Bann Kitsoz ki Kapav Ed Twa pou Etidie Regilierman
ESKI to gagn difikilte pou apresie to letid personel ek pou fer li regilierman? Sirman sa inn deza ariv nou tou! Selman, mazinn lezot kitsoz ki nou fer toulezour, kouma par exanp bengne. Sa demann letan ek zefor pou bengne, me apre ki nou’nn fer sa nou santi nou bien! Dan mem fason, kan nou pe etidie Labib, se koumadir nou pe ‘lav nou avek delo par mwayin laparol.’ (Efe. 5:26) Anou get de-trwa sizesion ki kapav ed nou pou etidie regilierman:
Fer enn program. Nou letid personel se enn parmi “bann kitsoz ki pli inportan” ki bann Kretien bizin pa neglize. (Fil. 1:10) Pou ki to swiv bien to program letid personel, to kapav met li dan enn plas kot to pou trouv li bien, kouma par exanp lor enn tablo ouswa lor frizider. Ouswa to kapav met enn alarm lor to telefonn pou to rapel ler ki to bizin fer li.
Swazir ler ek metod etidie ki pli bon pou twa. Eski to gagn difikilte pou res konsantre pandan lontan? Ouswa, eski to kapav fer li? Se twa ki kone seki pli bon pou twa, alor adapte to letid ar to sitiasion. Si to pa santi twa motive kan ariv ler pou etidie, fer zefor pou etidie zis dis minit. Si to etidie enn tigit letan mem, to kapav aprann boukou kitsoz. Lerla, kan to koumans etidie, kitfwa to pou santi twa motive pou kontigne.—Fil. 2:13.
Deside alavans seki to pou etidie. Eski se kan inn ariv ler pou to etidie ki to reflesi lor ki kitsoz to pou etidie? Si to fer sa, to pa pou reisi “servi [to] letan dan meyer fason posib.” (Efe. 5:16) Alavans, fer enn lalis bann lartik ek bann size lor ki to ti pou kontan etidie. Par exanp, si enn kestion pas dan to latet, ekrir li. Ek sak fwa ki to fini etidie, to kapav ekrir bann lezot lide lor ki to ti pou kontan etidie.
Fer bann sanzman si bizin. Seki pli inportan, se ki to etidie toule semenn. Pou ki to reisi fer sa, si bizin, sanz zour ek ler ki to etidie, kantite letan ki to etidie, ouswa size lor ki to pe etidie.
Si nou etidie toule semenn, nou pou gagn bann benediksion. Nou pou vinn pli pros ar Zeova, nou pou pran bann bon desizion, ek sa pou ankouraz nou.—Zozwe 1:8.