Program familial—L’etude familial
1 Pli grand cadeau ki ou kapav donne ou zenfant en tant ki enn parent chrétien c’est ou l’amour pou Jéhovah. Enn bon fason ki ou kapav faire sa c’est kan “ou pé assizé dan ou lakaz” pou faire l’etude familial toulé-semaine. (Deut. 6:5-7) Mem si ou conjoint pa dan la verité, ou-soit mem si ou pé elevé ou zenfant tousel, ou kapav aide ou zenfant pou vinn proche ar ou ek ar Jéhovah, grace a enn l’etude familial ki ou faire regulierement.
2 Commence enn l’etude familial: Premier kitsoz ki ou bizin faire, c’est prend l’habitude pou etudié en famille. Si ou pa koné kan pou faire l’etude, kifer ou pa discute sa en famille? (Prov. 15:22) Si ou zenfant encore tipti, kitfois ou pou prefere faire plusieurs ti-l’etude courte dan enn semaine. Guetté ki pou pli adapté pou ou famille. Fixé enn l’heure exact pou l’etude dan ou program familial, ek faire tou pou suive sa program-la.
3 Ki ou kapav etudié? Certain famille prepare l’etude de livre ki pou faire pou la semaine, ou-soit l’etude La Tour de Garde. Lezot trouve sa utile pou etudié bann publication ki’nn faire pou bann jeune. Enn papa ki ena enn garson ek enn tifi ti dire: “Nou zenfant bien content zot l’etude parski nou faire bann ti-drame ki basé lor bann zimage ki trouve dan livre Mo Liv Zistwar Labib. Zot comprend ek rappel beaucoup plus, ek sa li beaucoup plus important ki quantité paragraphe nou faire.”
4 Etudié chaque semaine: Li important ki faire l’etude familial regulierement, ek ki tou bann membre la famille attann sa avek plaisir. Kitfois ou pou bizin montré ou souple concernant jour ek l’heure ki ou faire l’etude familial, parski parfois arrive bann kitsoz ki ou pa ti pé attann. Kitfois pou ena bann situation kot ou pou bizin change sujet ki ou pé etudié. Mais n’importe ki changement ou bizin faire, pa laisse sa affecté ou program l’etude familial dan enn fason permanent. Dan enn famille, enn tifi finn faire sa commentaire-la: “Si ti bizin change l’heure nou l’etude familial, papa ti toujours colle enn papier lor la porte frigidaire. Coumsa, nou tou ti koné kan nou pou faire nou l’etude familial.” Oui, nou merite felicitation si nou faire bann zeffort coumsa pou garde nou l’etude familial regulier! Kan ou faire zeffort pou elevé ou zenfant “dan discipline ek dan bann l’avertissement Jéhovah,” ou pé montré ou l’amour pou toulé-deux, ou zenfant ek ou Papa ki dan le ciel.—Éph. 6:4.