Pa Peur—Malgré enn Programme Chargé
1. Kifer certain hesité pou propose enn l’etude la Bible?
1 Certain hesité pou propose enn l’etude la Bible parski zot ena enn programme chargé. Sa prend le temps pou occupe enn etudiant la Bible: bizin prepare l’etude, conduire l’etude-la, ek aide etudiant-la pou surmonte bann difficulté personnel. L’apotre Paul ti dire ki li ti mem partage so nâme pou aide bann ki ti dan Thessalonique, pou ki zot aprann konn Jéhovah. (1 Thess. 2:7, 8) Couma nou kapav conduire enn l’etude la Bible mem si nou ena enn programme bien rempli?
2. Couma nou l’amour pou Jéhovah ena enn l’effet lor fason ki nou servi nou le temps?
2 Nou Bizin le Temps pou Nou l’Adoration: En realité, pou adore Jéhovah, nou bizin le temps. Par exemple, regulierement nou prend le temps pou assisté bann reunion, pou preché, pou lire la Bible, ek pou prié. C’est avek la joie ki enn dimoune marié ki bien occupé pou essaye trouve le temps pou passe avek so conjoint. Alors, nou bizin encore plus content pou “ré-acheté” nou le temps pou adore Jéhovah parski nou content Li. (Éph. 5:15-17; 1 Jean 5:3) Dapré Jésus, enn partie bien important dan nou l’adoration c’est faire bann disciple. (Mat. 28:19, 20) Kan nou reflechi lor la, couma sa pou aide nou? Nou pa pou hesité pou accepté responsabilité pou conduire enn l’etude la Bible.
3. Couma nou kapav occupe nou bann etudiant la Bible mem si certain situation kass nou programme?
3 Mais ki nou pou faire si ena bann changement dan nou programme a cause nou travail, enn maladie chronik, ou-soit bann responsabilité theocratik? Certain proclamateur ki temps en temps pa kot zot pendant plusieurs jour conduire zot l’etude la Bible lor telephone ou-soit par video-conference. Bann ki bizin faire changement dan zot programme a cause enn maladie chronik, inn faire bann l’arrangement pou ki etudiant-la vinn kot zot pou etudié. Certain finn demann enn proclamateur ki zot kapav faire confiance pou remplace zot ek pou faire l’etude-la kan zot pa la.
4. Ki bann benediction nou gagné kan nou conduire bann l’etude?
4 Paul ti gagne beaucoup la joie kan li ti donne so le temps ek so l’energie pou aide lezot aprann la verité. (Actes 20:35) Kan li ti reflechi lor tou bann dimoune ki li ti aidé dan Thessalonique, sa ti pousse li pou remercié Jéhovah. (1 Thess. 1:2) Kan nou pa laisse enn programme chargé empeche nou conduire bann l’etude la Bible, sa kapav faire nou gagne plus la joie ek satisfaction dan nou ministere.