou ena enn program chargé, surement ou finn deja reserve enn moment pou participe dan predication regulierement. Conduire enn l’etude la Bible c’est enn parmi bann kitsoz ki faire nou gagne plus la-joie dan nou ministere. C’est enn privilege pou trouvé couma Parole Jéhovah agir dan la vie enn dimoune. (Héb. 4:12) Jéhovah content kan nou faire bann sacrifice personnel pou nou kapav aide enn dimoune pou “gagne enn connaissance exact lor la verité.” (1 Tim. 2:4) Mem bann ange content kan zot trouve enn dimoune repenti, quitte so conduite ki li ti ena avant ek faire bann progré spirituel.—Luc 15:10.
6. Ki privilege nou ena kan nou faire volonté Bondié?
6 Bondié “envie ki tou sorte qualité dimoune sauvé ek gagne enn connaissance exact lor la verité.” (1 Tim. 2:4) C’est vrai-mem enn grand privilege ki nou ena pou travail en accord avek volonté Bondié, kan nou pa hesité pou conduire bann l’etude la Bible!